ਆਪਣੀ ਡੈਬਿਊ ਫਿਲਮ 'ਚ ਹੀ ਪ੍ਰਿਅੰਕਾ ਚੋਪੜਾ ਤੋਂ ਨਹੀਂ ਹੋ ਰਿਹਾ ਸੀ ਡਾਂਸ, ਨਿਰਮਾਤਾ ਨੇ ਕੀਤਾ ਖੁਲਾਸਾ

ਪੂਰੀ ਦੁਨੀਆ 'ਚ ਆਪਣੀ ਪ੍ਰਤਿਭਾ ਦਾ ਲੋਹਾ ਮਨਵਾਉਣ ਵਾਲੀ ਅਦਾਕਾਰਾ ਪ੍ਰਿਅੰਕਾ ਚੋਪੜਾ ਅੱਜ ਗਲੋਬਲ ਸਟਾਰ ਹੈ। ਪਰ ਉਸ ਨੂੰ ਆਪਣੇ ਕਰੀਅਰ ਦੀ ਸ਼ੁਰੂਆਤ 'ਚ ਕਾਫੀ ਸੰਘਰਸ਼ ਵੀ ਕਰਨਾ ਪਿਆ ਸੀ। ਜਿਸ ਦੀ ਘਟਨਾ ਪ੍ਰਿਅੰਕਾ ਦੀ ਡੈਬਿਊ ਫਿਲਮ 'ਅੰਦਾਜ਼' ਦੇ ਨਿਰਮਾਤਾ ਨੇ ਦੱਸੀ ਹੈ।

ਮੁੰਬਈ:ਗਲੋਬਲ ਸਟਾਰ ਪ੍ਰਿਅੰਕਾ ਚੋਪੜਾ ਦੀ ਬਾਲੀਵੁੱਡ ਡੈਬਿਊ ਫਿਲਮ 'ਅੰਦਾਜ਼' ਸੀ। ਅੱਜ ਭਾਵੇਂ ਪ੍ਰਿਅੰਕਾ ਨੂੰ ਬਾਲੀਵੁੱਡ ਤੋਂ ਲੈ ਕੇ ਹਾਲੀਵੁੱਡ ਤੱਕ ਆਪਣੀ ਅਦਾਕਾਰੀ ਲਈ ਤਾਰੀਫਾਂ ਮਿਲ ਰਹੀਆਂ ਹਨ ਪਰ ਇੱਕ ਸਮਾਂ ਸੀ ਜਦੋਂ ਪ੍ਰਿਅੰਕਾ ਨੂੰ ਵੀ ਕੁਝ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਫਿਲਮ 'ਅੰਦਾਜ਼' ਦੇ ਨਿਰਮਾਤਾ ਸੁਨੀਲ ਦਰਸ਼ਨ ਨੇ ਇਸ ਨਾਲ ਜੁੜੀ ਇਕ ਘਟਨਾ ਦੱਸੀ। ਜਦੋਂ ਫਿਲਮ ਦੇ ਇੱਕ ਗੀਤ ਦੇ ਡਾਂਸ ਸਟੈਪ ਪ੍ਰਿਅੰਕਾ ਲਈ ਮੁਸੀਬਤ ਪੈਦਾ ਕਰ ਰਹੇ ਸਨ। ਦਰਅਸਲ ਹਾਲ ਹੀ 'ਚ ਸੁਨੀਲ ਦਰਸ਼ਨ ਨੇ ਖੁਲਾਸਾ ਕੀਤਾ ਸੀ ਕਿ ਪ੍ਰਿਅੰਕਾ ਨੂੰ ਆਪਣੀ ਪਹਿਲੀ ਫਿਲਮ 'ਚ ਬਾਲੀਵੁੱਡ ਡਾਂਸ ਸਿੱਖਣ 'ਚ ਮੁਸ਼ਕਲ ਆਈ ਸੀ।

