Munda Southal Da Release Date: ਤਨੂੰ ਗਰੇਵਾਲ-ਅਰਮਾਨ ਬੇਦਿਲ ਦੀ ਫਿਲਮ 'ਮੁੰਡਾ ਸਾਊਥਾਲ ਦਾ' ਦੀ ਰਿਲੀਜ਼ ਮਿਤੀ ਦਾ ਐਲਾਨ, ਇਸ ਸਤੰਬਰ ਹੋਵੇਗੀ ਰਿਲੀਜ਼

Munda Southal Da Release Date: ਤਨੂੰ ਗਰੇਵਾਲ ਅਤੇ ਗਾਇਕ ਅਰਮਾਨ ਬੇਦਿਲ ਦੀ ਫਿਲਮ 'ਮੁੰਡਾ ਸਾਊਥਾਲ ਦਾ' ਦੀ ਰਿਲੀਜ਼ ਮਿਤੀ ਦਾ ਐਲਾਨ ਹੋ ਗਿਆ ਹੈ, ਇਹ ਫਿਲਮ ਇਸ ਸਤੰਬਰ ਰਿਲੀਜ਼ ਹੋ ਜਾਵੇਗੀ।

ਚੰਡੀਗੜ੍ਹ:ਸੁੱਖ ਸੰਘੇੜਾ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਦੇ ਵੱਡੇ ਨਾਵਾਂ ਵਿੱਚੋਂ ਇੱਕ ਹੈ ਅਤੇ ਉਹ ਤੇਜ਼ੀ ਨਾਲ ਪੰਜਾਬੀ ਫਿਲਮ ਇੰਡਸਟਰੀ ਵਿੱਚ ਵੀ ਆਪਣੀ ਵੱਖਰੀ ਥਾਂ ਬਣਾ ਰਿਹਾ ਹੈ। ਪ੍ਰਤਿਭਾਸ਼ਾਲੀ ਕਲਾਕਾਰ ਪੰਜਾਬੀ ਗੀਤਾਂ ਦੇ ਸੰਗੀਤ ਵੀਡੀਓਜ਼ ਦੇ ਨਿਰਦੇਸ਼ਨ ਲਈ ਜਾਣਿਆ ਜਾਂਦਾ ਹੈ। ਬਹੁਮੁਖੀ ਨਿਰਦੇਸ਼ਕ ਨੇ ਦਰਜਨਾਂ ਸੰਗੀਤ ਵੀਡੀਓਜ਼ ਦਾ ਨਿਰਦੇਸ਼ਨ ਕੀਤਾ ਹੈ ਅਤੇ ਉਹ ਪੰਜਾਬੀ ਇੰਡਸਟਰੀ ਦੇ ਸਭ ਤੋਂ ਮਸ਼ਹੂਰ ਨਿਰਦੇਸ਼ਕਾਂ ਵਿੱਚੋਂ ਇੱਕ ਹੈ।

ਸੁੱਖ ਸੰਘੇੜਾ ਨੇ 2019 ਵਿੱਚ ਮਲਟੀਸਟਾਰਰ ਫਿਲਮ 'ਲਾਈਏ ਜੇ ਯਾਰੀਆਂ' ਨਾਲ ਇੱਕ ਫਿਲਮ ਨਿਰਦੇਸ਼ਕ ਵਜੋਂ ਆਪਣੀ ਸ਼ੁਰੂਆਤ ਕੀਤੀ ਸੀ। ਲੰਬੇ ਕੋਰੋਨਾ ਬ੍ਰੇਕ ਤੋਂ ਬਾਅਦ ਨਿਰਦੇਸ਼ਕ ਇੱਕ ਨਿਰਦੇਸ਼ਕ ਵਜੋਂ ਆਪਣੀ ਦੂਜੀ ਫਿਲਮ ਲਈ ਤਿਆਰ ਹਨ। ਉਸ ਦੀ ਨਵੀਂ ਫਿਲਮ ਦਾ ਸਿਰਲੇਖ 'ਮੁੰਡਾ ਸਾਊਥਾਲ ਦਾ' ਹੈ। ਸੰਘੇੜਾ ਦੇ ਨਵੇਂ ਪ੍ਰੋਜੈਕਟ ਦੀ ਸ਼ੂਟਿੰਗ ਪਹਿਲਾਂ ਹੀ ਸ਼ੁਰੂ ਹੋ ਚੁੱਕੀ ਸੀ। ਨਿਰਦੇਸ਼ਕ ਆਪਣੇ ਨਵੇਂ ਪ੍ਰੋਜੈਕਟ ਲਈ ਪੂਰੀ ਤਰ੍ਹਾਂ ਤਿਆਰ ਹੈ ਅਤੇ ਪਹਿਲਾਂ ਹੀ ਆਪਣੀਆਂ ਸੋਸ਼ਲ ਮੀਡੀਆ ਪੋਸਟਾਂ ਨਾਲ ਚਰਚਾ ਪੈਦਾ ਕਰ ਚੁੱਕਾ ਹੈ। ਸੰਘੇੜਾ ਨੇ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋਣ ਦੀ ਖਬਰ ਆਪਣੇ ਇੰਸਟਾਗ੍ਰਾਮ 'ਤੇ ਸਾਂਝੀ ਕੀਤੀ ਸੀ।

