400 ਦੇ ਕਰੀਬ ਭਾਰਤੀ ਵਾਘਾ ਰਾਹੀਂ ਕਰਨਗੇ ਵਤਨ ਵਾਪਸੀ

ਕੋਰੋਨਾ ਮਹਾਂਮਾਰੀ ਕਾਰਨ ਪਾਕਿਸਤਾਨ ਵਿੱਚ ਫਸੇ ਭਾਰਤੀਆਂ ਵਿੱਚੋਂ 400 ਦੇ ਕਰੀਬ ਭਾਰਤੀ ਅੱਜ ਵਾਘਾ ਸਰਹੱਦ ਰਾਹੀਂ ਵਾਪਸ ਪਰਤ ਰਹੇ ਹਨ। ਵਾਪਸ ਪਰਤਨ ਵਾਲੇ ਭਾਰਤੀ ਵੱਖ-ਵੱਖ ਸੂਬਿਆਂ ਨਾਲ ਸਬੰਧਤ ਹਨ।

ਅੰਮ੍ਰਿਤਸਰ: ਕੋਰੋਨਾ ਮਹਾਂਮਾਰੀ ਕਾਰਨ ਲੱਗੇ ਲੌਕਡਾਊਨ ਕਰਕੇ ਕਈ ਲੋਕ ਆਪਣੇ ਘਰਾਂ ਤੋਂ ਦੂਰ ਫਸੇ ਹੋਏ ਹਨ। ਹੁਣ ਅਨਲੌਕ ਦੇ ਚਲਦੇ ਸਰਕਾਰ ਵੱਲੋਂ ਉਨ੍ਹਾਂ ਨੂੰ ਆਪਣੇ ਘਰਾਂ ਵਿੱਚ ਭੇਜਣ ਦਾ ਸਿਲਸਿਲਾ ਜਾਰੀ ਹੈ। ਇਸੇ ਤਹਿਤ ਪਾਕਿਸਤਾਨ ਤੋਂ 400 ਭਾਰਤੀ ਅੱਜ ਵਾਘਾ ਰਾਹੀਂ ਵਤਨ ਵਾਪਸੀ ਕਰ ਰਹੇ ਹਨ।

ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਵਾਘਾ ਸਰਹੱਦ 'ਤੇ ਏਐਸਆਈ ਅਰੁਣ ਕੁਮਾਰ ਨੇ ਦੱਸਿਆ ਕਿ ਅੱਜ ਪਾਕਿਸਤਾਨ ਵਿੱਚ ਫਸੇ ਨਾਗਰਿਕਾਂ ਨੂੰ ਵਾਪਸ ਭਾਰਤ ਭੇਜਿਆ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਲੌਕਡਾਊਨ ਕਾਰਨ ਉਨ੍ਹਾਂ ਨੂੰ ਨੂਰੀ ਵੀਜ਼ਾ ਰਾਹੀਂ ਐਕਸਟੈਂਸ਼ਨ ਦਿੱਤੀ ਗਈ ਸੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਪਰਤ ਰਹੇ ਲੋਕਾਂ ਦੀ ਸਰਹੱਦ 'ਤੇ ਹੀ ਪੰਜਾਬ ਦੇ ਸਿਹਤ ਵਿਭਾਗ ਵੱਲੋਂ ਜਾਂਚ ਕੀਤੀ ਜਾਵੇਗੀ ਅਤੇ ਜਾਂਚ ਉਪਰੰਤ 72 ਘੰਟਿਆਂ ਦੀ ਵੈਧਤਾ ਨਾਲ ਉਨ੍ਹਾਂ ਨੂੰ ਉਨ੍ਹਾਂ ਦੇ ਰਾਜਾਂ ਵਿੱਚ ਭੇਜਿਆ ਜਾਵੇਗਾ।

ਇਸ ਦੇ ਨਾਲ ਹੀ ਉਨ੍ਹਾਂ ਦੱਸਿਆ ਕਿ ਵਾਪਸ ਆ ਰਹੇ ਭਾਰਤੀਆਂ ਵਿੱਚੋਂ ਪੰਜਾਬ ਦੇ 4, ਛੱਤੀਸਗੜ੍ਹ ਦੇ 39, ਦਿੱਲੀ ਦੇ 42, ਗੋਆ ਦਾ 1, ਗੁਜਰਾਤ ਦੇ 47, ਹਰਿਆਣਾ ਦੇ 20, ਜੰਮੂ-ਕਸ਼ਮੀਰ ਦੇ 3, ਕਰਨਾਟਕ ਦਾ 1, ਮੱਧ ਪ੍ਰਦੇਸ਼ ਦਾ 1, ਮਹਾਰਾਸ਼ਟਰ ਦੇ 55, ਰਾਜਸਥਾਨ ਦੇ 4, ਤੇਲੰਗਾਨਾ ਦਾ 1, ਉੱਤਰ ਪ੍ਰਦੇਸ਼ ਦੇ 23, ਉੱਤਰਾਖੰਡ ਦਾ 1, ਪੱਛਮੀ ਬੰਗਾਲ ਦੇ 9 ਹਨ।