ਚੰਡੀਗੜ੍ਹ: ਪੰਜਾਬ ਵਿੱਚ ਡੀ.ਜੇ ਪਰ ਅਸ਼ਲੀਲ ਤੇ ਭੜਕਾਊ ਗੀਤ ਵਜਾਉਣ ਵਾਲਿਆਂ ਦੀ ਹੁਣ ਕੋਈ ਖੈਰ ਨਹੀਂ ਹੈ। ਪੰਜਾਬ ਸਰਕਾਰ ਨੇ ਵੱਡਾ ਫੈਸਲਾ ਲੈਂਦਿਆਂ ਅਸ਼ਲੀਲਤਾ, ਸ਼ਰਾਬ, ਬੰਦੂਕਾਂ ਦੇ ਸੱਭਿਆਚਾਰ ਅਤੇ ਭੜਕਾਉਣ ਗੀਤਾਂ ਦੀ ਡੀਜੇ 'ਤੇ ਪਾਬੰਦੀ ਲਾ ਦਿੱਤੀ ਹੈ। ਇਸ ਸਬੰਧੀ ਪੰਜਾਬ ਦੇ ਸਾਰੇ ਜ਼ਿਲ੍ਹਿਆਂ ਦੇ ਐਸ.ਐਸ.ਪੀਜ਼ ਨੂੰ ਆਦੇਸ਼ ਦਿੱਤੇ ਗਏ ਹਨ ਕਿ ਕਿਸੇ ਵੀ ਪ੍ਰੋਗਰਾਮ ਦੌਰਾਨ ਡੀਜੇ 'ਤੇ ਅਜਿਹੇ ਗੀਤ ਨਾ ਵਜਾਉਣੇ ਯਕੀਨੀ ਬਣਾਏ ਜਾਣ।
ਏਡੀਜੀਪੀ ਪੰਜਾਬ ਨੇ ਹੁਕਮ ਪੱਤਰ ਵਿੱਚ ਕਿਹਾ ਹੈ ਕਿ ਮਾਨਯੋਗ ਪੰਜਾਬ ਹਰਿਆਣਾ ਹਾਈਕੋਰਟ ਨੇ ਪੰਜਾਬ ਵਿੱਚ ਕਿਤੇ ਵੀ ਸ਼ਰਾਬ, ਨਸ਼ਿਆਂ ਅਤੇ ਗੈਂਗਸਟਰਾਂ ਨੂੰ ਉਤਸ਼ਾਹਿਤ ਕਰਨ ਵਾਲੇ ਅਸ਼ਲੀਲ ਗੀਤ ਨਾ ਚਲਾਉਣ ਦੇ ਹੁਕਮ ਦਿੱਤੇ ਹਨ। ਪਰ, ਪੰਜਾਬ ਵਿੱਚ ਅੱਜ ਵੀ ਡੀਜੇ ਵਾਲੇ ਅਜਿਹੇ ਮਾੜੇ ਗੀਤ ਹਰ ਪਾਸੇ ਵਜਾ ਰਹੇ ਹਨ।