ਅਦਾਕਾਰਾ ਨੂੰ ਆਪਣੀ ਪਹਿਲੀ ਬਾਲੀਵੁੱਡ ਫਿਲਮ ਅੰਦਾਜ਼ ਦੇ ਗੀਤ 'ਅੱਲ੍ਹਾ ਕਰੇ ਦਿਲ ਨਾ ਲੱਗੇ' ਲਈ ਕੋਰੀਓਗ੍ਰਾਫੀ ਸਿੱਖਣ 'ਚ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਉਸ ਸਮੇਂ ਅਕਸ਼ੈ ਦੀ ਪਤਨੀ ਟਵਿੰਕਲ ਆਪਣੇ ਪਹਿਲੇ ਬੱਚੇ ਨੂੰ ਜਨਮ ਦੇਣ ਵਾਲੀ ਸੀ। ਜਿਸ ਲਈ ਫਿਲਮ ਦੇ ਨਿਰਮਾਤਾ ਨੇ ਉਨ੍ਹਾਂ ਨੂੰ ਇੱਕ ਮਹੀਨੇ ਦਾ ਬ੍ਰੇਕ ਦਿੱਤਾ ਸੀ। ਇਸ ਦੌਰਾਨ ਜਿੱਥੇ ਅਕਸ਼ੈ ਨੇ ਆਪਣੀ ਪਤਨੀ ਅਤੇ ਉਨ੍ਹਾਂ ਦੇ ਨਵਜੰਮੇ ਬੱਚੇ ਦੀ ਦੇਖਭਾਲ ਕੀਤੀ, ਪ੍ਰਿਅੰਕਾ ਨੇ ਇਸ ਸਮੇਂ ਨੂੰ ਡਾਂਸ ਸਿੱਖਣ ਲਈ ਵਰਤਿਆ। ਪ੍ਰਿਅੰਕਾ ਨੂੰ ਜਲਦੀ ਤੋਂ ਜਲਦੀ ਡਾਂਸ ਸਿਖਾਉਣ ਲਈ ਫਿਲਮ ਦੇ ਨਿਰਮਾਤਾ ਸੁਨੀਲ ਦਰਸ਼ਨ ਨੇ ਮਸ਼ਹੂਰ ਕੋਰੀਓਗ੍ਰਾਫਰ ਵੀਰੂ ਕ੍ਰਿਸ਼ਨਨ ਨੂੰ ਹਾਇਰ ਕੀਤਾ ਸੀ।

ਇਕ ਇੰਟਰਵਿਊ 'ਚ ਸੁਨੀਲ ਦਰਸ਼ਨ ਨੇ ਕਿਹਾ 'ਹਾਂ ਅਜਿਹਾ ਹੀ ਹੋਇਆ ਅਤੇ ਉਸੇ ਸਮੇਂ ਅਕਸ਼ੈ ਕੁਮਾਰ ਅਤੇ ਟਵਿੰਕਲ ਦੇ ਬੱਚੇ ਦੀ ਡਿਲੀਵਰੀ ਡੇਟ ਨੇੜੇ ਸੀ। ਅਕਸ਼ੈ ਨੇ ਸੁਝਾਅ ਦਿੱਤਾ ਕਿ ਅਸੀਂ ਇਕ ਮਹੀਨੇ ਲਈ ਬ੍ਰੇਕ ਲੈ ਕੇ ਮੁੰਬਈ ਵਾਪਸ ਆਵਾਂਗੇ। ਉਸੇ ਸਮੇਂ ਮੈਂ ਪ੍ਰਿਅੰਕਾ ਨੂੰ ਡਾਂਸ ਸਿਖਾਉਣ ਲਈ ਵੀਰੂ ਕ੍ਰਿਸ਼ਨਨ ਨੂੰ ਬੁਲਾਇਆ।

ਤੁਹਾਨੂੰ ਦੱਸ ਦਈਏ ਕਿ ਅੰਦਾਜ਼ 2003 ਦੀ ਇੱਕ ਰੋਮਾਂਟਿਕ ਬਾਲੀਵੁੱਡ ਫਿਲਮ ਹੈ, ਜੋ ਰਾਜ ਕੰਵਰ ਦੁਆਰਾ ਨਿਰਦੇਸ਼ਤ ਹੈ ਅਤੇ ਸੁਨੀਲ ਦਰਸ਼ਨ ਦੁਆਰਾ ਨਿਰਮਿਤ ਹੈ। ਇਸ ਫਿਲਮ 'ਚ ਅਕਸ਼ੈ ਕੁਮਾਰ ਅਤੇ ਪ੍ਰਿਅੰਕਾ ਚੋਪੜਾ ਦੇ ਨਾਲ ਲਾਰਾ ਦੱਤਾ ਵੀ ਮੁੱਖ ਭੂਮਿਕਾ 'ਚ ਸੀ। ਇਨ੍ਹਾਂ ਤੋਂ ਇਲਾਵਾ ਫਿਲਮ ਵਿੱਚ ਅਮਨ ਵਰਮਾ, ਜੌਨੀ ਲੀਵਰ ਅਤੇ ਪੰਕਜ ਧੀਰ ਨੇ ਵੀ ਅਹਿਮ ਭੂਮਿਕਾਵਾਂ ਨਿਭਾਈਆਂ ਸਨ।