ਹੈਦਰਾਬਾਦ: ਬਾਲੀਵੁੱਡ ਦੇ ਐਕਸ਼ਨ ਅਤੇ ਰੀਅਲ ਸਟੰਟ ਐਕਟਰ ਵਿਦਯੁਤ ਜਮਵਾਲ 10 ਦਸੰਬਰ ਨੂੰ ਆਪਣਾ 42ਵਾਂ ਜਨਮਦਿਨ ਸੈਲੀਬ੍ਰੇਟ ਕਰ ਰਹੇ ਹਨ। ਅਦਾਕਾਰ ਦਾ ਜਨਮ 1980 ਵਿੱਚ ਜੰਮੂ ਵਿੱਚ ਹੋਇਆ ਸੀ। ਵਿਦਯੁਤ ਨੇ ਸਿਰਫ਼ ਤਿੰਨ ਸਾਲ ਦੀ ਉਮਰ ਤੋਂ ਹੀ ਮਾਰਸ਼ਲ ਆਰਟ ਸਿੱਖਣੀ ਸ਼ੁਰੂ ਕਰ ਦਿੱਤੀ ਸੀ। ਅੱਜ ਉਸ ਨੇ ਮਾਰਸ਼ਲ ਆਰਟਸ ਵਿੱਚ ਮੁਹਾਰਤ ਹਾਸਲ ਕਰ ਲਈ ਹੈ। ਵਿਦਯੁਤ ਫੌਜੀ ਪਰਿਵਾਰ ਤੋਂ ਹਨ। ਵਿਦਯੁਤ ਦੇ ਪਿਤਾ ਫੌਜ ਵਿੱਚ ਸਨ। ਵਿਦਯੁਤ ਫਿਲਮਾਂ 'ਚ ਆਪਣੇ ਫਾਈਟ ਸੀਨਜ਼ ਅਤੇ ਖਤਰਨਾਕ ਸਟੰਟਸ ਲਈ ਮਸ਼ਹੂਰ ਹਨ। ਵਿਦਯੁਤ ਬਾਰੇ ਇਕ ਹੋਰ ਗੱਲ ਦੱਸ ਦੇਈਏ ਕਿ ਉਹ ਮਰਹੂਮ ਅਦਾਕਾਰ ਅਤੇ ਬਿੱਗ ਬੌਸ ਵਿਨਰ ਸਿਧਾਰਥ ਸ਼ੁਕਲਾ ਦੇ ਖਾਸ ਦੋਸਤ ਸਨ।
ਵਿਦਯੁਤ-ਸਿਧਾਰਥ ਦੀ ਦੋਸਤੀ ਕੁਝ ਇਸ ਤਰ੍ਹਾਂ ਸੀ: ਮਾਡਲਿੰਗ ਦੇ ਦਿਨਾਂ ਦੌਰਾਨ ਵਿਦਯੁਤ ਅਤੇ ਸਿਧਾਰਥ ਖਾਸ ਦੋਸਤ ਸਨ। ਇੰਨਾ ਹੀ ਨਹੀਂ ਦੋਵੇਂ ਇਕੱਠੇ ਜਿੰਮ ਵੀ ਕਰਦੇ ਸਨ। ਦੋਵੇਂ ਇੱਕ ਦੂਜੇ ਦੇ ਘਰ ਆਉਂਦੇ-ਜਾਂਦੇ ਰਹਿੰਦੇ ਸਨ। ਮੀਡੀਆ ਰਿਪੋਰਟਾਂ ਮੁਤਾਬਕ ਵਿਦਯੁਤ ਆਪਣੀ ਪ੍ਰੇਮਿਕਾ ਨੂੰ ਡੇਟ 'ਤੇ ਲਿਜਾਣ ਲਈ ਸਿਧਾਰਥ ਤੋਂ ਬਾਈਕ ਮੰਗਦਾ ਸੀ।