ਨਵੀਂ ਦਿੱਲੀ: ਦਿੱਲੀ ਵਿੱਚ ਆਟੋ-ਟੈਕਸੀ ਦਾ ਸਫ਼ਰ ਮਹਿੰਗਾ ਹੋ ਗਿਆ ਹੈ। ਦੱਸ ਦਈਏ ਕਿ ਦਿੱਲੀ ਵਿੱਚ ਪਿਛਲੇ ਕੁਝ ਮਹੀਨਿਆਂ ਤੋਂ ਸੀਐੱਨਜੀ ਦੀਆਂ ਵਧਦੀਆਂ ਕੀਮਤਾਂ ਦੇ ਮੱਦੇਨਜ਼ਰ ਆਟੋ ਅਤੇ ਟੈਕਸੀ ਡਰਾਈਵਰਾਂ ਦੀ ਅਪੀਲ ਉੱਤੇ ਦਿੱਲੀ ਸਰਕਾਰ ਵੱਲੋਂ ਕਿਰਾਏ ਵਿੱਚ ਸੋਧ ਲਈ ਗਠਿਤ ਕਮੇਟੀ ਦੀ ਮਨਜ਼ੂਰੀ ਨੂੰ ਲਾਗੂ ਕਰ ਦਿੱਤਾ ਗਿਆ ਹੈ। ਹੁਣ ਆਟੋ ਦੀ ਸਵਾਰੀ ਲਈ 30 ਰੁਪਏ ਤੋਂ ਮੀਟਰ ਡਾਊਨ ਹੋਵੇਗਾ ਤੇ ਫਿਰ 11 ਰੁਪਏ ਪ੍ਰਤੀ ਕਿਲੋਮੀਟਰ ਦੇ ਦੇਣੇ ਪੈਣਗੇ।
ਇਹ ਵੀ ਪੜੋ:ਕੀ ਤੁਸੀਂ ਵੀ ਸੁਣੀਆਂ ਨੇ ਲੋਹੜੀ ਮੌਕੇ ਦੀਆਂ ਇਹ ਰਸਮਾਂ, ਮਕਰ ਸੰਕਰਾਂਤੀ ਦਾ ਵੀ ਪੜ੍ਹੋ ਕੀ ਹੈ ਇਤਿਹਾਸ
ਪਿਛਲੇ ਸਾਲ ਹੀ ਸੋਧ ਸਬੰਧੀ ਨੋਟੀਫਿਕੇਸ਼ਨ ਹੋਇਆ ਸੀ ਜਾਰੀ:ਦਿੱਲੀ ਸਰਕਾਰ ਨੇ ਪਿਛਲੇ ਸਾਲ ਅਕਤੂਬਰ ਵਿੱਚ ਆਟੋ ਰਿਕਸ਼ਾ ਅਤੇ ਟੈਕਸੀ ਦੇ ਸੋਧੇ ਕਿਰਾਏ ਨੂੰ ਮਨਜ਼ੂਰੀ ਦਿੱਤੀ ਸੀ। ਹੁਣ ਇਸ ਨੂੰ ਲਾਗੂ ਕਰਨ ਸਬੰਧੀ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਗਿਆ ਹੈ। ਨੋਟੀਫਿਕੇਸ਼ਨ ਜਾਰੀ ਨਾ ਹੋਣ ਕਾਰਨ ਹੁਣ ਤੱਕ ਆਟੋ ਟੈਕਸੀ ਚਾਲਕ ਆਪਣੇ ਮੀਟਰ ਕਿਰਾਏ ਦੇ ਹਿਸਾਬ ਨਾਲ ਨਹੀਂ ਲਗਾਉਂਦੇ ਸਨ, ਪਰ ਹੁਣ ਸਰਕਾਰ ਤੋਂ ਮਨਜ਼ੂਰੀ ਮਿਲ ਗਈ ਹੈ।
MCD ਚੋਣਾਂ ਤੋਂ ਪਹਿਲਾਂ ਮਿਲੀ ਸੀ ਮਨਜ਼ੂਰੀ:ਦਿੱਲੀ ਦੇ ਟਰਾਂਸਪੋਰਟ ਮੰਤਰੀ ਕੈਲਾਸ਼ ਗਹਿਲੋਤ ਦਾ ਕਹਿਣਾ ਹੈ ਕਿ ਆਟੋ ਟੈਕਸੀ ਦਾ ਕਿਰਾਇਆ ਵਧਾਉਣ ਦੇ ਪ੍ਰਸਤਾਵ ਨੂੰ ਦਿੱਲੀ ਸਰਕਾਰ ਨੇ MCD ਚੋਣਾਂ ਤੋਂ ਪਹਿਲਾਂ 28 ਅਕਤੂਬਰ ਨੂੰ ਮਨਜ਼ੂਰੀ ਦਿੱਤੀ ਸੀ। ਐਮਸੀਡੀ ਚੋਣਾਂ ਲਈ ਚੋਣ ਜ਼ਾਬਤਾ ਹਟਦੇ ਹੀ ਕਾਗਜ਼ੀ ਕਾਰਵਾਈ ਪੂਰੀ ਕਰਨ ਤੋਂ ਬਾਅਦ ਸੋਧਿਆ ਕਿਰਾਇਆ ਨੋਟੀਫਿਕੇਸ਼ਨ ਜਾਰੀ ਕਰਨ ਲਈ ਫਾਈਲ 17 ਦਸੰਬਰ ਨੂੰ ਲੈਫਟੀਨੈਂਟ ਗਵਰਨਰ ਦੇ ਦਫਤਰ ਨੂੰ ਭੇਜੀ ਗਈ ਸੀ।
ਇਸ ਤਰ੍ਹਾਂ ਹੋਈ ਹੈ ਕਿਰਾਏ ਦੀ ਸੋਧ:ਦੱਸ ਦੇਈਏ ਕਿ ਪਹਿਲਾਂ ਆਟੋ ਰਿਕਸ਼ਾ ਦੇ ਕਿਰਾਏ ਨੂੰ 2020 ਵਿੱਚ ਸੋਧਿਆ ਗਿਆ ਸੀ, ਜਦੋਂ ਕਿ ਟੈਕਸੀ ਕਿਰਾਏ ਜਿਸ ਵਿੱਚ ਕਾਲੀਆਂ ਅਤੇ ਪੀਲੀਆਂ ਟੈਕਸੀਆਂ, ਆਰਥਿਕ ਟੈਕਸੀਆਂ ਅਤੇ ਪ੍ਰੀਮੀਅਮ ਟੈਕਸੀਆਂ ਸ਼ਾਮਲ ਹਨ ਨੂੰ 10 ਸਾਲ ਪਹਿਲਾਂ 2013 ਵਿੱਚ ਸੋਧਿਆ ਗਿਆ ਸੀ। ਸੀਐਨਜੀ ਦੀਆਂ ਵਧਦੀਆਂ ਕੀਮਤਾਂ ਤੋਂ ਆਟੋ ਰਿਕਸ਼ਾ ਅਤੇ ਟੈਕਸੀਆਂ ਦੇ ਡਰਾਈਵਰਾਂ ਦੀ ਲਾਗਤ, ਰੱਖ-ਰਖਾਅ ਅਤੇ ਕਮਾਈ ਨੂੰ ਪ੍ਰਭਾਵਿਤ ਕਰਨ ਵਾਲੇ ਵੱਖ-ਵੱਖ ਮੁੱਦਿਆਂ ਦੇ ਮੱਦੇਨਜ਼ਰ ਕਿਰਾਏ ਦੀ ਸਮੀਖਿਆ ਅਤੇ ਸਿਫਾਰਸ਼ ਕਰਨ ਲਈ ਮਈ 2022 ਵਿੱਚ ਇੱਕ 13 ਮੈਂਬਰੀ ਕਮੇਟੀ ਦਾ ਗਠਨ ਕੀਤਾ ਗਿਆ ਸੀ। ਦਿੱਲੀ ਸਰਕਾਰ ਨੇ ਕਮੇਟੀ ਦੀ ਸਿਫਾਰਿਸ਼ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।
ਆਟੋ ਰਿਕਸ਼ਾ ਲਈ ਸੋਧਿਆ ਕਿਰਾਇਆ (ਰੁਪਏ ਵਿੱਚ)
| ਮਾਪਦੰਡ | ਪਹਿਲਾਂ | ਹੁਣ |
| ਸ਼ੁਰੂਆਤੀ 1.5 ਕਿਲੋਮੀਟਰ ਲਈ | 25 | 30 |
| ਪ੍ਰਤੀ ਕਿਲੋਮੀਟਰ (ਮੀਟਰ ਡਾਊਨ ਤੋਂ ਬਾਅਦ) | 9.5 | 11 |
| ਪ੍ਰਤੀ ਕਿਲੋਮੀਟਰ (ਮੀਟਰ ਡਾਊਨ ਤੋਂ ਬਾਅਦ) | 25% | 25% |
| 10 ਮਿੰਟਾਂ ਵਿੱਚ ਇੱਕ ਕਿਲੋਮੀਟਰ ਤੋਂ ਘੱਟ ਦੀ ਦੂਰੀ | 0.75 | 0.75 |
| ਵਾਧੂ ਸਹਾਇਕ ਉਪਕਰਣ (ਰੁ.) | 7.50 | 10 |