ਚੰਡੀਗੜ੍ਹ: ਕੈਬਿਨੇਟ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦੀ ਸਰਕਾਰੀ ਰਿਹਾਇਸ਼ ਵਿਖੇ ਅੱਜ ਸਵੇਰ ਤੋਂ ਦੁਪਹਿਰ ਤੱਕ ਵਿਧਾਇਕਾਂ ਦੇ ਮਿਲਣ ਦਾ ਸਿਲਸਿਲਾ ਜਾਰੀ ਰਿਹਾ। ਇਸ ਮੌਕੇ ਵਿਧਾਇਕ ਰਮਿੰਦਰ ਆਵਲਾ, ਰਾਜਾ ਵੜਿੰਗ, ਮਦਨ ਲਾਲ ਜਲਾਲਪੁਰ, ਕੁਲਬੀਰ ਜ਼ੀਰਾ ਥੋੜ੍ਹੇ ਸਮੇਂ ਤੱਕ ਬੈਠਕ ਕਰਨ ਤੋਂ ਬਾਅਦ ਚਲਦੇ ਬਣੇ ਤਾਂ ਉੱਥੇ ਹੀ ਤਕਰੀਬਨ ਦੋ ਘੰਟੇ ਤੱਕ ਵਿਧਾਇਕ ਬਰਿੰਦਰਮੀਤ ਪਾਹੜਾ, ਦਰਸ਼ਨ ਬਰਾੜ, ਦਵਿੰਦਰ ਘੁਬਾਇਆ ਅਤੇ ਪ੍ਰੀਤਮ ਕੋਟ ਭਾਈਕੇ ਨੇ ਕੈਬਿਨੇਟ ਮੰਤਰੀ ਨਾਲ ਬੈਠਕ ਕੀਤੀ।
ਹਾਲਾਂਕਿ ਮੀਡੀਆ ਸਾਹਮਣੇ ਰਾਜਾ ਵੜਿੰਗ ਅਤੇ ਜੋਗਿੰਦਰ ਭੋਆ ਨੇ ਹੀ ਗੱਲਬਾਤ ਕੀਤੀ ਪਰ ਬੈਠਕ ਬਾਰੇ ਅਸਲ ਗੱਲ ਦਾ ਜਵਾਬ ਕਿਸੇ ਵੀ ਵਿਧਾਇਕ ਵਲੋਂ ਨਹੀਂ ਦਿੱਤਾ ਗਿਆ। ਇਸ ਮੌਕੇ ਵਿਧਾਇਕ ਜੋਗਿੰਦਰ ਭੋਆ ਨੂੰ ਬੇਅਦਬੀ ਮਾਮਲਿਆਂ ਨੂੰ ਲੈ ਕੇ ਆ ਰਹੀਆਂ ਮੁਸ਼ਕਿਲਾਂ ਬਾਰੇ ਜਦੋਂ ਸਵਾਲ ਕੀਤਾ ਗਿਆ ਤਾਂ ਉਨ੍ਹਾਂ ਨੇ ਸਿਰਫ਼ ਇੰਨਾ ਕਿਹਾ ਕਿ ਉਨ੍ਹਾਂ ਦੇ ਪਠਾਨਕੋਟ ਹਲਕੇ 'ਚ ਜ਼ਿਆਦਾਤਰ ਹਿੰਦੂ ਵੋਟਰ ਹਨ। ਉਨ੍ਹਾਂ ਕਿਹਾ ਕਿ ਬੇਅਦਬੀ ਮਾਮਲੇ ਨੂੰ ਲੈ ਕੇ ਸਿੱਖ ਵੋਟਰ ਵਾਲੀ ਬੈਲਟ 'ਚ ਅਸਰ ਜ਼ਿਆਦਾ ਹੈ।