ਨਵੀਂ ਦਿੱਲੀ : ਇਕ ਅੰਤਰਰਾਸ਼ਟਰੀ ਮੀਡੀਆ ਸੰਗਠਨ ਨੇ ਖੁਲਾਸਾ ਕੀਤਾ ਹੈ ਕਿ ਭਾਰਤ ਦੇ ਦੋ ਕੇਂਦਰੀ ਮੰਤਰੀਆਂ, 40 ਤੋਂ ਵੱਧ ਪੱਤਰਕਾਰ, ਤਿੰਨ ਵਿਰੋਧੀ ਨੇਤਾ ਅਤੇ ਇੱਕ ਜੱਜ ਸਮੇਤ ਵੱਡੀ ਸੰਖਿਆਂ ਵਿੱਚ ਕਾਰੋਬਾਰੀਆਂ ਦੇ 300 ਤੋਂ ਵੱਧ ਮੋਬਾਇਲ ਇਜ਼ਰਾਈਲ ਦੇ ਖੁਫੀਆ ਸਾੱਫਟਵੇਅਰ ਰਾਹੀਂ ਹੈਕ ਕਰ ਦਿੱਤੇ ਗਏ।
ਇਹ ਰਿਪੋਰਟ ਐਤਵਾਰ ਨੂੰ ਸਾਹਮਣੇ ਆਈ ਹੈ। ਹਾਲਾਂਕਿ, ਸਰਕਾਰ ਨੇ ਆਪਣੇ ਪੱਧਰ ਤੋਂ ਕੁਝ ਲੋਕਾਂ ਦੀ ਨਿਗਰਾਨੀ ਨਾਲ ਜੁੜੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। ਸਰਕਾਰ ਨੇ ਕਿਹਾ, ‘ਇਸ ਨਾਲ ਕੋਈ ਠੋਸ ਅਧਾਰ ਜਾਂ ਸੱਚਾਈ ਨਹੀਂ ਹੈ।
ਇਹ ਰਿਪੋਰਟ ਭਾਰਤ ਦੇ ਨਿਊਜ਼ ਪੋਰਟਲ 'ਦਿ ਵਾਇਰ' ਦੁਆਰਾ ਛਾਪੀ ਗਈ ਹੈ ਅਤੇ ਨਾਲ ਹੀ ਪੈਰਿਸ ਸਥਿਤ ਮੀਡੀਆ ਗੈਰ-ਮੁਨਾਫਾ ਸੰਗਠਨ ਫੋਰਬਿਡਨ ਸਟੋਰੀਜ ਅਤੇ ਅਧਿਕਾਰ ਸਮੂਹ ਐੱਮਨੇਸਟੀ ਇੰਟਰਨੈਸ਼ਨਲ ਦੁਆਰਾ ਕੀਤੀ ਗਈ ਜਾਂਚ ਲਈ ਦ ਵਾਸ਼ਿੰਗਟਨ ਪੋਸਟ, ਦਿ ਗਾਰਡੀਅਨ ਅਤੇ ਲੇ ਮੋਂਡੇ ਸਮੇਤ 16 ਹੋਰ ਅੰਤਰਰਾਸ਼ਟਰੀ ਪ੍ਰਕਾਸ਼ਨਾਂ ਦੁਆਰਾ ਪ੍ਰਕਾਸ਼ਤ ਕੀਤਾ ਗਿਆ ਹੈ। ਇਹ ਜਾਂਚ ਦੁਨੀਆ ਭਰ ਦੇ 50,000 ਤੋਂ ਵੱਧ ਫੋਨ ਨੰਬਰਾਂ ਦੀ ਲੀਕ ਹੋਈ ਸੂਚੀ ‘ਤੇ ਅਧਾਰਤ ਹੈ। ਜਿਨ੍ਹਾਂ ਨੂੰ ਮੰਨਿਆ ਜਾਂਦਾ ਹੈ ਕਿ ਇਜ਼ਰਾਈਲੀ ਨਿਗਰਾਨੀ ਕੰਪਨੀ ਐਨ.ਐਸ.ਓ ਸਮੂਹ ਦੇ ਪੇਗਾਸਸ ਸਾੱਫਟਵੇਅਰ ਰਾਹੀਂ ਹੈਕ ਕੀਤਾ ਗਿਆ ਸੀ।
ਦ ਵਾਇਰ ਨੇ ਆਪਣੀ ਰਿਪੋਰਟ ਵਿੱਚ ਦੱਸਿਆ ਹੈ ਕਿ ਮੀਡੀਆ ਜਾਂਚ ਪ੍ਰੋਜੈਕਟ ਦੇ ਹਿੱਸੇ ਵਜੋਂ ਕਰਵਾਏ ਗਏ ਫੋਰੈਂਸਿਕ ਜਾਂਚਾਂ ਵਿੱਚ ਪੇਗਾਸਸ ਜਾਸੂਸ ਸਾੱਫਟਵੇਅਰ ਦੁਆਰਾ ਨਿਸ਼ਾਨਾ ਬਣਾਏ ਗਏ 37 ਫੋਨ ਦੇ ਸਪੱਸ਼ਟ ਸੰਕੇਤ ਮਿਲੇ, ਜਿਨ੍ਹਾਂ ਵਿਚੋਂ 10 ਭਾਰਤੀ ਹਨ।
ਦਿ ਵਾਇਰ ਨੇ ਕਿਹਾ ਕਿ ਭਾਰਤ ਦੀ ਗਿਣਤੀ ਵਿੱਚ 40 ਤੋਂ ਵੱਧ ਪੱਤਰਕਾਰ, ਤਿੰਨ ਪ੍ਰਮੁੱਖ ਵਿਰੋਧੀ ਵਿਅਕਤੀਆਂ, ਇੱਕ ਸੰਵਿਧਾਨਕ ਅਧਿਕਾਰੀ, ਨਰਿੰਦਰ ਮੋਦੀ ਸਰਕਾਰ ਵਿੱਚ ਦੋ ਮੰਤਰੀ, ਮੌਜੂਦਾ ਅਤੇ ਸਾਬਕਾ ਸੁਰੱਖਿਆ ਸੰਗਠਨਾਂ ਦੇ ਮੁਖੀ ਅਤੇ ਅਧਿਕਾਰੀ, ਇੱਕ ਜੱਜ ਅਤੇ ਕਈ ਕਾਰੋਬਾਰੀ ਸ਼ਾਮਲ ਹਨ।
ਦਿ ਵਾਇਰ ਦੇ ਅਨੁਸਾਰ ਲੀਕ ਹੋਏ ਅੰਕੜਿਆਂ ਵਿੱਚ ਹਿੰਦੁਸਤਾਨ ਟਾਈਮਜ਼, ਇੰਡੀਆ ਟੂਡੇ, ਨੈਟਵਰਕ 18, ਦਿ ਹਿੰਦੂ, ਇੰਡੀਅਨ ਐਕਸਪ੍ਰੈਸ ਵਰਗੇ ਪ੍ਰਮੁੱਖ ਮੀਡੀਆ ਸੰਗਠਨਾਂ ਦੇ ਪ੍ਰਮੁੱਖ ਪੱਤਰਕਾਰਾਂ ਦੀ ਗਿਣਤੀ ਹੈ।
ਪੇਗਾਸਸ ਸਾੱਫਟਵੇਅਰ ਤੋਂ ਜਾਸੂਸੀ ਦੀਆਂ ਖਬਰਾਂ ਬੇਬੁਨਿਆਦ: ਕੇਂਦਰ
ਭਾਰਤ ਸਰਕਾਰ ਨੇ ਇਜ਼ਰਾਈਲੀ ਕੰਪਨੀ ਵੱਲੋਂ ਤਿਆਰ ਕੀਤੇ ਜਾਸੂਸ ਸਾੱਫਟਵੇਅਰ ਪੈਗਾਸਸ ਦੇ ਜ਼ਰੀਏ ਪੱਤਰਕਾਰਾਂ ਅਤੇ ਦੇਸ਼ ਦੇ ਹੋਰ ਪ੍ਰਮੁੱਖ ਵਿਅਕਤੀਆਂ ਉੱਤੇ ਜਾਸੂਸੀ ਦੀਆਂ ਮੀਡੀਆ ਰਿਪੋਰਟਾਂ ਦਾ ਖੰਡਨ ਕੀਤਾ ਹੈ। ਦੋਸ਼ਾਂ ਨੂੰ ਬੇਬੁਨਿਆਦ ਦੱਸਦਿਆਂ ਭਾਰਤ ਸਰਕਾਰ ਨੇ ਕਿਹਾ ਕਿ ਇਹ ਭਾਰਤੀ ਲੋਕਤੰਤਰ ਦੇ ਅਕਸ ਨੂੰ ਢਾਹ ਲਾਉਣ ਦੀ ਕੋਸ਼ਿਸ਼ ਹੈ। ਭਾਰਤ ਆਪਣੇ ਨਾਗਰਿਕਾਂ ਦੇ ਨਿੱਜਤਾ ਅਧਿਕਾਰਾਂ ਦੀ ਰਾਖੀ ਲਈ ਵਚਨਬੱਧ ਹੈ।