ਲੁਧਿਆਣਾ: ਉਂਝ ਕਹਿਣ ਨੂੰ ਤਾਂ ਐਤਵਾਰ ਨੂੰ ਮੁਕੰਮਲ ਲੌਕਡਊਨ ਹੁੰਦਾ ਹੈ, ਪਰ ਸ਼ਾਇਦ ਅਮੀਰਾਂ ਅਤੇ ਗਰੀਬਾਂ ਲਈ ਸਰਕਾਰ ਦੇ ਵੱਖੋ-ਵੱਖਰੇ ਪੈਮਾਨੇ ਹਨ। ਸਰਕਾਰ ਅਤੇ ਪ੍ਰਸ਼ਾਸਨ ਵਲੋਂ ਨਿਯਮਾਂ ਦੀ ਪਾਲਣਾ ਲਈ ਗਰੀਬਾਂ 'ਤੇ ਧੌਂਸ ਤਾਂ ਪਾਈ ਜਾਂਦੀ ਪਰ ਅਮੀਰ ਘਰਾਂ ਦੇ ਨੌਜਵਾਨਾਂ ਸਮੇਂ ਚੁੱਪੀ ਧਾਰ ਲੈਂਦੀ ਹੈ। ਅਜਿਹੇ ਅਮੀਰਜ਼ਾਦੇ ਨਸ਼ੇ ਦੀ ਹਾਲਤ 'ਚ ਸੜਕਾਂ 'ਤੇ ਲੋਕਾਂ ਨੂੰ ਮੌਤ ਵੰਡਦੇ ਫਿਰਦੇ ਹਨ।
ਲਗ਼ਜ਼ਰੀ ਗੱਡੀਆਂ ਦੀ ਭੇਂਟ ਚੜ੍ਹਿਆ ਨੌਜਵਾਨ, ਮੌਕੇ 'ਤੇ ਹੋਈ ਮੌਤ
ਅਜਿਹਾ ਤਾਜ਼ਾ ਮਾਮਲਾ ਲੁਧਿਆਣਾ ਦੇ ਗਿੱਲ ਨਹਿਰ ਫਲਾਇਓਵਰ ਤੋਂ ਸਾਹਮਣੇ ਆਇਆ ਹੈ, ਜਿਥੇ 2 ਫਾਰਚੂਨਰ ਗੱਡੀਆਂ 'ਚ ਬੈਠੇ ਨੌਜਵਾਨ ਆਪਸ 'ਚ ਰੇਸ ਲਗਾ ਰਹੇ ਸਨ। ਰੇਸ ਲਗਾਉਣ ਸਮੇਂ ਦੋਵੇਂ ਗੱਡੀਆਂ ਬੇਕਾਬੂ ਹੋ ਗਈਆਂ, ਜਿਨਾਂ ਵਿੱਚੋਂ ਇੱਕ ਗਿੱਲ ਨਹਿਰ ਫਲਾਇਓਵਰ 'ਤੇ ਖੰਬੇ 'ਚ ਜਾ ਟਕਰਾਈ ਜਦੋਂ ਕੇ ਦੂਜੀ ਨੇ 2 ਮੋਟਰਸਾਈਕਲ ਸਵਾਰਾਂ ਨੂੰ ਦਰੜ ਦਿੱਤਾ। ਜਿਸ 'ਚ ਇੱਕ ਨੌਜਵਾਨ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਮੌਕੇ 'ਤੇ ਪੁੱਜੀ ਪੁਲਿਸ ਨੇ ਗੱਡੀਆਂ ਨੂੰ ਕਬਜ਼ੇ ਚ ਲੈ ਕੇ ਚਾਲਕਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।