ਨਵੀਂ ਦਿੱਲੀ :ਰਾਜਧਾਨੀ ਵਿੱਚ ਹੜ੍ਹਾਂ ਦੀ ਵਿਗੜਦੀ ਸਥਿਤੀ ਨੂੰ ਦੇਖਦੇ ਹੋਏ ਆਖਿਰਕਾਰ ਦਿੱਲੀ ਸਰਕਾਰ ਨੂੰ ਫੌਜ ਦੀ ਮਦਦ ਲੈਣੀ ਪਈ। ਫੌਜ ਦੇ ਇੰਜਨੀਅਰਾਂ ਨੇ 20 ਘੰਟਿਆਂ ਦੀ ਸਖ਼ਤ ਮਿਹਨਤ ਤੋਂ ਬਾਅਦ ਆਈਟੀਓ ਬੈਰਾਜ ਦੇ ਜਾਮ ਹੋਏ ਗੇਟ ਨੂੰ ਖੋਲ੍ਹਿਆ। ਫੌਜ ਦੀ ਗੋਤਾਖੋਰੀ ਟੀਮ ਨੇ ਕੰਪ੍ਰੈਸ਼ਰ ਦੀ ਮਦਦ ਨਾਲ ਪਾਣੀ ਦੇ ਹੇਠਾਂ ਜੰਮੀ ਗਾਦ ਨੂੰ ਹਟਾਇਆ ਅਤੇ ਹਾਈਡ੍ਰਾ ਕਰੇਨ ਨਾਲ ਗੇਟ ਨੂੰ ਬਾਹਰ ਕੱਢਿਆ। ਇਸ ਦੇ ਨਾਲ ਹੀ ਚਾਰ ਹੋਰ ਗੇਟ ਖੋਲ੍ਹਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ। ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਵੀ ਇਸ ਲਈ ਫੌਜ ਦਾ ਧੰਨਵਾਦ ਕੀਤਾ ਹੈ। ਇਸ ਦੇ ਨਾਲ ਹੀ ਲੈਫਟੀਨੈਂਟ ਗਵਰਨਰ ਵਿਨੇ ਕੁਮਾਰ ਸਕਸੈਨਾ ਨੇ ਇੱਕ ਟਵੀਟ ਵਿੱਚ ਲਿਖਿਆ ਕਿ ਆਈਟੀਓ ਬੈਰਾਜ ਵਿਖੇ ਡਬਲਯੂਐਚਓ ਦੀ ਇਮਾਰਤ ਦੇ ਸਾਹਮਣੇ ਟੁੱਟੇ ਬੰਨ੍ਹ ਨੂੰ ਸੀਲ ਕਰਨ ਅਤੇ ਗੇਟ ਖੋਲ੍ਹਣ ਵਿੱਚ ਫੌਜ ਦੇ ਅਣਥੱਕ ਯਤਨਾਂ ਲਈ ਅਸੀਂ ਸੈਨਿਕਾਂ ਅਤੇ ਅਧਿਕਾਰੀਆਂ ਦਾ ਤਹਿ ਦਿਲੋਂ ਧੰਨਵਾਦ ਕਰਦੇ ਹਾਂ।
ਮੁੱਖ ਮੰਤਰੀ ਕੇਜਰੀਵਾਲ ਨੇ ਟਵੀਟ ਕੀਤਾ :ਕਰੀਬ 20 ਘੰਟਿਆਂ ਦੀ ਅਣਥੱਕ ਮਿਹਨਤ ਤੋਂ ਬਾਅਦ ITO ਬੈਰਾਜ ਦਾ ਪਹਿਲਾ ਜਾਮ ਵਾਲਾ ਗੇਟ ਖੋਲ੍ਹ ਦਿੱਤਾ ਗਿਆ ਹੈ। ਗੋਤਾਖੋਰੀ ਟੀਮ ਨੇ ਕੰਪ੍ਰੈਸਰ ਨਾਲ ਪਾਣੀ ਦੇ ਹੇਠਾਂ ਤੋਂ ਗੰਦਗੀ ਕੱਢੀ ਇਸ ਤੋਂ ਬਾਅਦ ਫਿਰ ਹਾਈਡ੍ਰਾ ਕਰੇਨ ਨਾਲ ਗੇਟ ਨੂੰ ਖਿੱਚਿਆ ਗਿਆ। ਜਲਦੀ ਹੀ ਸਾਰੇ ਪੰਜ ਗੇਟ ਖੋਲ੍ਹ ਦਿੱਤੇ ਜਾਣਗੇ। ਆਰਮੀ ਇੰਜੀਨੀਅਰ ਰੈਜੀਮੈਂਟ ਅਤੇ ਗੋਤਾਖੋਰਾਂ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ। ਦੱਸ ਦਈਏ ਕਿ 13 ਜੁਲਾਈ ਦੀ ਰਾਤ ਨੂੰ ਜਦੋਂ ਯਮੁਨਾ ਨਦੀ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੀ ਸੀ ਅਤੇ ਨੀਵੇਂ ਇਲਾਕੇ ਡੁੱਬ ਰਹੇ ਸਨ ਤਾਂ ਦਿੱਲੀ ਪ੍ਰਸ਼ਾਸਨ ਨੇ ਭਾਰਤੀ ਸੈਨਾ ਤੋਂ ਮਦਦ ਮੰਗੀ ਸੀ। ਇਸ ਤੋਂ ਬਾਅਦ ਇਸ ਵਿੱਚ ਫੌਜ ਦੀ ਟੀਮ ਨੂੰ ਤਾਇਨਾਤ ਕਰ ਦਿੱਤਾ ਗਿਆ। ਦਿੱਲੀ ਵਿੱਚ ਯਮੁਨਾ ਦੇ ਪਾਣੀ ਦੇ ਬੈਕਫਲੋ ਨੂੰ ਆਈਟੀਓ ਨੇੜੇ ਇੱਕ ਅਸਥਾਈ ਡੈਮ ਬਣਾ ਕੇ ਕੰਟਰੋਲ ਕੀਤਾ ਗਿਆ ਸੀ। ਆਰਮੀ ਹੈੱਡਕੁਆਰਟਰ ਦੇ ਦਿੱਲੀ ਸੈਕਟਰ ਵੱਲੋਂ ਸਥਿਤੀ 'ਤੇ ਨੇੜਿਓਂ ਨਜ਼ਰ ਰੱਖੀ ਜਾ ਰਹੀ ਹੈ। ਇੰਜੀਨੀਅਰਾਂ ਦੀਆਂ ਟੀਮਾਂ ਨੂੰ ਸਟੈਂਡਬਾਏ 'ਤੇ ਰੱਖਿਆ ਗਿਆ ਹੈ।
ਯਮੁਨਾ ਦੇ ਪਾਣੀ ਦਾ ਪੱਧਰ ਘਟ ਰਿਹਾ ਹੈ:ਯਮੁਨਾ ਨਦੀ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੀ ਹੈ। ਹਾਲਾਂਕਿ ਯਮੁਨਾ ਦੇ ਪਾਣੀ ਦੇ ਪੱਧਰ 'ਚ ਕਮੀ ਆਈ ਹੈ ਪਰ ਖ਼ਤਰਾ ਅਜੇ ਵੀ ਟਲਿਆ ਨਹੀਂ ਹੈ। ਸ਼ਨੀਵਾਰ ਸਵੇਰੇ 7 ਵਜੇ ਯਮੁਨਾ ਦੇ ਪਾਣੀ ਦਾ ਪੱਧਰ 207.62 ਮੀਟਰ ਦਰਜ ਕੀਤਾ ਗਿਆ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਸ਼ਾਮ ਤੱਕ ਪਾਣੀ ਦਾ ਪੱਧਰ 206 ਮੀਟਰ ਦੇ ਕਰੀਬ ਆ ਸਕਦਾ ਹੈ। ਦੱਸ ਦੇਈਏ ਕਿ ਇਸ ਵਾਰ ਯਮੁਨਾ ਦੇ ਪਾਣੀ ਦੇ ਪੱਧਰ ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਕੇ ਨਵਾਂ ਰਿਕਾਰਡ ਬਣਾਇਆ ਹੈ। ਇਹੀ ਕਾਰਨ ਹੈ ਕਿ ਰਾਜਧਾਨੀ ਦੇ ਕਈ ਰਿਹਾਇਸ਼ੀ ਇਲਾਕਿਆਂ ਵਿੱਚ ਪਾਣੀ ਭਰ ਗਿਆ।