ਇੱਕ ਵਿਆਹ ਅਜਿਹਾ ਵੀ

8 ਦਸੰਬਰ ਨੂੰ ਪ੍ਰਤਾਪਗੜ ਦੇ ਕੁੰਡਾ ਪਿੰਡ ਵਿੱਚ ਆਰਤੀ ਮੌਰਿਆ ਦਾ ਘਰ ਬਹੁਤ ਹੀ ਸੋਹਣੇ ਢੰਗ ਨਾਲ ਸਜਾਇਆ ਗਿਆ ਸੀ। ਪਰ ਅਚਾਨਕ ਤਸਵੀਰ ਹੀ ਬਦਲ ਗਈ। ਜੋ ਆਰਤੀ ਸਾਜ ਸ਼ਿੰਗਾਰ ਕਰਕੇ ਆਪਣੇ ਸੁਪਨਿਆਂ ਦੇ ਰਾਜਕੁਮਾਰ ਦੇ ਘਰ ਜਾਣ ਵਾਲੀ ਸੀ, ਹੁਣ ਸਟ੍ਰੈਚਰ 'ਤੇ ਪਈ ਸੀ।

ਉੱਤਰ ਪ੍ਰਦੇਸ਼: ਇੱਕ ਵਿਆਹ ਜਿਸ ਵਿੱਚ ਨਾ ਤਾਂ ਬਰਾਤ ਸੱਜੀ, ਨਾ ਬੈਂਡ-ਵਾਜਾ ਵੱਜਿਆ ਅਤੇ ਨਾ ਹੀ ਕੋਈ ਨੱਚ-ਗਾਓਣ ਹੋਇਆ। 8 ਦਸੰਬਰ ਨੂੰ ਘਰ ਵਿੱਚ ਖੁਸ਼ੀਆਂ ਦੀ ਸ਼ਹਿਨਾਈ ਵੱਜਣ ਵਾਲੀ ਸੀ ਪਰ ਇੱਕ ਹਾਦਸੇ ਨੇ ਸਭ ਦੀ ਖ਼ੁਸ਼ੀ 'ਤੇ ਪਾਣੀ ਫੇਰ ਦਿੱਤਾ। ਡੋਲੀ ਵਿੱਚ ਸਵਾਰ ਹੋਣ ਵਾਲੀ ਲਾੜੀ ਸਟ੍ਰੈਚਰ 'ਤੇ ਪਈ ਸੀ ਅਤੇ ਲਾੜਾ ਇਸੇ ਹਾਲਤ ਵਿੱਚ ਮੰਗਲ ਸੂਤਰ ਪਹਿਨਾ ਰਿਹਾ ਸੀ। ਇਸ ਮੌਕੇ 'ਤੇ ਸਿਰਫ ਕਰੀਬੀ ਰਿਸ਼ਤੇਦਾਰ ਹੀ ਮੌਜੂਦ ਸਨ।

ਇੱਕ ਹਾਦਸੇ ਨੇ ਬਦਲੀ ਤਸਵੀਰ

8 ਦਸੰਬਰ ਨੂੰ ਪ੍ਰਤਾਪਗੜ ਦੇ ਕੁੰਡਾ ਪਿੰਡ ਵਿੱਚ ਆਰਤੀ ਮੌਰਿਆ ਦਾ ਘਰ ਬਹੁਤ ਹੀ ਸੋਹਣੇ ਢੰਗ ਨਾਲ ਸਜਾਇਆ ਗਿਆ ਸੀ। ਪਰਿਵਾਰਕ ਮੈਂਬਰ ਬਰਾਤ ਦਾ ਸਵਾਗਤ ਕਰਨ ਵਿੱਚ ਰੁੱਝੇ ਹੋਏ ਸਨ, ਉਨ੍ਹਾਂ ਦੇ ਚਿਹਰਿਆਂ 'ਤੇ ਖੁਸ਼ੀ ਵੀ ਝਲਕ ਰਹੀ ਸੀ। ਲਾੜੀ ਆਰਤੀ ਮੌਰਿਆ ਆਪਣੇ ਲਾੜੇ ਅਵਧੇਸ਼ ਦੀ ਬਰਾਤ ਦਾ ਇੰਤਜ਼ਾਰ ਕਰ ਰਹੀ ਸੀ। ਕੁੱਝ ਘੰਟਿਆਂ ਬਾਅਦ ਬਰਾਤ ਆਉਣ ਵਾਲੀ ਸੀ। ਬਰਾਤ ਦੇ ਸਵਾਗਤ ਦੀਆਂ ਤਿਆਰੀਆਂ ਵੀ ਲਗਭਗ ਪੂਰੀਆਂ ਹੋ ਗਈਆਂ ਸਨ। ਆਰਤੀ ਦੇ ਸੁਪਨਿਆਂ ਦੀ ਸ਼ਹਿਨਾਈ ਵੱਜਣ ਹੀ ਵਾਲੀ ਸੀ ਅਤੇ ਉਹ ਕੁੱਝ ਹੀ ਘੰਟਿਆਂ ਬਾਅਦ ਆਪਣੇ ਸੁਪਨਿਆਂ ਦੇ ਰਾਜਕੁਮਾਰ ਨਾਲ ਵਿਦਾ ਹੋਣ ਵਾਲੀ ਸੀ। ਪਰ ਅਚਾਨਕ ਤਸਵੀਰ ਹੀ ਬਦਲ ਗਈ। ਜੋ ਆਰਤੀ ਸਾਜ ਸ਼ਿੰਗਾਰ ਕਰਕੇ ਆਪਣੇ ਸੁਪਨਿਆਂ ਦੇ ਰਾਜਕੁਮਾਰ ਦੇ ਘਰ ਜਾਣ ਵਾਲੀ ਸੀ, ਹੁਣ ਸਟ੍ਰੈਚਰ 'ਤੇ ਪਈ ਸੀ।

ਬੱਚਿਆਂ ਦੀ ਜਾਨ ਬਚਾਓਣ ਖਾਤਰ ਲਿਆ ਰਿਸਕ

ਇੱਕ ਹਾਦਸੇ ਨੇ ਸਾਰੀਆਂ ਖੁਸ਼ੀਆਂ ਹੀ ਬਦਲ ਦਿੱਤੀਆਂ ਅਤੇ ਬਰਾਤ ਆਓਣ ਤੋਂ ਲਗਭਗ 8 ਘੰਟੇ ਪਹਿਲਾਂ ਸਾਰਿਆਂ ਨੂੰ ਹੈਰਾਨੀ 'ਚ ਪਾ ਦਿੱਤਾ। ਛੱਤ 'ਤੇ ਖੇਡ ਰਹੇ ਬੱਚਿਆਂ ਨੂੰ ਬਚਾਉਣ ਦੇ ਚੱਕਰ 'ਚ ਆਰਤੀ ਦਾ ਪੈਰ ਫਿਸਲਿਆ ਅਤੇ ਉਹ ਛੱਤ ਤੋਂ ਹੇਠਾਂ ਡਿੱਗ ਗਈ। ਹਾਦਸੇ ਵਿੱਚ ਆਰਤੀ ਦੀ ਰੀੜ ਦੀ ਹੱਡੀ ਪੂਰੀ ਤਰ੍ਹਾਂ ਟੁੱਟ ਗਈ। ਕਮਰ ਅਤੇ ਲੱਤਾਂ ਸਮੇਤ ਸ਼ਰੀਰ ਦੇ ਹੋਰ ਹਿੱਸਿਆਂ ਨੂੰ ਵੀ ਸੱਟ ਲੱਗੀ ਸੀ। ਆਲਮ ਇਹ ਸੀ ਕਿ ਨੇੜਲੇ ਹਸਪਤਾਲਾਂ ਨੇ ਆਰਤੀ ਦਾ ਇਲਾਜ ਕਰਨ ਤੋਂ ਹੱਥ ਖੜੇ ਕਰ ਦਿੱਤੇ। ਪ੍ਰੇਸ਼ਾਨ ਅਤੇ ਘਬਰਾਏ ਘਰ ਵਾਲੇ ਆਰਤੀ ਨੂੰ ਇਲਾਜ ਲਈ ਪ੍ਰਯਾਗਰਾਜ ਦੇ ਇੱਕ ਨਿੱਜੀ ਹਸਪਤਾਲ ਲੈ ਗਏ।

ਲਾੜੇ ਦਾ ਜਵਾਬ ਸੁਣ ਸਭ ਹੋਏ ਹੈਰਾਨ

ਆਰਤੀ ਦੀ ਹਾਲਤ ਨੂੰ ਵੇਖਦਿਆਂ ਡਾਕਟਰ ਨੇ ਦੱਸਿਆ ਕਿ ਉਹ ਫਿਲਹਾਲ ਅਪੰਗ ਹੋ ਗਈ ਹੈ ਅਤੇ ਕਈਂ ਮਹੀਨਿਆਂ ਤੱਕ ਮੰਜੇ ਤੋਂ ਵੀ ਨਹੀਂ ਉੱਠ ਸਕਦੀ। ਘਰ ਦੇ ਲੋਕਾਂ ਨੂੰ ਲੱਗਿਆ ਕਿ ਲਾੜਾ ਵਿਆਹ ਤੋਂ ਇਨਕਾਰ ਕਰ ਦੇਵੇਗਾ। ਆਰਤੀ ਦੇ ਨਿਰਾਸ਼ ਪਰਿਵਾਰ ਨੇ ਅਵਧੇਸ਼ ਅਤੇ ਉਸਦੇ ਪਰਿਵਾਰਕ ਮੈਂਬਰਾਂ ਨੂੰ ਸਭ ਕੁੱਝ ਦੱਸਿਆ। ਲੜਕੀ ਵਾਲਿਆਂ ਨੇ ਆਰਤੀ ਦੀ ਛੋਟੀ ਭੈਣ ਨਾਲ ਵਿਆਹ ਦਾ ਪ੍ਰਸਤਾਵ ਰੱਖਿਆ। ਪਰ ਅਵਧੇਸ਼ ਦਾ ਜਵਾਬ ਸੁਣਕੇ ਕੁੜੀ ਵਾਲੇ ਹੈਰਾਨ ਰਹਿ ਗਈ।

