ਪਟਨਾ:ਸਾਬਕਾ ਐੱਮਐੱਲਸੀ ਹੁਲਾਸ ਪਾਂਡੇ ਦੇ ਬੇਟੇ ਨੇ ਸਿਰਫ਼ 14 ਸਾਲ ਦੀ ਉਮਰ ਵਿੱਚ ਖੁਦਕੁਸ਼ੀ ਕਰ ਲਈ ਹੈ। ਹੁਲਾਸ ਪਾਂਡੇ ਬਾਹੂਬਲੀ ਨੇਤਾ ਸੁਨੀਲ ਪਾਂਡੇ ਦਾ ਭਰਾ ਹੈ। ਉਸ ਦੇ ਪੁੱਤਰ ਨੇ ਲਾਇਸੈਂਸੀ ਰਿਵਾਲਵਰ ਨਾਲ ਖੁਦ ਨੂੰ ਗੋਲੀ ਮਾਰ ਲਈ। ਘਟਨਾ ਦਾ ਕਾਰਣ ਅਜੇ ਸਪੱਸ਼ਟ ਨਹੀਂ ਹੋ ਸਕਿਆ ਹੈ। ਮਾਮਲਾ ਪਟਨਾ ਦੇ ਸ਼ਾਸਤਰੀ ਨਗਰ ਥਾਣਾ ਖੇਤਰ ਦਾ ਹੈ।
ਘਟਨਾ ਤੋਂ ਬਾਅਦ ਹੁਲਾਸ ਪਾਂਡੇ ਦੇ ਬੇਟੇ ਨੂੰ ਤੁਰੰਤ ਪਾਰਸ ਹਸਪਤਾਲ ਲਿਜਾਇਆ ਗਿਆ। ਹਾਲਾਂਕਿ ਉਸ ਦੀ ਜਾਨ ਨਹੀਂ ਬਚਾਈ ਜਾ ਸਕੀ। ਘਟਨਾ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ। ਸੂਤਰਾਂ ਮੁਤਾਬਕ ਹੁਲਾਸ ਪਾਂਡੇ ਦੇ ਬੇਟੇ ਨੇ ਆਪਣੇ ਸਿਰ 'ਤੇ ਗੋਲੀ ਮਾਰ ਲਈ । ਹੁਲਾਸ ਪਾਂਡੇ ਦੇ ਬੇਟੇ ਨੇ ਸ਼ਾਸਤਰੀ ਨਗਰ ਥਾਣਾ ਖੇਤਰ ਸਥਿਤ ਐੱਮਐੱਲਸੀ ਰਿਹਾਇਸ਼ ਵਿੱਚ ਆਪਣੀ ਜਾਨ ਦੇ ਦਿੱਤੀ। ਇਸ ਘਟਨਾ ਤੋਂ ਬਾਅਦ ਪੂਰੇ ਪਰਿਵਾਰ 'ਚ ਸੋਗ ਦੀ ਲਹਿਰ ਦੌੜ ਗਈ ਹੈ। ਫਿਲਹਾਲ ਪੁਲਿਸ ਪੂਰੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਕੌਣ ਹੈ ਹੁਲਾਸ ਪਾਂਡੇ ?: ਹੁਲਾਸ ਪਾਂਡੇ ਬਿਹਾਰ ਦੀ ਰਾਜਨੀਤੀ ਵਿੱਚ ਇੱਕ ਜਾਣਿਆ-ਪਛਾਣਿਆ ਨਾਮ ਹੈ। ਹੁਲਾਸ ਪਾਂਡੇ ਬਕਸਰ ਤੋਂ ਸਾਬਕਾ ਐੱਮਐੱਲਸੀ ਰਹਿ ਚੁੱਕੇ ਹਨ। ਉਸ ਨੂੰ ਆਰਾ ਅਤੇ ਬਕਸਰ ਵਿੱਚ ਬਾਹੂਬਲੀ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ। ਹੁਲਾਸ ਪਾਂਡੇ ਦੇ ਭਰਾ ਸੁਨੀਲ ਪਾਂਡੇ ਵੀ ਵਿਧਾਇਕ ਰਹਿ ਚੁੱਕੇ ਹਨ। ਹੁਲਾਸ ਪਾਂਡੇ ਮੂਲ ਰੂਪ ਵਿੱਚ ਰੇਤ ਦਾ ਕਾਰੋਬਾਰ ਕਰਦਾ ਹੈ। ਇਸ ਦੇ ਨਾਲ ਹੀ ਰੇਤ ਮਾਫੀਆ ਸੁਭਾਸ਼ ਯਾਦਵ ਨਾਲ ਆਪਣੇ ਸਬੰਧਾਂ ਨੂੰ ਲੈ ਕੇ ਵੀ ਚਰਚਾ 'ਚ ਰਹਿੰਦਾ ਹੈ। ਹੁਲਾਸ ਪਾਂਡੇ ਚਿਰਾਗ ਪਾਸਵਾਨ ਦੀ ਪਾਰਟੀ, ਲੋਕ ਜਨਸ਼ਕਤੀ ਪਾਰਟੀ ਦਾ ਹਿੱਸਾ ਹਨ ਅਤੇ ਬਿਹਾਰ ਵਿੱਚ ਪਾਰਟੀ ਦੇ ਸੂਬਾ ਮੀਤ ਪ੍ਰਧਾਨ ਹਨ।
ਹੁਲਾਸ ਪਾਂਡੇ ਦੇ ਖਿਲਾਫ ਕਈ ਇਲਜ਼ਾਮ: ਜੂਨ 2020 ਵਿੱਚ, ਐੱਨਆਈਏ ਨੇ ਆਮਦਨ ਤੋਂ ਵੱਧ ਜਾਇਦਾਦ ਦੇ ਮਾਮਲੇ ਵਿੱਚ ਪਟਨਾ, ਅਰਾਹ ਅਤੇ ਬਕਸਰ ਵਿੱਚ ਹੁਲਾਸ ਪਾਂਡੇ ਦੇ ਟਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ। ਹੁਲਾਸ ਪਾਂਡੇ 'ਤੇ ਗੈਰ-ਕਾਨੂੰਨੀ ਹਥਿਆਰਾਂ ਦੀ ਤਸਕਰੀ ਲਈ ਫਰਜ਼ੀ ਪੈਸੇ ਦੇ ਲੈਣ-ਦੇਣ ਦਾ ਇਲਜ਼ਾਮ ਹੈ। ਉਸ ਦੇ ਪਟਨਾ ਸਥਿਤ ਘਰ 'ਤੇ ਵੀ ਛਾਪਾ ਮਾਰਿਆ ਗਿਆ ਅਤੇ ਡੇਢ ਕਿੱਲੋ ਸੋਨੇ ਸਮੇਤ ਲੱਖਾਂ ਰੁਪਏ ਦੀ ਨਕਦੀ ਬਰਾਮਦ ਕੀਤੀ ਗਈ।
ਮਾਮਲੇ ਦੀ ਜਾਂਚ ਜਾਰੀ:ਲੋਜਪਾ ਨੇਤਾ ਅਤੇ ਸਾਬਕਾ ਐੱਮਐੱਲਸੀ ਦੇ ਬੇਟੇ ਨੂੰ ਸ਼ੱਕੀ ਹਾਲਾਤਾਂ ਵਿੱਚ ਇਲਾਜ ਲਈ ਪਟਨਾ ਦੇ ਪਾਰਸ ਹਸਪਤਾਲ ਲਿਆਂਦਾ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਹਾਲਾਂਕਿ ਸੂਤਰਾਂ ਤੋਂ ਖਬਰ ਆ ਰਹੀ ਸੀ ਕਿ ਮੌਤ ਗੋਲੀ ਲੱਗਣ ਕਾਰਨ ਹੋਈ ਹੈ ਪਰ ਜੇਕਰ ਡਾਕਟਰਾਂ ਦੀ ਮੰਨੀਏ ਤਾਂ ਸਿਰ 'ਤੇ ਗੰਭੀਰ ਸੱਟ ਦਾ ਕਾਰਨ ਦੱਸਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਮਾਮਲੇ ਦੀ ਜਾਂਚ ਜਾਰੀ ਹੈ। ਫਿਲਹਾਲ ਕੁਝ ਕਹਿਣਾ ਸੰਭਵ ਨਹੀਂ ਹੈ। ਹੁਣ ਜਾਂਚ ਤੋਂ ਬਾਅਦ ਹੀ ਪਤਾ ਲੱਗੇਗਾ ਕਿ ਸਾਰਾ ਮਾਮਲਾ ਕੀ ਹੈ।
