ਦੇਵਨਹੱਲੀ (ਬੰਗਲੌਰ ਦਿਹਾਤੀ): ਕਰਨਾਟਕ ਦੇ ਬੈਂਗਲੁਰੂ ਗ੍ਰਾਮੀਣ ਖੇਤਰ 'ਚ ਇਕ ਘਟਨਾ ਸਾਹਮਣੇ ਆਈ ਹੈ। ਜਿਸ 'ਚ ਇਕ ਲੜਕੀ 'ਤੇ ਜਹਾਜ਼ ਦੇ ਟਾਇਲਟ 'ਚ ਸਿਗਰਟ ਪੀਣ ਦਾ ਇਲਜ਼ਾਮ ਲੱਗਾ ਹੈ ਅਤੇ ਇਸ ਨਾਲ ਜਹਾਜ਼ ਦੇ ਅੰਦਰ ਹਫੜਾ-ਦਫੜੀ ਮਚ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਘਟਨਾ 5 ਮਾਰਚ ਨੂੰ ਸਵੇਰੇ 9:50 'ਤੇ ਕੋਲਕਾਤਾ ਤੋਂ ਬੈਂਗਲੁਰੂ ਆ ਰਹੀ ਇੰਡੀਗੋ ਦੀ ਫਲਾਈਟ 'ਚ ਵਾਪਰੀ, ਹਾਲਾਂਕਿ ਇਹ ਘਟਨਾ ਕਾਫੀ ਦੇਰ ਨਾਲ ਸਾਹਮਣੇ ਆਈ ਹੈ।
ਏਅਰਲਾਈਨ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਇਹ ਘਟਨਾ ਇੰਡੀਗੋ ਦੀ ਫਲਾਈਟ 6E716 'ਚ ਵਾਪਰੀ। ਘਟਨਾ ਦਾ ਪਤਾ ਲੱਗਦਿਆਂ ਹੀ ਸੁਰੱਖਿਆ ਕਰਮੀਆਂ ਨੇ ਪੱਛਮੀ ਬੰਗਾਲ ਦੀ ਰਹਿਣ ਵਾਲੀ ਇਕ ਲੜਕੀ ਨੂੰ ਇਸ ਸਬੰਧ ਵਿਚ ਹਿਰਾਸਤ ਵਿਚ ਲੈ ਲਿਆ। ਦੱਸਿਆ ਜਾ ਰਿਹਾ ਹੈ ਕਿ ਇੰਡੀਗੋ ਦੀ ਫਲਾਈਟ ਬੈਂਗਲੁਰੂ ਦੇ ਕੇਮਪੇਗੌੜਾ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਉਤਰਣ ਤੋਂ ਅੱਧਾ ਘੰਟਾ ਪਹਿਲਾਂ ਜਹਾਜ਼ 'ਚ ਬੈਠੀ ਇਕ ਲੜਕੀ ਉਸ ਦੇ ਟਾਇਲਟ 'ਚ ਗਈ ਅਤੇ ਉਥੇ ਸਿਗਰਟ ਪੀਣ ਲੱਗ ਗਈ।