ਹੈਦਰਾਬਾਦ: ਹਿੰਦੀ ਫਿਲਮਾਂ ਦੇ ਸਿਤਾਰਿਆਂ ਦਾ ਸਾਊਥ ਸਿਨੇਮਾ ਵੱਲ ਰੁਖ ਅਤੇ ਜੁੜਾਅ ਦਾ ਸਿਲਸਿਲਾ ਲਗਾਤਾਰ ਵਧਦਾ ਜਾ ਰਿਹਾ ਹੈ, ਜਿਸ ਦੀ ਲੜ੍ਹੀ ਵਜੋਂ ਹੁਣ ਇਕ ਹੋਰ ਸ਼ਾਨਦਾਰ ਐਕਟਰ ਇਮਰਾਨ ਹਾਸ਼ਮੀ ਵੀ ਤੇਲਗੂ ਫਿਲਮ ਇੰਡਸਟਰੀ ਵਿਚ ਆਪਣੀ ਨਵੇਂ ਸਿਨੇਮਾ ਸਫ਼ਰ ਦਾ ਆਗਾਜ਼ ਕਰਨ ਜਾ ਰਹੇ ਹਨ, ਜਿੰਨ੍ਹਾਂ ਨੂੰ ਹਾਲੀਆ ਸਫ਼ਲ ਫਿਲਮ ‘ਆਰਆਰਆਰ’ ਦੇ ਨਿਰਮਾਤਾਵਾਂ ਦੁਆਰਾ ਆਪਣੀ ਨਵੀਂ ਫਿਲਮ ‘ਓਜੀ’ ’ਚ ਇਕ ਮਹੱਤਵਪੂਰਨ ਭੂਮਿਕਾ ਲਈ ਚੁਣਿਆ ਗਿਆ ਹੈ।
ਸਾਊਥ ਸਿਨੇਮਾ ਦੀ ਮੰਨੀ ਪ੍ਰਮੰਨੀ ਹਸਤੀ ਨਿਰਦੇਸ਼ਕ ਸੁਜੀਤ ਵੱਲੋਂ ਨਿਰਦੇਸ਼ਿਤ ਕੀਤੀ ਜਾ ਰਹੀ ਇਸ ਗੈਗਸਟਰ ਡਰਾਮਾ ਫਿਲਮ ਐਲਾਨ ਹੁੰਦਿਆਂ ਹੀ ਸੁਰਖੀਆਂ ਦਾ ਹਿੱਸਾ ਬਣਨੀ ਸ਼ੁਰੂ ਹੋ ਗਈ ਹੈ, ਜਿਸ ਦੀ ਨਿਰਮਾਣ ਟੀਮ ਅਨੁਸਾਰ ਇਮਰਾਨ ਹਾਸ਼ਮੀ ਦੀ ਮੌਜੂਦਗੀ ਇਸ ਫਿਲਮ ਨੂੰ ਚਾਰ ਚੰਨ ਲਾਉਣ ਵਿਚ ਅਹਿਮ ਭੂਮਿਕਾ ਨਿਭਾਵੇਗੀ।
ਸਾਊਥ ਸਿਨੇਮਾ ਦੀ ਇਕ ਹੋਰ ਬਹੁਚਰਚਿਤ ਫਿਲਮ ਵਿਚ ਤੇਲਗੂ ਸਿਨੇਮਾ ਦੇ ਉਚਕੋਟੀ ਸਿਤਾਰਿਆਂ ਵਿਚ ਆਉਂਦੇ ਅਰਜੁਨ ਦਾਸ, ਸ੍ਰਿਆ ਰੈਡੀ, ਪਵਨ ਕਲਿਆਣ ਅਤੇ ਪ੍ਰਿਯੰਕਾ ਮੋਹਨ ਲੀਡ ਭੂਮਿਕਾਵਾਂ ਨਿਭਾ ਰਹੇ ਹਨ, ਜਿੰਨ੍ਹਾਂ ਨਾਲ ਇਮਰਾਨ ਕਾਫ਼ੀ ਪ੍ਰਭਾਵਸ਼ਾਲੀ ਕਿਰਦਾਰ ਅਦਾ ਕਰਦੇ ਨਜ਼ਰੀ ਪੈਣਗੇ।
ਤੇਲਗੂ ਫਿਲਮ ਉਦਯੋਗ ਵਿਚ ਆਪਣੀ ਨਵੀਂ ਸਿਨੇਮਾ ਸਫ਼ਰ ਸੰਬੰਧੀ ਗੱਲ ਕਰਦਿਆਂ ਇਮਰਾਨ ਹਾਸ਼ਮੀ ਦੱਸਦੇ ਹਨ ਕਿ ਪੈਨ ਇੰਡੀਆ ਪੱਧਰ 'ਤੇ ਬਣਨ ਜਾ ਰਹੀ ਇਸ ਫਿਲਮ ਦਾ ਹਿੱਸਾ ਬਣਨਾ ਉਨਾਂ ਲਈ ਮਾਣ ਵਾਲੀ ਗੱਲ ਹੈ, ਜਿਸ ਨਾਲ ਉਹ ਆਪਣਾ ਦਰਸ਼ਕ ਦਾਇਰਾ ਹੋਰ ਵਿਸ਼ਾਲ ਹੁੰਦਿਆ ਵੇਖ ਖੁਸ਼ੀ ਅਤੇ ਫ਼ਖਰ ਮਹਿਸੂਸ ਕਰ ਰਹੇ ਹਨ।