ਨਵੀਂ ਦਿੱਲੀ:ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 'ਪਰੀਕਸ਼ਾ ਪੇ ਚਰਚਾ' ਪ੍ਰੋਗਰਾਮ 'ਚ ਤਾਲਕਟੋਰਾ ਸਟੇਡੀਅਮ ਵਿੱਚ ਚਲ ਰਿਹਾ ਹੈ। ਪੀਐਮ ਮੋਦੀ 'ਪਰੀਕਸ਼ਾ ਪੇ ਚਰਚਾ' ਕਰ ਰਹੇ ਹਨ। ਚਰਚਾ ਦੀ ਸ਼ੁਰੂਆਤ ਕਰਦੇ ਹੋਏ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ 'ਪਰੀਕਸ਼ਾ ਪੇ ਚਰਚਾ' ਮੇਰੀ ਵੀ ਪ੍ਰੀਖਿਆ ਹੈ ਅਤੇ ਦੇਸ਼ ਦੇ ਕਰੋੜਾਂ ਵਿਦਿਆਰਥੀ ਮੇਰੀ ਪ੍ਰੀਖਿਆ ਲੈ ਰਹੇ ਹਨ। ਮੈਨੂੰ ਇਹ ਇਮਤਿਹਾਨ ਦੇਣ ਦਾ ਮਜ਼ਾ ਆਉਂਦਾ ਹੈ। ਪਰਿਵਾਰਾਂ ਦਾ ਆਪਣੇ ਬੱਚਿਆਂ ਤੋਂ ਉਮੀਦਾਂ ਰੱਖਣਾ ਸੁਭਾਵਿਕ ਹੈ, ਪਰ ਜੇਕਰ ਇਹ ਸਿਰਫ਼ ਸਮਾਜਿਕ ਰੁਤਬਾ ਕਾਇਮ ਰੱਖਣ ਲਈ ਹੋਵੇ, ਤਾਂ ਇਹ ਖ਼ਤਰਨਾਕ ਹੋ ਜਾਂਦਾ ਹੈ।
ਮਾਂ ਕੋਲੋਂ ਸਿੱਖੋ ਮੈਨੇਜਮੈਂਟ : ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਅਸੀਂ ਆਪਣਾ ਜ਼ਿਆਦਾਤਰ ਸਮਾਂ ਆਪਣੀ ਪਸੰਦ ਦੀਆਂ ਚੀਜ਼ਾਂ ਨਾਲ ਬਿਤਾਉਂਦੇ ਹਾਂ। ਫਿਰ ਬਚੇ ਹੋਏ ਵਿਸ਼ਿਆਂ ਦਾ ਭਾਰ ਵਧ ਜਾਂਦਾ ਹੈ। ਅਜਿਹੀ ਸਥਿਤੀ ਵਿੱਚ, ਸਭ ਤੋਂ ਮੁਸ਼ਕਲ ਵਿਸ਼ਾ ਪਹਿਲਾਂ ਅਤੇ ਉਸ ਤੋਂ ਤੁਰੰਤ ਬਾਅਦ ਸਭ ਤੋਂ ਵੱਧ ਪਸੰਦ ਕੀਤਾ ਜਾਣ ਵਾਲਾ ਵਿਸ਼ਾ, ਇੱਕ ਤੋਂ ਬਾਅਦ ਇੱਕ ਪਸੰਦ ਅਤੇ ਨਾ ਪਸੰਦ ਦੇ ਵਿਸ਼ਿਆਂ ਨੂੰ ਸਮਾਂ ਦਿਓ। ਉਨ੍ਹਾਂ ਕਿਹਾ ਕਿ ਸਿਰਫ਼ ਇਮਤਿਹਾਨ ਲਈ ਹੀ ਨਹੀਂ, ਸਾਨੂੰ ਜ਼ਿੰਦਗੀ ਦੇ ਹਰ ਪੜਾਅ 'ਤੇ ਸਮੇਂ ਦੇ ਪ੍ਰਬੰਧਨ ਪ੍ਰਤੀ ਸੁਚੇਤ ਰਹਿਣਾ ਚਾਹੀਦਾ ਹੈ।
