ਕਾਂਕੇਰ: ਪੁਲਿਸ ਵੱਲੋਂ ਚਲਾਏ ਜਾ ਰਹੇ ਆਪ੍ਰੇਸ਼ਨ ਤੋਂ ਘਬਰਾ ਕੇ ਨਕਸਲੀ ਆਪਣੀ ਹੋਂਦ ਨੂੰ ਬਰਕਰਾਰ ਰੱਖਣ ਲਈ ਛੋਟੀਆਂ-ਮੋਟੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਰਹੇ ਹਨ। ਅਜਿਹੀ ਹੀ ਇਕ ਘਟਨਾ 'ਚ ਬੁੱਧਵਾਰ ਨੂੰ ਇਕ ਪਿੰਡ ਵਾਸੀ ਦੀ ਮੌਤ ਹੋ ਗਈ, ਜਦਕਿ ਇਕ ਹੋਰ ਜ਼ਖਮੀ ਹੋ ਗਿਆ। ਦਰਅਸਲ, ਨਕਸਲੀਆਂ ਨੇ ਇਕ ਇੰਪਰੂਵਾਈਜ਼ਡ ਐਕਸਪਲੋਸਿਵ ਡਿਵਾਈਸ (ਆਈਈਡੀ) ਲਗਾਇਆ ਸੀ, ਜਿਸ ਵਿਚ ਧਮਾਕਾ ਹੋਣ ਕਾਰਨ ਪਿੰਡ ਵਾਸੀ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਮ੍ਰਿਤਕ ਦੀ ਉਮਰ 27 ਸਾਲ ਦੱਸੀ ਜਾ ਰਹੀ ਹੈ।
ਧਮਾਕੇ ਦੀ ਲਪੇਟ 'ਚ ਆਏ ਦੋ ਲੋਕ : ਕਾਂਕੇਰ ਦੇ ਪੁਲਿਸ ਸੁਪਰਡੈਂਟ ਸ਼ਲਭ ਸਿਨਹਾ ਨੇ ਕਿਹਾ ਕਿ "ਮੁਢਲੀ ਜਾਣਕਾਰੀ ਦੇ ਅਨੁਸਾਰ, ਇਹ ਘਟਨਾ ਸਵੇਰੇ ਕੋਰੇਰ ਥਾਣਾ ਖੇਤਰ ਦੇ ਭੈਂਸਗਾਓਂ ਦੇ ਨੇੜੇ ਵਾਪਰੀ। ਦੋ ਲੋਕ ਗਲਤੀ ਨਾਲ ਵਿਸਫੋਟਕ ਯੰਤਰ ਨਾਲ ਟਕਰਾ ਗਏ ਅਤੇ ਇਸ ਆਈਡੀ ਸਮੱਗਰੀ ਵਿੱਚ ਧਮਾਕਾ ਹੋ ਗਿਆ। ਇਸ ਨਕਸਲਵਾਦੀ ਧਮਾਕੇ ਵਿੱਚ ਇੱਕ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦਕਿ ਦੂਜੇ ਨੂੰ ਮਾਮੂਲੀ ਸੱਟਾਂ ਲੱਗੀਆਂ। ਮ੍ਰਿਤਕ ਦੀ ਪਛਾਣ ਬੀਰੇਸ਼ ਮੰਡਵੀ ਵਜੋਂ ਹੋਈ ਹੈ।
ਇਲਾਕੇ 'ਚ ਤਲਾਸ਼ੀ ਮੁਹਿੰਮ ਸ਼ੁਰੂ:ਪੁਲਿਸ ਸੁਪਰਡੈਂਟ ਸ਼ਲਭ ਸਿਨਹਾ ਨੇ ਕਿਹਾ ਕਿ "ਨਕਸਲੀਆਂ ਦਾ ਪਤਾ ਲਗਾਉਣ ਲਈ ਇਲਾਕੇ 'ਚ ਤਲਾਸ਼ੀ ਮੁਹਿੰਮ ਸ਼ੁਰੂ ਕਰ ਦਿੱਤੀ ਗਈ ਹੈ।" ਦਰਅਸਲ, ਇਲਾਕੇ ਵਿੱਚ ਪੁਲਿਸ ਦੀ ਵੱਧਦੀ ਗਸ਼ਤ ਅਤੇ ਸਖ਼ਤੀ ਤੋਂ ਨਕਸਲੀ ਡਰੇ ਹੋਏ ਹਨ, ਜਿਸ ਨੂੰ ਦੂਰ ਕਰਨ ਲਈ ਉਹ ਛੋਟੀਆਂ-ਮੋਟੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਕੇ ਆਪਣੀ ਮੌਜੂਦਗੀ ਦਰਜ ਕਰਵਾਉਂਦੇ ਹਨ। ਹਾਲਾਂਕਿ, ਉਸ ਦੇ ਹਰ ਹਮਲੇ ਦਾ ਪੁਲਿਸ ਫੋਰਸ ਵੱਲੋਂ ਢੁੱਕਵਾਂ ਜਵਾਬ ਦਿੱਤਾ ਜਾਂਦਾ ਹੈ।
IED ਕੀ ਹੈ ਅਤੇ ਨਕਸਲੀ ਇਸਨੂੰ ਕਿਉਂ ਵਰਤਦੇ ਹਨ: Improvised Explosive Device (IED) ਇੱਕ ਇਮਪ੍ਰੋਵਾਈਜ਼ਡ ਬੰਬ ਹੈ। ਅੱਤਵਾਦੀ ਅਤੇ ਨਕਸਲੀ ਇਸ ਦੀ ਵਰਤੋਂ ਵੱਡੇ ਪੱਧਰ 'ਤੇ ਕਰਦੇ ਹਨ। ਜਿਵੇਂ ਹੀ ਇਸ 'ਚ ਧਮਾਕਾ ਹੁੰਦਾ ਹੈ, ਤੁਰੰਤ ਮੌਕੇ 'ਤੇ ਅੱਗ ਲੱਗ ਜਾਂਦੀ ਹੈ, ਕਿਉਂਕਿ ਇਹ ਸਿਰਫ ਵਿਸਫੋਟਕ ਪਦਾਰਥਾਂ ਦੇ ਬਣੇ ਹੁੰਦੇ ਹਨ। ਨਕਸਲੀ ਇਸ ਨੂੰ ਉਨ੍ਹਾਂ ਇਲਾਕਿਆਂ 'ਚ ਸੜਕ ਕਿਨਾਰੇ ਰੱਖ ਦਿੰਦੇ ਹਨ, ਜਿੱਥੇ ਪੁਲਸ ਜਾਂ ਫੌਜ ਮੌਜੂਦ ਹੁੰਦੀ ਹੈ, ਤਾਂ ਕਿ ਜਿਵੇਂ ਹੀ ਇਸ 'ਤੇ ਪੈਰ ਪਵੇ ਜਾਂ ਗੱਡੀ ਚੜ੍ਹ ਜਾਵੇ ਤਾਂ ਇਸ ਦਾ ਧਮਾਕਾ ਹੋ ਜਾਵੇ। ਦੱਸ ਦਈਏ ਬੀਤੇ ਸਮੇਂ ਅੰਦਰ ਛੱਤਸੀਗੜ੍ਹ ਦੇ ਅੰਦਰ ਨਕਸਲੀਆਂ ਨੇ ਬਹੁਤ ਸਾਰੇ ਖਤਰਨਾਕ ਹਮਲੇ ਕੀਤੇ ਹਨ ਜਿਨ੍ਹਾਂ ਵਿੱਚ ਸੈਂਕੜੇ ਸੀਆਰਪੀਐੱਫ ਦੇ ਜਵਾਨ ਸ਼ਹੀਦ ਹੋ ਚੁੱਕੇ ਹਨ। ਇਸ ਤੋਂ ਇਲਾਵਾ ਬਹੁਤ ਸਾਰੀਆਂ ਪੁਲਿਸ ਦੀਆਂ ਜਵਾਬੀ ਕਾਰਵਾਈਆਂ ਵਿੱਚ ਨਕਸਲੀਆਂ ਨੂੰ ਵੀ ਢੇਰ ਕੀਤਾ ਗਿਆ ਹੈ।
ਇਹ ਵੀ ਪੜ੍ਹੋ:Emergency landing: ਭਾਰਤੀ ਹਵਾਈ ਫੌਜ ਦੇ ਹੈਲੀਕਾਪਟਰ ਦੀ ਐਮਰਜੈਂਸੀ ਲੈਂਡਿੰਗ, ਬਚਾਏ ਚਾਲਕ ਦਲ ਦੇ ਮੈਂਬਰ
