ਲਖਨਉ: ਅਯੁੱਧਿਆ ਦਾ ਰਾਮ ਮੰਦਰ ਨਾ ਸਿਰਫ ਵਿਸ਼ਾਲ ਹੋਵੇਗਾ, ਬਲਕਿ ਬਹੁਤ ਮਜ਼ਬੂਤ ਵੀ ਹੋਵੇਗਾ, ਕਿਉਂਕਿ ਇਸ ਇਮਾਰਤ ਦਾ ਡਿਜ਼ਾਇਨ ਅਸਾਨੀ ਨਾਲ ਰਿਐਕਟਰ ਪੈਮਾਨੇ 'ਤੇ 8 ਤੋਂ 10 ਮਾਪ ਦੇ ਭੂਚਾਲ ਦਾ ਸਾਹਮਣਾ ਕਰ ਸਕਦਾ ਹੈ।
ਸਮਰਥਕਾਂ, ਸੰਤਾਂ ਅਤੇ ਪੁਜਾਰੀਆਂ ਦੇ ਸੁਝਾਵਾਂ ਦੇ ਬਾਅਦ ਮੰਦਰ ਦੇ ਪੁਰਾਣੇ ਮਾਡਲ ਨੂੰ ਸੋਧਿਆ ਗਿਆ ਸੀ। ਰਾਮਲਲਾ ਮੰਦਰ ਦੋ ਏਕੜ ਵਿੱਚ ਬਣਾਇਆ ਜਾਵੇਗਾ, ਜਦੋਂ ਕਿ ਬਾਕੀ 67 ਏਕੜ ਵਿੱਚ ਵੱਖ-ਵੱਖ ਕਿਸਮਾਂ ਦੇ ਦਰੱਖਤ, ਅਜਾਇਬ ਘਰ ਅਤੇ ਹੋਰ ਸਬੰਧਤ ਇਮਾਰਤਾਂ ਹੋਣਗੀਆਂ।
ਪ੍ਰਸਤਾਵਿਤ ਰਾਮ ਮੰਦਰ ਉੱਤਰੀ ਭਾਰਤ ਦੀ ਮਸ਼ਹੂਰ ਸ਼ੈਲੀ ਤੋਂ ਬਣਾਇਆ ਜਾਵੇਗਾ। ਉੱਤਰ ਪ੍ਰਦੇਸ਼, ਗੁਜਰਾਤ, ਰਾਜਸਥਾਨ, ਦਿੱਲੀ, ਪੰਜਾਬ, ਹਿਮਾਚਲ, ਜੰਮੂ ਆਦਿ ਵਿੱਚ ਸਥਾਪਤ ਸਾਰੇ ਮੰਦਰ ਇਸ ਸ਼ੈਲੀ ਦੇ ਹਨ। 77 ਸਾਲਾ ਚੰਦਰਕਾਂਤ ਸੋਮਪੁਰਾ ਨੇ ਰਾਮ ਮੰਦਰ ਦਾ ਡਿਜ਼ਾਇਨ ਤਿਆਰ ਕੀਤਾ ਹੈ। ਇੱਥੇ ਇਕੱਠਿਆਂ 10,000 ਸ਼ਰਧਾਲੂ ਦਰਸ਼ਨ ਕਰ ਸਕਣਗੇ। ਰਾਮਲਲਾ ਮੰਦਰ 1000 ਸਾਲਾਂ ਤੋਂ ਵੱਧ ਸਮੇਂ ਤੱਕ ਆਪਣੀ ਸ਼ਾਨੋ-ਸ਼ੌਕਤ ਨੂੰ ਬਣਾਈ ਰੱਖਣ ਦੇ ਯੋਗ ਹੋਵੇਗਾ। ਮੰਦਰ ਲਈ ਪੱਥਰ ਰਾਜਸਥਾਨ ਤੋਂ ਲਿਆਂਦੇ ਗਏ ਹਨ ਅਤੇ ਮੰਦਰ ਦੀ ਲੰਬੀ ਉਮਰ ਨੂੰ ਯਕੀਨੀ ਬਣਾਉਣ ਲਈ 200 ਫੁੱਟ ਡੂੰਘੀ ਖੁਦਾਈ ਤੋਂ ਬਾਅਦ ਮਿੱਟੀ ਦੀ ਪਰਖ ਕੀਤੀ ਗਈ ਸੀ।
ਪਿਛਲੇ ਸਾਲ ਨਵੰਬਰ ਵਿੱਚ, ਸੁਪਰੀਮ ਕੋਰਟ ਨੇ ਅਯੁੱਧਿਆ ਵਿੱਚ ਰਾਮ ਮੰਦਰ ਬਣਾਉਣ ਦਾ ਫੈਸਲਾ ਕੀਤਾ ਸੀ ਅਤੇ ਸੁੰਨੀ ਵਕਫ਼ ਬੋਰਡ ਨੂੰ ਨਵੀਂ ਮਸਜਿਦ ਬਣਾਉਣ ਲਈ ਪੰਜ ਏਕੜ ਦੇ ਬਦਲਵੇਂ ਪਲਾਟ ਅਲਾਟ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ।
