ਆਗਰਾ: ਸੱਭਿਆਚਾਰ ਮੰਤਰਾਲੇ ਨੇ 6 ਜੁਲਾਈ ਯਾਨੀ ਸੋਮਵਾਰ ਤੋਂ ਇਤਿਹਾਸਕ ਸਮਾਰਕਾਂ ਨੂੰ ਖੋਲ੍ਹਣ ਅਤੇ ਸੈਰ ਸਪਾਟਾ ਕਰਨ ਦਾ ਐਲਾਨ ਕੀਤਾ ਹੈ। ਕਈ ਸਮਾਰਕ ਖੁੱਲ੍ਹ ਵੀ ਰਹੇ ਹਨ, ਪਰ ਤਾਜ ਮਹਿਲ 6 ਜੁਲਾਈ ਤੋਂ ਨਹੀਂ ਖੁੱਲ੍ਹੇਗਾ। ਇਸ ਦੇ ਦੀਦਾਰ ਲਈ ਕੁੱਝ ਦਿਨ ਹੋਰ ਉਡੀਕ ਕਰਨੀ ਪਵੇਗੀ। ਸਿਰਫ ਤਾਜ ਹੀ ਨਹੀਂ, ਤਾਜਨਗਰੀ ਦੀਆਂ ਹੋਰ ਇਤਿਹਾਸਕ ਯਾਦਗਾਰਾਂ ਵੀ ਬੰਦ ਰਹਿਣਗੀਆਂ।
ਜਾਣਕਾਰੀ ਅਨੁਸਾਰ ਕੋਰੋਨਾ ਸੰਕਟ ਦੇ ਮੱਦੇਨਜ਼ਰ ਆਗਰਾ ਪ੍ਰਸ਼ਾਸਨ ਨੇ ਤਾਜ ਮਹਿਲ ਨੂੰ ਫਿਲਹਾਲ ਬੰਦ ਰੱਖਣ ਦਾ ਫੈਸਲਾ ਕੀਤਾ ਹੈ। 6 ਜੁਲਾਈ ਤੋਂ ਏਐਸਆਈ ਵੱਲੋਂ ਸੁਰੱਖਿਅਤ ਸਮਾਰਕਾਂ ਅਤੇ ਇਮਾਰਤਾਂ ਖੋਲ੍ਹਣ ਦਾ ਫੈਸਲਾ ਕੀਤਾ ਗਿਆ ਸੀ।