ਬੈਂਗਲੁਰੂ :ਕੈਬ ਡਰਾਈਵਰ ਨੇ ਕੈਬ 'ਚ ਸਫਰ ਕਰ ਰਹੀ ਇਕ ਔਰਤ ਨੂੰ ਫੋਨ 'ਤੇ ਗੱਲ ਕਰਦੇ ਹੋਏ ਸੁਣ ਲਿਆ ਅਤੇ ਇਸ ਦਾ ਫਾਇਦਾ ਚੁੱਕਦਿਆਂ ਉਸਨੇ 22 ਲੱਖ ਰੁਪਏ ਅਤੇ 750 ਗ੍ਰਾਮ ਸੋਨੇ ਦੇ ਗਹਿਣੇ ਲੁੱਟ ਲਏ। ਪੁਲਿਸ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਇਹ ਮਾਮਲਾ ਕਰਨਾਟਕ ਦੇ ਬੈਂਗਲੁਰੂ ਸ਼ਹਿਰ 'ਚ ਸਾਹਮਣੇ ਆਇਆ ਹੈ। ਬੈਂਗਲੁਰੂ ਦੇ ਰਾਮਾਮੂਰਤੀਨਗਰ ਥਾਣਾ ਪੁਲਿਸ ਨੇ ਇਕ ਔਰਤ ਨੂੰ ਦੋਸਤ ਦੇ ਭੇਸ 'ਚ ਬੁਲਾ ਕੇ 22 ਲੱਖ ਰੁਪਏ ਅਤੇ ਸੋਨੇ ਦੇ ਗਹਿਣੇ ਲੁੱਟਣ ਵਾਲੇ ਕੈਬ ਡਰਾਈਵਰ ਨੂੰ ਗ੍ਰਿਫਤਾਰ ਕੀਤਾ ਹੈ।
ਜਾਣਕਾਰੀ ਮੁਤਾਬਿਕ ਕਿੰਨੇ ਦਿਨਾਂ ਬਾਅਦ ਔਰਤ ਨੂੰ ਪਤਾ ਲੱਗਾ ਕਿ ਫੋਨ ਕਰਨ ਵਾਲਾ ਉਸਦਾ ਦੋਸਤ ਨਹੀਂ ਸੀ। ਇਸ ਤੋਂ ਬਾਅਦ ਉਸਨੇ ਉਸ ਨਾਲ ਗੱਲ ਕਰਨੀ ਬੰਦ ਕਰ ਦਿੱਤੀ ਪਰ ਬਾਅਦ 'ਚ ਉਸਨੇ ਆਪਣੇ ਪਤੀ ਨੂੰ ਉਸਦੇ ਦੋਸਤ ਬਾਰੇ ਦੱਸਣ ਦੀ ਧਮਕੀ ਦੇ ਕੇ ਔਰਤ ਤੋਂ 22 ਲੱਖ ਰੁਪਏ ਅਤੇ 750 ਗ੍ਰਾਮ ਸੋਨਾ ਲੁੱਟ ਲਿਆ। ਦੋਸ਼ੀ ਕੈਬ ਡਰਾਈਵਰ ਦੀ ਪਛਾਣ ਕਿਰਨ ਵਜੋਂ ਹੋਈ ਹੈ, ਜੋ ਕਿ ਹਰਸਾਘੱਟਾ, ਬੇਂਗਲੁਰੂ ਦਾ ਰਹਿਣ ਵਾਲਾ ਹੈ। ਇਕ ਪ੍ਰਾਈਵੇਟ ਕੰਪਨੀ 'ਚ ਕੰਮ ਕਰਨ ਵਾਲੀ ਔਰਤ ਨੇ ਪਿਛਲੇ ਸਾਲ ਦਸੰਬਰ 'ਚ ਇੰਦਰਾਨਗਰ ਤੋਂ ਬਨਾਸਵਾੜੀ ਲਈ ਕੈਬ ਬੁੱਕ ਕੀਤੀ ਸੀ, ਬਾਅਦ 'ਚ ਕੈਬ 'ਚ ਜਾਂਦੇ ਸਮੇਂ ਉਸ ਨੇ ਆਪਣੇ ਦੋਸਤ ਬਾਰੇ ਕਿਸੇ ਨਾਲ ਮੋਬਾਈਲ 'ਤੇ ਗੱਲ ਕੀਤੀ। ਇਸ ਦੌਰਾਨ ਡਰਾਈਵਰ ਨੇ ਉਸ ਦੀ ਗੱਲ ਸੁਣ ਲਈ। ਔਰਤ ਦਾ ਇਹ ਦੋਸਤ ਉਸਦਾ ਜਮਾਤੀ ਸੀ। ਪੁਲਿਸ ਨੇ ਦੱਸਿਆ ਕਿ ਕੁਝ ਦਿਨਾਂ ਬਾਅਦ ਉਸੇ ਕੈਬ ਡਰਾਈਵਰ ਨੇ ਦੋਸਤ ਦੇ ਭੇਸ 'ਚ ਮੈਸੇਜ ਭੇਜ ਕੇ ਔਰਤ ਨਾਲ ਸੰਪਰਕ ਕੀਤਾ। ਕੈਬ ਡਰਾਈਵਰ ਨੇ ਖੁਦ ਨੂੰ ਔਰਤ ਦਾ ਬਚਪਨ ਦਾ ਦੋਸਤ ਦੱਸਿਆ ਅਤੇ ਮੋਬਾਇਲ ਫੋਨ 'ਤੇ ਗੱਲ ਕਰਦਾ ਰਿਹਾ।