ਆਜ਼ਾਦ ਨਿਰਦੇਸ਼ਕ ਵਜੋਂ ਨਵੀਂ ਸਿਨੇਮਾ ਪਾਰੀ ਵੱਲ ਵਧਿਆ ਗੁਰਪ੍ਰੀਤ ਗਿੱਲ, ਕਈ ਚਰਚਿਤ ਅਤੇ ਸਫ਼ਲ ਫਿਲਮਾਂ ਨਾਲ ਜੁੜੇ ਰਹਿਣ ਦਾ ਸਿਹਰਾ ਕਰ ਚੁੱਕਾ ਹੈ ਹਾਸਿਲ

ਕਈ ਸਫ਼ਲ ਫਿਲਮਾਂ ਨਾਲ ਜੁੜਨ ਦਾ ਮਾਣ ਹਾਸਿਲ ਕਰ ਚੁੱਕਿਆ ਗੁਰਪ੍ਰੀਤ ਗਿੱਲ ਹੁਣ ਆਜ਼ਾਦ ਨਿਰਦੇਸ਼ਕ ਵਜੋਂ ਆਪਣੀ ਨਵੀਂ ਸਿਨੇਮਾ ਪਾਰੀ ਸ਼ੁਰੂ ਕਰਨ ਜਾ ਰਹੇ ਹਨ।

ਚੰਡੀਗੜ੍ਹ: ਪੰਜਾਬੀ ਫਿਲਮ ਇੰਡਸਟਰੀ ’ਚ ਜਨੂੰਨੀਅਤ ਨਾਲ ਆਪਣਾ ਲੰਮੇਰ੍ਹਾਂ ਤਜ਼ੁਰਬਾ ਹੰਢਾ ਚੁੱਕੇ ਕਈ ਨੌਜਵਾਨ ਮੌਜੂਦਾ ਸਿਨੇਮਾ ਦ੍ਰਿਸ਼ਾਵਲੀ ’ਚ ਮਜ਼ਬੂਤ ਕਰੀਅਰ ਪੈੜ੍ਹਾਂ ਸਿਰਜਦੇ ਨਜ਼ਰੀ ਪੈ ਰਹੇ ਹਨ, ਜਿੰਨ੍ਹਾਂ ਵਿਚ ਹੀ ਆਪਣੇ ਮਾਣਮੱਤੇ ਨਾਂਅ ਦਾ ਸ਼ੁਮਾਰ ਕਰਵਾਉਣ ਵੱਲ ਵੱਧ ਰਿਹਾ ਹੈ ਗੁਰਪ੍ਰੀਤ ਗਿੱਲ, ਜੋ ਆਜ਼ਾਦ ਨਿਰਦੇਸ਼ਕ ਵਜੋਂ ਇਕ ਨਵੀਂ ਅਤੇ ਪ੍ਰਭਾਵੀ ਸਿਨੇਮਾ ਪਾਰੀ ਦਾ ਆਗਾਜ਼ ਕਰਨ ਜਾ ਰਿਹਾ ਹੈ।

ਬਤੌਰ ਸਹਾਇਕ ਐਸੋਸੀਏਟ ਨਿਰਦੇਸ਼ਕ ਦੇ ਨਾਲ-ਨਾਲ ਲਾਈਨ ਨਿਰਮਾਤਾ ਦੇ ਤੌਰ 'ਤੇ ਕਈ ਵੱਡੀਆਂ ਫਿਲਮਾਂ ਕਰ ਚੁੱਕਾ ਇਹ ਹੋਣਹਾਰ ਪੰਜਾਬੀ ਇੰਨ੍ਹੀਂ ਦਿਨ੍ਹੀਂ ਐਸੋਸੀਏਟ ਨਿਰਦੇਸ਼ਕ ਦੇ ਤੌਰ 'ਤੇ ਆਪਣੇ ਪੁਰਾਣੇ ਕਮਿਟਮੈਂਟਸ਼ ਨਾਲ ਜੁੜੀਆਂ ਫਿਲਮਾਂ ਨੂੰ ਆਖਰੀ ਛੋਹਾ ਦੇਣ ਵਿਚ ਜੁਟਿਆ ਹੋਇਆ ਹੈ, ਜਿੰਨ੍ਹਾਂ ਵਿਚੋਂ ਕੁਝ ਦੀ ਸ਼ੂਟਿੰਗ ਪੰਜਾਬ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਤੇਜ਼ੀ ਨਾਲ ਸੰਪੂਰਨ ਕੀਤੀ ਜਾ ਰਹੀ ਹੈ।

