ਮੁੰਬਈ: ਜੂਨ 2022 ਵਿੱਚ ਰਾਜਸਥਾਨ ਦੇ ਉਦੈਪੁਰ ਵਿੱਚ ਇੱਕ ਦਰਜੀ ਨਾਲ ਬਹੁਤ ਹੀ ਭਿਆਨਕ ਘਟਨਾ ਵਾਪਰੀ ਸੀ। ਇਸ ਹਾਦਸੇ ਵਿੱਚ ਦੋ ਵਿਅਕਤੀਆਂ ਨੇ ਕਨ੍ਹਈਆ ਲਾਲ ਨਾਮਕ ਦਰਜੀ ਦਾ ਸਿਰ ਵੱਢ ਕੇ ਕਤਲ ਕਰ ਦਿੱਤਾ ਸੀ। ਇਸ ਭਿਆਨਕ ਹਾਦਸੇ ਕਾਰਨ ਪੂਰੇ ਦੇਸ਼ 'ਚ ਸੋਗ ਦੀ ਲਹਿਰ ਦੌੜ ਗਈ ਸੀ। ਇਸ ਹਾਦਸੇ ਦੇ ਇੱਕ ਸਾਲ ਬਾਅਦ 28 ਜੂਨ 2023 ਨੂੰ ਫਿਲਮ ਦਾ ਟੀਜ਼ਰ ਰਿਲੀਜ਼ ਹੋਇਆ ਹੈ। ਇਹ ਫਿਲਮ ਕਨ੍ਹਈਆ ਕਤਲ ਕੇਸ 'ਤੇ ਆਧਾਰਿਤ ਹੈ। ਇਸ ਫਿਲਮ ਨੂੰ ਭਰਤ ਸਿੰਘ ਨੇ ਡਾਇਰੈਕਟ ਕੀਤਾ ਹੈ। ਇਸ ਫਿਲਮ ਦਾ ਟਾਈਟਲ 'ਏ ਟੇਲਰ ਮਰਡਰ ਸਟੋਰੀ' ਰੱਖਿਆ ਗਿਆ ਹੈ। ਹੁਣ ਇਸ ਫਿਲਮ ਦੀ ਪਹਿਲੀ ਝਲਕ ਦਿਖਾਈ ਗਈ ਹੈ ਅਤੇ ਫਿਲਮ ਦਾ ਟੀਜ਼ਰ ਸ਼ੇਅਰ ਕੀਤਾ ਗਿਆ ਹੈ।
ਟੀਜ਼ਰ ਦੇਖਣ ਵਿੱਚ ਬਹੁਤ ਹੀ ਡਰਾਉਣ ਵਾਲਾ ਹੈ, ਹਾਲਾਂਕਿ ਇਸ ਟੀਜ਼ਰ ਵਿੱਚ ਉਸ ਘਟਨਾ ਦਾ ਅਸਲ ਸੀਨ ਨਹੀਂ ਦਿਖਾਇਆ ਗਿਆ ਹੈ, ਪਰ ਇਹ ਟੀਜ਼ਰ ਇੱਕ ਅਜਿਹੀ ਘਟਨਾ ਦੀ ਯਾਦ ਦਿਵਾਉਂਦਾ ਹੈ, ਜਿਸ ਨੂੰ ਸੁਣ ਕੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਜਾਂਦੀ ਹੈ। ਇਸ ਦੇ ਨਾਲ ਹੀ ਕਨ੍ਹਈਆ ਲਾਲ ਦੀ ਮੌਤ ਦੇ ਇਕ ਸਾਲ ਬਾਅਦ ਉਦੈਪੁਰ ਨਗਰ ਨਿਗਮ ਨੇ ਖੂਨਦਾਨ ਕੈਂਪ ਲਗਾਇਆ। ਲੋਕਾਂ ਨੇ ਵੱਡੀ ਗਿਣਤੀ 'ਚ ਪਹੁੰਚ ਕੇ ਖੂਨਦਾਨ ਕੀਤਾ। ਇੰਨਾ ਹੀ ਨਹੀਂ ਮੁੰਬਈ ਤੋਂ ਫਿਲਮ ਦੀ ਟੀਮ ਆਈ, ਜਿਸ ਨੇ ਕਨ੍ਹਈਆ ਲਾਲ ਨੂੰ ਸ਼ਰਧਾਂਜਲੀ ਦਿੱਤੀ ਅਤੇ ਫਿਰ ਖੂਨਦਾਨ ਕੀਤਾ।