ਅਜਿਹੀ ਸਮਾਂ ਸਾਰਣੀ ਬਣਾਓ, ਜਿਸ ਵਿੱਚ ਪਹਿਲਾਂ ਉਸ ਵਿਸ਼ੇ ਨੂੰ ਸਮਾਂ ਦਿਓ, ਜੋ ਤੁਹਾਨੂੰ ਘੱਟ ਪਸੰਦ ਹੈ। ਫਿਰ ਉਸ ਵਿਸ਼ੇ ਨੂੰ ਸਮਾਂ ਦਿਓ, ਜੋ ਤੁਹਾਨੂੰ ਵੱਧ ਪਸੰਦ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ, ਕੀ ਤੁਸੀਂ ਕਦੇ ਆਪਣੀ ਮਾਂ ਦੇ ਕੰਮ ਨੂੰ ਦੇਖਿਆ ਹੈ? ਮਾਂ ਦਿਨ ਦੇ ਹਰ ਕੰਮ ਦਾ ਸਮਾਂ ਪ੍ਰਬੰਧਨ ਵਧੀਆ ਤਰੀਕੇ ਨਾਲ ਕਰਦੀ ਹੈ। ਮਾਂ ਕੋਲ ਵੱਧ ਤੋਂ ਵੱਧ ਕੰਮ ਹੁੰਦਾ ਹੈ, ਪਰ ਉਸ ਦਾ ਸਮੇਂ ਦਾ ਪ੍ਰਬੰਧ ਇੰਨਾ ਵਧੀਆ ਹੈ ਕਿ ਹਰ ਕੰਮ ਸਮੇਂ ਸਿਰ ਹੋ ਜਾਂਦਾ ਹੈ।
ਪ੍ਰੀਖਿਆ 'ਚ ਨਕਲ ਕਰਨ ਤੋਂ ਬਚਣ ਲਈ ਪ੍ਰਧਾਨ ਮੰਤਰੀ ਦਾ ਮੰਤਰ:
ਪੀਐੱਮ ਨੇ ਕਿਹਾ ਕਿ ਕੁਝ ਅਜਿਹੇ ਅਧਿਆਪਕ ਹਨ, ਜੋ ਟਿਊਸ਼ਨ ਪੜ੍ਹਾਉਂਦੇ ਹਨ। ਉਹ ਚਾਹੁੰਦੇ ਹਨ ਕਿ ਉਨ੍ਹਾਂ ਦੇ ਵਿਦਿਆਰਥੀ ਚੰਗੇ ਅੰਕ ਪ੍ਰਾਪਤ ਕਰਨ। ਇਸ ਲਈ ਉਹ ਨਕਲ ਵੱਲ ਨੂੰ ਪ੍ਰੇਰਦੇ ਹਨ। ਪੀਐਮ ਨੇ ਕਿਹਾ ਕਿ ਜੇਕਰ ਵਿਦਿਆਰਥੀ ਪੜ੍ਹਾਈ ਲਈ ਉਨੀਂ ਹੀ ਦਿਲਚਸਪੀ ਦਿਖਾਉਣ, ਜਿੰਨੀ ਕਿ ਨਕਲ ਲਈ ਦਿਖਾਉਂਦੇ ਹਨ, ਤਾਂ ਇਸ ਦੀ ਕੋਈ ਲੋੜ ਨਹੀਂ ਪਵੇਗੀ। ਪ੍ਰਧਾਨ ਮੰਤਰੀ ਨੇ ਕਿਹਾ, ਹੁਣ ਸਮਾਂ ਆ ਗਿਆ ਹੈ ਕਿ ਹਰ ਕਦਮ 'ਤੇ ਪ੍ਰੀਖਿਆਵਾਂ ਦੇਣੀਆਂ ਪੈਣਗੀਆਂ। ਇੱਕ ਜਾਂ ਦੋ ਇਮਤਿਹਾਨਾਂ ਵਿੱਚ ਨਕਲ ਕਰਕੇ ਜ਼ਿੰਦਗੀ ਨਹੀਂ ਬਣਾਈ ਜਾ ਸਕਦੀ। ਇਸ ਲਈ ਇਹ ਸਮਝਣ ਦੀ ਲੋੜ ਹੈ ਕਿ ਭਾਵੇਂ ਨਕਲ ਕਰਕੇ ਤੁਸੀਂ ਹੁਣ ਤਾਂ ਅੱਗੇ ਵਧ ਜਾਓਗੇ, ਪਰ ਬਾਅਦ ਵਿੱਚ ਜ਼ਿੰਦਗੀ ਵਿੱਚ ਫਸ ਜਾਓਗੇ।
ਪ੍ਰਧਾਨ ਮੰਤਰੀ ਨੇ ਬੱਚਿਆਂ ਨੂੰ ਕਿਹਾ ਕਿ ਭਾਵੇਂ ਕੋਈ ਨਕਲ ਕਰਕੇ ਤੁਹਾਡੇ ਨਾਲੋਂ ਕੁਝ ਵੱਧ ਅੰਕ ਪ੍ਰਾਪਤ ਕਰ ਲਵੇ, ਇਹ ਤੁਹਾਡੇ ਲਈ ਜੀਵਨ ਵਿੱਚ ਰੁਕਾਵਟ ਨਹੀਂ ਬਣ ਸਕਦਾ। ਆਪਣੀ ਅੰਦਰੂਨੀ ਤਾਕਤ 'ਤੇ ਭਰੋਸਾ ਕਰੋ। ਉਨ੍ਹਾਂ ਕਿਹਾ ਕਿ ਅਸੀ ਇਹ ਸੋਚਦੇ ਹਾਂ ਕਿ ਪ੍ਰੀਖਿਆ ਹੋ ਗਈ, ਤਾਂ ਜ਼ਿੰਦਗੀ ਵੀ ਬੀਤ ਗਈ, ਪਰ ਇਹ ਸੋਚ ਸਹੀ ਨਹੀਂ ਹੈ। ਕਿਉਂਕਿ, ਜੀਵਨ ਕਦੇ ਇਕ ਸਟੇਸ਼ਨ ਉੱਤੇ ਨਹੀਂ ਰੁੱਕਦਾ। ਜੀਵਨ ਅੱਗੇ ਚੱਲਦੇ ਰਹਿਣ ਦਾ ਨਾਮ ਹੈ।
ਅਲੋਚਨਾ ਕਰਨ ਵਾਲਾ ਕੌਣ :
ਪੀਐਮ ਮੋਦੀ ਨੇ ਕਿਹਾ ਕਿ ਆਲੋਚਨਾ ਕਰਨ ਵਾਲਾ ਕੌਣ ਹੈ ਇਹ ਜਾਣਨਾ ਜ਼ਰੂਰੀ ਹੈ, ਜੋ ਆਪਣਾ ਹੁੰਦਾ ਹੈ, ਤੁਸੀਂ ਉਸ ਨੂੰ ਪਾਜ਼ੀਟਿਵ ਲੈਂਦੇ ਹੋ, ਪਰ ਜੋ ਤੁਹਾਨੂੰਪਸੰਦ ਨਹੀਂ ਹੈ, ਉਹ ਜੇਕਰ ਕੁਝ ਕਹਿ ਵੀ ਦੇਵੇ ਤਾਂ ਤੁਹਾਨੂੰ ਗੁੱਸਾ ਆ ਜਾਂਦਾ ਹੈ। ਆਲੋਚਨਾ ਕਰਨ ਵਾਲੇ ਆਦਤ ਤੋਂ ਮਜ਼ਬੂਰ ਕਰਦੇ ਰਹਿਣਗੇ, ਇਸ ਲਈ ਅਜਿਹਾ ਕਰਨ ਵਾਲਿਆਂ ਨੂੰ ਇਕ ਪਾਸੇ ਕਰੋ, ਕਿਉਂਕਿ ਉਨ੍ਹਾਂ ਦੇ ਇਰਾਦੇ ਕੁਝ ਹੋਰ ਹੁੰਦੇ ਹਨ।