ਹੁਣ ਫਿਲਮ ਬਾਰੇ ਇੱਕ ਨਵਾਂ ਅਪਡੇਟ ਸਾਹਮਣੇ ਆ ਰਿਹਾ ਹੈ, ਜੀ ਹਾਂ...ਇਸ ਫਿਲਮ ਦੀ ਰਿਲੀਜ਼ ਮਿਤੀ ਦਾ ਐਲਾਨ ਹੋ ਗਿਆ ਹੈ, ਇਸ ਬਾਰੇ ਖੁਦ ਫਿਲਮ ਦੇ ਕਲਾਕਾਰ ਨੇ ਜਾਣਕਾਰੀ ਸਾਂਝੀ ਕੀਤੀ ਹੈ ਅਤੇ ਲਿਖਿਆ ਹੈ, 'ਵਾਹਿਗੁਰੂ ਜੀ, 1 ਸਤੰਬਰ 2023, ਇਥੋਂ ਤੱਕ ਲੈ ਕੇ ਆਉਣ ਲਈ ਸਭ ਦਾ ਧੰਨਵਾਦ ਸ਼ੁਕਰੀਆਂ, ਹੁਣ ਬਸ ਅੱਗੇ ਲੈ ਜਾਇਓ...।'

ਤੁਹਾਨੂੰ ਦੱਸ ਦਈਏ ਕਿ 'ਮੁੰਡਾ ਸਾਊਥਾਲ ਦਾ' ਨਾਂ ਦੀ ਇਸ ਫਿਲਮ ਨਾਲ ਗਾਇਕ ਅਰਮਾਨ ਬੇਦਿਲ ਅਤੇ ਖੂਬਸੂਰਤ ਅਦਾਕਾਰਾ ਤਨੂੰ ਗਰੇਵਾਲ ਸਕ੍ਰੀਨ ਸਾਂਝੀ ਕਰਦੇ ਨਜ਼ਰ ਆਉਣਗੇ। ਅਰਮਾਨ ਬੇਦਿਲ ਅਤੇ ਤਨੂੰ ਗਰੇਵਾਲ ਦੀ ਅਦਾਕਾਰੀ ਵਾਲੀ ਇਹ ਫਿਲਮ ਮੈਜਿਕ ਅਤੇ ਪਿੰਕ ਪੋਨੀ ਦੇ ਬੈਨਰ ਹੇਠ ਰਿਲੀਜ਼ ਹੋਵੇਗੀ, ਜਦੋਂ ਕਿ ਇਸ ਨੂੰ ਰਿਦਮ ਬੁਆਏਜ਼ ਐਂਟਰਟੇਨਮੈਂਟ ਦੁਆਰਾ ਪੇਸ਼ ਕੀਤਾ ਜਾਵੇਗਾ।

ਹੁਣ ਇਥੇ ਜੇਕਰ 'ਮੁੰਡਾ ਸਾਊਥਾਲ ਦਾ' ਦੇ ਪੋਸਟਰ ਬਾਰੇ ਗੱਲ ਕਰੀਏ ਤਾਂ ਅਸੀਂ ਪੋਸਟਰ ਵਿੱਚ ਇੱਕ ਬੇਸਬਾਲ ਬੈਟ ਅਤੇ ਫੁੱਟਬਾਲ ਦੇ ਨਾਲ ਇੱਕ ਕਾਰ ਦੇਖਦੇ ਹਾਂ। ਪੋਸਟਰ ਕਾਫ਼ੀ ਵਿਅੰਗਾਤਮਕ ਹੈ ਅਤੇ ਸੰਕੇਤ ਦਿੰਦਾ ਹੈ ਕਿ ਇਸ ਫਿਲਮ ਦੀ ਵੰਨਗੀ ਇੱਕ ਕਾਮੇਡੀ ਡਰਾਮਾ ਹੋਵੇਗੀ। ਪਰ ਕੁਝ ਪੱਕਾ ਤਾਂ ਹੀ ਕਿਹਾ ਜਾ ਸਕਦਾ ਹੈ ਜਦੋਂ ਅਧਿਕਾਰਤ ਵੇਰਵੇ ਸਾਹਮਣੇ ਆਉਣਗੇ।