ਕੋਵਿਡ-19: ਭਾਰਤੀ ਰੇਲਵੇ ਨੇ ਪਲੇਟਫ਼ਾਰਮ ਟਿਕਟ 'ਚ ਕੀਤਾ ਇਜ਼ਾਫ਼ਾ, 10 ਤੋਂ ਵਧਾ ਕੇ ਕੀਤੀ 50 ਰੁਪਏ

ਭੀੜ ਵਾਲੇ ਰੇਲਵੇ ਸਟੇਸ਼ਨਾਂ ਤੋਂ ਭੀੜ ਨੂੰ ਘਟਾਉਣ ਦੇ ਲਈ ਭਾਰਤੀ ਰੇਲਵੇ ਨੇ ਪਹਿਲ ਕਦਮੀ ਕਰਦਿਆਂ ਪਲੇਟਫ਼ਾਰਮ ਟਿਕਟ 10 ਰੁਪਏ ਤੋਂ ਵਧਾ ਕੇ 50 ਰੁਪਏ ਕਰ ਦਿੱਤੀ ਹੈ।

ਨਵੀਂ ਦਿੱਲੀ : ਕੋਰੋਨਾ ਵਾਇਰਸ ਦਾ ਕਹਿਰ ਹਰ ਪਾਸੇ ਪਸਰ ਚੁੱਕਿਆ ਹੈ। ਭਾਰਤ ਸਰਕਾਰ ਨੇ ਲੋਕਾਂ ਨੂੰ ਇਸ ਤੋਂ ਬਚਾਉਣ ਦੇ ਲਈ ਸਾਰੇ ਸਕੂਲਾਂ, ਕਾਲਜਾਂ, ਸਿਨੇਮਾ-ਹਾਲ, ਮਾਲ ਅਤੇ ਹੋਰ ਭੀੜ-ਭੜੱਕੇ ਵਾਲੇ ਇਲਾਕਿਆਂ ਨੂੰ ਬੰਦ ਰੱਖਣ ਦੇ ਹੁਕਮ ਦਿੱਤੇ ਹਨ।

ਉੱਥੇ ਹੀ ਅੱਜ ਰੇਲਵੇ ਮੰਤਰੀ ਪੀਊਸ਼ ਗੋਇਲ ਨੇ ਰਾਜ ਸਭਾ ਸੈਸ਼ਨ ਦੌਰਾਨ ਰੇਲਵੇ ਸਟੇਸ਼ਨਾਂ ਉੱਤੇ ਭੀੜ ਨੂੰ ਘਟਾਉਣ ਦੇ ਲਈ ਪਲੇਟਫ਼ਾਰਮ ਟਿਕਟ ਵਿੱਚ ਇਜ਼ਾਫ਼ਾ ਕੀਤਾ ਹੈ। ਤੁਹਾਨੂੰ ਦੱਸ ਦਈਏ ਕਿ ਜੋ ਟਿਕਟ ਪਹਿਲਾਂ 10 ਰੁਪਏ ਦੀ ਸੀ, ਉਹ ਹੁਣ 50 ਰੁਪਏ ਦੀ ਕਰ ਦਿੱਤੀ ਗਈ ਹੈ, ਤਾਂ ਕਿ ਰੇਲਵੇ ਸਟੇਸ਼ਨਾਂ ਉੱਤੇ ਜ਼ਿਆਦਾ ਭੀੜ ਇਕੱਠੀ ਨਾ ਹੋ ਸਕੇ।

ਪੱਛਮੀ ਰੇਲਵੇ ਸਟੇਸ਼ਨ ਦੇ ਅਧੀਨ 6 ਡਵਿਜ਼ਨ ਆਉਂਦੇ ਹਨ ਜਿੰਨ੍ਹਾਂ ਵਿੱਚ ਮੁੰਬਈ, ਵੜੋਦਰਾ, ਰਤਲਾਮ, ਭਾਵਨਗਰ, ਅਹਿਮਦਾਬਾਦ ਅਤੇ ਰਾਜਕੋਟ ਹਨ। ਇੰਨ੍ਹਾਂ ਸਭ ਡਵਿਜ਼ਨ ਨੂੰ ਮਿਲਾ ਕੇ ਕੁੱਲ 250 ਸਟੇਸ਼ਨ ਹਨ।

ਇਸ ਤੋਂ ਇਲਾਵਾ ਮੱਧ ਰੇਲਵੇ ਨੇ ਵੀ ਪਲੇਟ ਫ਼ਾਰਮ ਟਿਕਟ ਦੀ ਕੀਮਤ 50 ਰੁਪਏ ਕਰ ਦਿੱਤੀ ਹੈ। ਕੇਂਦਰੀ ਰੇਲਵੇ ਵਿੱਚ ਨਾਗਪੁਰ, ਮੁੰਬਈ ਦਾ ਸੀਐੱਸਟੀ, ਭੁਸਾਵਲ, ਪੂਣੇ ਅਤੇ ਸੋਲਾਪੁਰ ਆਉਂਦੇ ਹਨ।