ਗੁਰਪ੍ਰੀਤ ਗਿੱਲ

ਮੂਲ ਰੂਪ ਵਿਚ ਪੰਜਾਬ ਦੇ ਜ਼ਿਲ੍ਹਾਂ ਮੋਗਾ ਅਧੀਨ ਆਉਂਦੇ ਪਿੰਡ ਕੋਕਰੀ ਕਲਾਂ ਨਾਲ ਸੰਬੰਧਿਤ ਅਤੇ ਇਕ ਕਿਸਾਨ ਪ੍ਰਤਿਭਾਵਾਨ ਗੁਰਪ੍ਰੀਤ ਦੇ ਹੁਣ ਤੱਕ ਦੇ ਸਫ਼ਰ ਵੱਲ ਝਾਤ ਮਾਰੀ ਜਾਵੇ ਤਾਂ ਉਨ੍ਹਾਂ ਦੁਆਰਾ ਕੀਤੀਆਂ ਫਿਲਮਾਂ ਵਿਚ ਨਿਰਦੇਸ਼ਕ ਅਮਰਦੀਪ ਗਿੱਲ ਦੀ ਸਿੱਪੀ ਗਿੱਲ ਸਟਾਰਰ ‘ਮਰਜਾਣੇ’, ਸਵ. ਦੀਪ ਸਿੱਧੂ ਦੀ ‘ਜ਼ੋਰਾ ਦਾ ਸੈਕੰਡ ਚੈਪਟਰ’ ਤੋਂ ਇਲਾਵਾ ਰਾਜ ਬਰਾੜ ਦੁਆਰਾ ਨਿਰਮਿਤ ਕੀਤੀ ਗਈ ਉਨਾਂ ਦੀ ਆਖ਼ਰੀ ਫਿਲਮ ‘ਆਮ ਆਦਮੀ’, ਨਿਰਦੇਸ਼ਕ ਨਾਲ ਨਿੰਜਾ, ਵਾਮਿਕਾ ਗੱਬੀ ਦੀ 'ਦੂਰਬੀਨ' ਤੋਂ ਇਲਾਵਾ 'ਵੀਰਾਂ ਨਾਲ ਸਰਦਾਰੀ', 'ਵੈਸਟ ਇਜ਼ ਵੈਸਟ', 'ਜਵਾਨੀ ਜਿੰਦਾਬਾਦ', ਲਘੂ ਫਿਲਮਾਂ ‘ਪਾਰਟੀਸਿਪੇਸ਼ਨ’, ‘ਜਸਟਿਸ’, ‘ਸਕਿੱਲ ਕਿਲਜ਼’, ‘ਮੈਂ ਤੇ ਮੈਂ’ ਆਦਿ ਸ਼ਾਮਿਲ ਰਹੀਆਂ ਹਨ।

ਗੁਰਪ੍ਰੀਤ ਗਿੱਲ

ਉਕਤ ਸਫ਼ਰ ਅਧੀਨ ਹੀ ਉਨਾਂ ਵੱਲੋਂ ਲਾਈਨ ਨਿਰਮਾਤਾ ਦੇ ਰੂਪ ਵਿਚ ਕੀਤੀਆਂ ਫਿਲਮਾਂ ਦੀ ਗੱਲ ਕੀਤੀ ਜਾਵੇ ਤਾਂ ਇੰਨ੍ਹਾਂ ਵਿਚ ਸ਼ਾਹਿਦ ਦੀਆਂ ਸਫ਼ਲ ਹਿੰਦੀ ਫਿਲਮਾਂ ‘ਉੜਤਾ ਪੰਜਾਬ’, ‘ਮੌਸਮ’ ਦੇ ਨਾਲ ਨਾਲ ਸੋਹਾ ਅਲੀ ਖ਼ਾਨ ਦੀ ਬਹੁਚਰਚਿਤ ਫਿਲਮ ‘31ਅਕਤੂਬਰ’, ਬੱਬੂ ਮਾਨ ਦੀ ਪੰਜਾਬੀ ਫਿਲਮ 'ਬਾਜ਼', ਮਾਨਵ ਸ਼ਾਹ ਨਿਰਦੇਸ਼ਿਤ ਅਤੇ ਗਗਨ ਕੋਕਰੀ ਦੀ ‘ਲਾਟੂ’ ਅਤੇ ਵੱਡੇ ਸਿਨੇਮਾ ਕੈਨਵਸ ਅਧੀਨ ਫਿਲਮਾਈ ਗਈ ਧਾਰਮਿਕ ਫਿਲਮ ‘ਨਾਨਕ ਸ਼ਾਹ ਫ਼ਕੀਰ’ ਆਦਿ ਸ਼ਾਮਿਲ ਰਹੀਆਂ ਹਨ।

