ਚੰਡੀਗੜ੍ਹ:ਪੰਜਾਬੀ ਸਿਨੇਮਾ ਸਟਾਰ ਗਿੱਪੀ ਗਰੇਵਾਲ ਵੱਲੋਂ ਆਪਣੇ ਘਰੇਲੂ ਬੈਨਰ ਅਧੀਨ ਬਣਾਈ ਗਈ ‘ਕੈਰੀ ਆਨ ਜੱਟਾ 3’ ਨੂੰ ਸਫ਼ਲ ਬਣਾਉਣ ਲਈ ਆਪਣਾ ਪੂਰਾ ਜ਼ੋਰ ਲਾਇਆ ਜਾ ਰਿਹਾ ਹੈ, ਜਿਸ ਦੇ ਚੱਲਦਿਆਂ ਜਿੱਥੇ ਫਿਲਮ ਨੂੰ ਦੇਸ਼-ਭਰ ਵਿਚ ਚਰਚਾ ਦੇਣ ਲਈ ਉਚੇਚੇ ਯਤਨ ਉਨ੍ਹਾਂ ਵੱਲੋਂ ਕੀਤੇ ਜਾ ਰਹੇ ਹਨ, ਉਥੇ ਨਾਲ ਹੀ ਇੰਨ੍ਹੀਂ ਦਿਨੀਂ ਉਹ ਆਪਣੀ ਕੋ ਸਟਾਰ ਸੋਨਮ ਬਾਜਵਾ ਨਾਲ ਆਸਟ੍ਰੇਲੀਆ ਟੂਰ 'ਤੇ ਪੁੱਜੇ ਹੋਏ ਹਨ।
‘ਹੰਬਲ ਮੋਸ਼ਨ ਪਿਕਚਰਜ਼’ ਅਧੀਨ ਬਣਾਈ ਗਈ ਇਸ ਫਿਲਮ ਦਾ ਨਿਰਦੇਸ਼ਨ ਪੰਜਾਬੀ ਫਿਲਮ ਇੰਡਸਟਰੀ ਦੇ ਉਚਕੋਟੀ ਨਿਰਦੇਸ਼ਕ ਵਜੋਂ ਜਾਣੇ ਜਾਂਦੇ ਸਮੀਪ ਕੰਗ ਦੁਆਰਾ ਕੀਤਾ ਗਿਆ ਹੈ, ਜੋ ਇਸ ਤੋਂ ਪਹਿਲਾਂ ਗਿੱਪੀ ਗਰੇਵਾਲ ਨਾਲ ‘ਕੈਰੀ ਆਨ ਜੱਟਾ’, ‘ਡਬਲ ਦੀ ਟਰੱਬਲ’, ‘ਭਾਜੀ ਇਨ ਪ੍ਰੋਬਲਮ’ ਅਤੇ ਆਗਾਮੀ ‘ਮੌਜਾਂ ਹੀ ਮੌਜਾਂ’ ਜਿਹੀਆਂ ਕਈ ਕਾਮੇਡੀ ਅਤੇ ਸਫ਼ਲ ਫਿਲਮਾਂ ਬਣਾਉਣ ਦਾ ਸਿਹਰਾ ਹਾਸਿਲ ਕਰ ਚੁੱਕੇ ਹਨ।
ਉਕਤ ਪ੍ਰਮੋਸ਼ਨਲ ਲਈ ਇਸ ਫਿਲਮ ਦਾ ਇਕ ਵਿਸ਼ੇਸ਼ ਟ੍ਰੇਲਰ ਲਾਂਚ ਈਵੈਂਟ ਮੁੰਬਈ ਦੇ ਪੀਵੀਆਰ ਜੁਹੂ ਵਿਖੇ ਕਰਵਾਇਆ ਜਾ ਚੁੱਕਾ ਹੈ, ਜਿਸ ਵਿਚ ਗਿੱਪੀ ਗਰੇਵਾਲ ਵੱਲੋਂ ਬਾਲੀਵੁੱਡ ਸਟਾਰ ਆਮਿਰ ਖਾਨ ਨੂੰ ਆਪਣੀ ਨੇੜ੍ਹਤਾ ਦੇ ਚਲਦਿਆਂ ਇਸ ਸਮਾਰੋਹ ਦਾ ਉਚੇਚਾ ਹਿੱਸਾ ਬਣਾਇਆ ਗਿਆ ਹੈ, ਜਿਸ ਦੌਰਾਨ ਮਿਲੀ ਬਹੁ-ਚਰਚਾ ਅਤੇ ਦਰਸ਼ਕਾਂ ਦਾ ਫਿਲਮ ਪ੍ਰਤੀ ਵਧੀ ਖਿੱਚ ਨੂੰ ਵੇਖਦਿਆਂ ਹੁਣ ਇਸੇ ਫਿਲਮ ਦਾ ਗ੍ਰੈਂਡ ਪ੍ਰੀਮੀਅਰ ਵੀ ਮੁੰਬਈ ਵਿਖੇ ਕੀਤਾ ਜਾ ਰਿਹਾ ਹੈ, ਜਿਸ ਵਿਚ ਅਕਸ਼ੈ ਕੁਮਾਰ, ਕਪਿਲ ਸ਼ਰਮਾ ਆਦਿ ਜਿਹੇ ਕਈ ਮੰਨੇ ਪ੍ਰਮੰਨੇ ਸਟਾਰਾਂ ਵੱਲੋਂ ਸ਼ਮੂਲੀਅਤ ਕੀਤੇ ਜਾਣ ਦੀ ਪੂਰੀ ਉਮੀਦ ਹੈ।