ਤੈਅ ਸਮੇਂ 'ਤੇ ਹੀ ਹੋਇਆ ਵਿਆਹ

ਅਵਧੇਸ਼ ਨੇ ਕਿਹਾ ਕਿ ਆਰਤੀ ਜਿਸ ਹਾਲਤ 'ਚ ਹੈ, ਉਹ ਉਸਨੂੰ ਉਸੇ ਸਥਿਤੀ ਵਿੱਚ ਅਪਣਾਉਣ ਲਈ ਤਿਆਰ ਹੈ। ਅਵਧੇਸ਼ ਨੇ ਇਹ ਵੀ ਕਿਹਾ ਕਿ ਤੈਅ ਕੀਤੇ ਸਮੇਂ 'ਤੇ ਹੀ ਵਿਆਹ ਹੋਵੇਗਾ। ਜਲਦਬਾਜ਼ੀ ਵਿੱਚ ਆਰਤੀ ਦਾ ਇਲਾਜ ਕਰ ਰਹੇ ਡਾਕਟਰ ਨਾਲ ਗੱਲ ਕੀਤੀ ਗਈ। ਆਰਤੀ ਨੂੰ ਖਾਸ ਪਰਮੀਸ਼ਨ ਨਾਲ ਦੋ ਘੰਟੇ ਲਈ ਹਸਪਤਾਲ ਤੋਂ ਘਰ ਲਿਆਂਦਾ ਗਿਆ। ਆਰਤੀ ਨੂੰ ਸਟ੍ਰੈਚਰ 'ਤੇ ਲੰਮੇ ਪਾਕੇ ਵਿਆਹ ਦੀ ਰਸਮ ਕੀਤੀ ਗਈ। ਆਕਸੀਜਨ ਅਤੇ ਡਰਿਪ ਦੀ ਮੌਜੂਦਗੀ ਵਿੱਚ, ਅਵਧੇਸ਼ ਨੇ ਉਸਦੀ ਮਾਂਗ 'ਚ ਸਿੰਧੂਰ ਭਰਿਆ। ਇਸ ਮੌਕੇ ਹਾਜ਼ਰ ਹਰ ਕਿਸੇ ਦੀਆਂ ਅੱਖਾਂ ਨਮ ਸਨ। ਪੂਰੀ ਰੀਤ ਨਾਲ ਵਿਦਾਇਗੀ ਤੋਂ ਬਾਅਦ ਆਰਤੀ ਆਪਣੇ ਸਹੁਰੇ ਘਰ ਨਾਂ ਜਾਕੇ ਹਸਪਤਾਲ ਪਹੁੰਚੀ। ਅਗਲੇ ਹੀ ਦਿਨ ਆਰਤੀ ਦਾ ਆਪ੍ਰੇਸ਼ਨ ਕੀਤਾ ਜਾਣਾ ਸੀ। ਆਪ੍ਰੇਸ਼ਨ ਲਈ ਭਰੇ ਜਾਣ ਵਾਲੇ ਫਾਰਮ 'ਤੇ ਅਵਧੇਸ਼ ਨੇ ਖੁਦ ਹਸਤਾਖਰ ਕੀਤੇ, ਉਸਦੇ ਪਤੀ ਦੇ ਤੌਰ 'ਤੇ।

ਠੀਕ ਹੋਣ ਦੀ ਆਸ

ਹੁਣ ਹਸਪਤਾਲ ਵਿੱਚ ਦਾਖਲ ਆਰਤੀ ਨੂੰ ਇੰਤਜ਼ਾਰ ਹੈ ਕਿ ਉਹ ਜਲਦੀ ਤੋਂ ਜਲਦੀ ਠੀਕ ਹੋ ਜਾਏ, ਤਾਂ ਜੋ ਉਹ ਆਪਣੇ ਪੈਰਾਂ 'ਤੇ ਤੁਰ ਸਕੇ ਅਤੇ ਆਪਣੇ ਪਤੀ ਦੇ ਘਰ ਜਾ ਸਕੇ। ਜਦੋਂ ਵੀ ਉਸਦੀ ਹਿੰਮਤ ਜਵਾਬ ਦੇਣ ਲਗਦੀ ਹੈ ਤਾਂ, ਅਵਧੇਸ਼ ਉਸ ਨੂੰ ਹਿੰਮਤ ਦਿੰਦਾ ਹੈ ਅਤੇ ਕਹਿੰਦਾ ਹੈ ਕਿ ਸੱਭ ਕੁਝ ਠੀਕ ਹੋ ਜਾਵੇਗਾ. ਸੱਚਮੁੱਚ, ਉਸ ਵਿਅਕਤੀ ਦੀ ਜ਼ਿੰਦਗੀ ਵਿੱਚ ਸਭ ਕੁੱਝ ਠੀਕ ਹੀ ਰਹੇਗਾ ਜਿਸ ਨੂੰ ਅਜਿਹਾ ਪਤੀ ਮਿਲਿਆ ਹੋਵੇ