ਫਿਲਮ ਕਦੋਂ ਰਿਲੀਜ਼ ਹੋਵੇਗੀ?:ਦੱਸ ਦੇਈਏ ਕਿ ਫਿਲਮ ‘ਏ ਟੇਲਰ ਮਰਡਰ ਸਟੋਰੀ’ ਜਾਨੀ ਫਾਇਰ ਫੌਕਸ ਪ੍ਰਾਈਵੇਟ ਲਿਮਟਿਡ ਵੱਲੋਂ ਬਣਾਈ ਜਾ ਰਹੀ ਹੈ। ਫਿਲਮ ਨਿਰਮਾਤਾ ਜਾਨੀ ਨੇ ਕਿਹਾ ਕਿ ਉਨ੍ਹਾਂ ਨੇ ਕਨ੍ਹਈਆ ਲਾਲ ਦੇ ਵੱਡੇ ਬੇਟੇ ਅਤੇ ਉਨ੍ਹਾਂ ਦੇ ਪਰਿਵਾਰ ਨਾਲ ਗੱਲਬਾਤ ਕੀਤੀ ਹੈ ਅਤੇ ਭਵਿੱਖ ਵਿੱਚ ਵੀ ਜਾਰੀ ਰਹੇਗੀ। ਫਿਲਹਾਲ ਫਿਲਮ ਦਾ ਟੀਜ਼ਰ ਆ ਗਿਆ ਹੈ ਅਤੇ ਟ੍ਰੇਲਰ ਆਉਣ ਵਾਲੇ ਅਕਤੂਬਰ ਮਹੀਨੇ 'ਚ ਰਿਲੀਜ਼ ਕੀਤਾ ਜਾਵੇਗਾ। ਇਸ ਫਿਲਮ ਦੀ ਸ਼ੂਟਿੰਗ 'ਚ ਤਿੰਨ ਮਹੀਨੇ ਲੱਗਣਗੇ ਅਤੇ ਫਿਰ ਫਿਲਮ ਨਵੰਬਰ 'ਚ ਸਿਨੇਮਾਘਰਾਂ 'ਚ ਰਿਲੀਜ਼ ਹੋਵੇਗੀ।
ਕੀ ਸੀ ਪੂਰਾ ਮਾਮਲਾ?:ਤੁਹਾਨੂੰ ਦੱਸ ਦੇਈਏ ਇਹ ਮਾਮਲਾ ਕਾਸ਼ੀ ਵਿਸ਼ਵਨਾਥ ਅਤੇ ਗਿਆਨਵਾਪੀ ਮਸਜਿਦ ਤੋਂ ਸ਼ੁਰੂ ਹੋਇਆ ਸੀ। ਇਸ ਤੋਂ ਬਾਅਦ ਭਾਜਪਾ ਮੈਂਬਰ (ਉਸ ਸਮੇਂ ਤੱਕ) ਨੂਪੁਰ ਸ਼ਰਮਾ ਨੇ ਪੈਗੰਬਰ 'ਤੇ ਵਿਵਾਦਿਤ ਬਿਆਨ ਦੇ ਕੇ ਮੁਸਲਮਾਨਾਂ ਨੂੰ ਭੜਕਾਇਆ ਸੀ ਅਤੇ ਫਿਰ ਇਹ ਵਿਵਾਦ ਹੋਰ ਡੂੰਘਾ ਹੋ ਗਿਆ ਸੀ। ਪੈਗੰਬਰ ਬਾਰੇ ਵਿਵਾਦਤ ਵੀਡੀਓ ਕਨ੍ਹਈਆ ਲਾਲ ਦੀ ਫੇਸਬੁੱਕ ਆਈਡੀ ਤੋਂ ਸ਼ੇਅਰ ਕੀਤੀ ਗਈ ਸੀ, ਜਿਸ ਬਾਰੇ ਉਨ੍ਹਾਂ ਦੇ ਬੇਟੇ ਨੂੰ ਵੀ ਪਤਾ ਨਹੀਂ ਸੀ ਪਰ ਇਸ ਵੀਡੀਓ ਕਾਰਨ ਦੋ ਮੁਸਲਮਾਨ ਵਿਅਕਤੀ ਗਾਹਕ ਬਣ ਕੇ ਕਨ੍ਹਈਆ ਲਾਲ ਦੀ ਦੁਕਾਨ 'ਤੇ ਆਏ। ਕਨ੍ਹਈਆ ਇਨ੍ਹਾਂ ਦੋਵਾਂ ਮੁਸਲਮਾਨਾਂ ਦੇ ਕੱਪੜੇ ਬਣਾਉਣ ਲਈ ਮਾਪ ਲੈ ਰਿਹਾ ਸੀ, ਉਸੇ ਸਮੇਂ ਦੋਵਾਂ ਨੇ ਤੇਜ਼ਧਾਰ ਹਥਿਆਰ ਨਾਲ ਕਨ੍ਹਈਆ ਦਾ ਸਿਰ ਵੱਢ ਕੇ ਧੜ ਤੋਂ ਵੱਖ ਕਰ ਦਿੱਤਾ। ਇਸ ਹਾਦਸੇ ਤੋਂ ਬਾਅਦ ਪੂਰੇ ਦੇਸ਼ 'ਚ ਹੜਕੰਪ ਮੱਚ ਗਿਆ।