ਗੁਰਪ੍ਰੀਤ ਗਿੱਲ

ਪੰਜਾਬੀ ਅਤੇ ਹਿੰਦੀ ਸਿਨੇਮਾ ਦੇ ਕਈ ਨਾਮਵਰ ਨਿਰਦੇਸ਼ਕਾਂ, ਸਟਾਰਜ਼ ਨਾਲ ਕੰਮ ਕਰਨ ਦਾ ਸਿਹਰਾ ਹਾਸਿਲ ਕਰ ਚੁੱਕੇ ਗੁਰਪ੍ਰੀਤ ਅਨੁਸਾਰ ਫਿਲਮਮੇਕਿੰਗ ਹੋਵੇ ਜਾਂ ਫਿਰ ਸਿਨੇਮਾ ਨਾਲ ਜੁੜਿਆ ਹਰ ਕੰਮ, ਹਰ ਇਕ 'ਤੇ ਪੂਰਾ ਧਿਆਨ ਕੇਂਦਰਿਤ ਕਰਨਾ ਅਤੇ ਕੁਝ ਨਾ ਕੁਝ ਸਿੱਖ ਦੇ ਰਹਿਣਾ ਹਮੇਸ਼ਾ ਉਨ੍ਹਾਂ ਲਈ ਇਕ ਪੈਸ਼ਨ ਵਾਂਗ ਰਿਹਾ ਹੈ, ਜਿਸ ਦੇ ਨਤੀਜੇ ਮੱਦੇਨਜ਼ਰ ਹੀ ਉਸ ਨੂੰ ਹਰ ਫਿਲਮੀ ਕਾਰਜ ਵਿਚ ਹੁਨਰਮੰਦੀ ਵਿਖਾਉਣ ’ਚ ਸਫ਼ਲਤਾ ਮਿਲੀ ਹੈ।

ਹਿੰਦੀ ਅਤੇ ਪੰਜਾਬੀ ਸਿਨੇਮਾ ’ਚ ਅਹਿਮ ਮੁਕਾਮ ਅਤੇ ਪਹਿਚਾਣ ਬਣਾਉਣ ’ਚ ਕਾਮਯਾਬ ਰਹੇ ਗੁਰਪ੍ਰੀਤ ਦੱਸਦੇ ਹਨ ਕਿ ਉਨਾਂ ਦਾ ਪਿਛੋਕੜ੍ਹ ਕਿਸਾਨੀ ਪਰਿਵਾਰ ਨਾਲ ਸੰਬੰਧਤ ਹੈ, ਜਿੰਨ੍ਹਾਂ ਦੀਆਂ ਭਾਵਨਾਵਾਂ ਦੀ ਕਦਰ ਕਰਦਿਆਂ ਉਨਾਂ ਐਮਏਬੀਐੱਡ ਕੀਤੀ ਅਤੇ ਅਧਿਆਪਕ ਵਜੋਂ ਵੀ ਕਾਰਜਸੀਲ ਰਹੇ , ਪਰ ਮਨ ਤਾਂ ਫਿਲਮੀ ਖੇਤਰ ਵਿਚ ਕੁਝ ਕਰ ਗੁਜ਼ਰਣ ਲਈ ਪ੍ਰੇਰਿਤ ਕਰਦਾ ਰਹਿੰਦਾ ਸੀ, ਜਿਸ ਦੇ ਮੱਦੇਨਜ਼ਰ ਆਖਰ ਇਕ ਦਿਨ ਇਸ ਖੇਤਰ ਨੂੰ ਪੂਰੀ ਤਰ੍ਹਾਂ ਅਪਨਾਉਣ ਦਾ ਫ਼ੈਸਲਾ ਲਿਆ, ਜਿੱਥੇ ਹਾਸਿਲ ਹੋਈਆਂ ਪ੍ਰਾਪਤੀਆਂ 'ਤੇ ਅੱਜ ਇਕੱਲੇ ਉਸ ਨੂੰ ਹੀ ਨਹੀਂ, ਬਲਕਿ ਮਾਪਿਆਂ ਨੂੰ ਵੀ ਉਸ ਦੇ ਅਗਾਂਹ ਹੀ ਅਗਾਂਹ ਵਧਦੇ ਜਾ ਰਹੇ ਕਦਮਾਂ 'ਤੇ ਮਾਣ ਮਹਿਸੂਸ ਹੋ ਰਿਹਾ ਹੈ।