ਮੋਦੀ ਦੇ ਕੈਮਰਾ ਅਤੇ ਈ-ਮੇਲ ਵਾਲੇ ਬਿਆਨ 'ਤੇ ਪ੍ਰਕਾਸ਼ ਰਾਜ ਨੇ ਕਿਹਾ...

ਤਮਿਲ ਫ਼ਿਲਮਾਂ ਦੇ ਮਸ਼ਹੂਰ ਅਦਾਕਾਰ ਅਤੇ ਬੈਂਗਲੁਰੂ ਲੋਕ ਸਭਾ ਸੀਟ ਤੋਂ ਆਜ਼ਾਦ ਉਮੀਦਵਾਰ ਪ੍ਰਕਾਸ਼ ਰਾਜ ਨੇ ਪ੍ਰਧਾਨ ਮੰਤਰੀ ਮੋਦੀ ਨੇ ਤੰਜ ਕੱਸਿਆ ਹੈ। ਪ੍ਰਕਾਸ਼ ਰਾਜ ਨੇ ਮੋਦੀ ਦੇ ਈ-ਮੇਲ ਅਤੇ ਡਿਜੀਟਲ ਕੈਮਰੇ ਵਾਲੇ ਬਿਆਨ 'ਤੇ ਉਨ੍ਹਾਂ ਦਾ ਮਜ਼ਾਕ ਉਡਾਇਆ ਹੈ।

ਨਵੀਂ ਦਿੱਲੀ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਬਾਲਾਕੋਟ 'ਤੇ ਦਿੱਤੇ ਬਿਆਨ ਤੋਂ ਬਾਅਦ ਉਨ੍ਹਾਂ ਦਾ ਕਾਫ਼ੀ ਮਜ਼ਾਕ ਉਡਾਇਆ ਗਿਆ। ਹੁਣ ਇੱਕ ਵਾਰ ਮੁੜ ਉਨ੍ਹਾਂ ਦੀ ਇੱਕ ਵੀਡੀਓ ਵਾਇਰਲ ਹੋ ਰਹੀ ਹੈ ਜਿਸ ਵਿੱਚ ਉਹ ਕਹਿ ਰਹੇ ਹਨ ਕਿ ਉਨ੍ਹਾਂ ਸਾਲ 1987-88 ਵਿੱਚ ਈ-ਮੇਲ ਅਤੇ ਡਿਜੀਟਲ ਕੈਮਰੇ ਦੀ ਵਰਤੋਂ ਕੀਤੀ ਸੀ। ਉਨ੍ਹਾਂ ਦੇ ਇਸੇ ਬਿਆਨ 'ਤੇ ਅਦਾਕਾਰ ਪ੍ਰਕਾਸ਼ ਰਾਜ ਨੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ।

ਪ੍ਰਕਾਸ਼ ਰਾਜ ਨੇ ਟਵੀਟ ਕਰਦਿਆਂ ਲਿਖਿਆ, "ਸਾਨੂੰ ਜਿੱਥੋਂ ਤੱਕ ਜਾਣਕਾਰੀ ਹੈ ਤਾਂ ਅਜਿਹਾ 1990 ਦੇ ਦਹਾਕੇ 'ਚ ਹੋਇਆ ਸੀ ਪਰ ਸਾਡੇ ਚੌਂਕੀਦਾਰ ਕੋਲ ਡਿਜੀਟਲ ਕੈਮਰੇ ਅਤੇ ਈ-ਮੇਲ ਦੀ ਜਾਣਕਾਰੀ 1980 ਦੇ ਦਹਾਕੇ 'ਚ ਹੀ ਹੋ ਗਈ ਸੀ। ਹਾਲਾਂਕਿ ਉਹ ਉਸ ਸਮੇਂ ਜੰਗਲ 'ਚ ਸਨ, ਮਹਾਭਾਰਤ ਪੜ੍ਹਦੇ ਹੋਏ...ਬੱਦਲਾਂ 'ਚ ਘਿਰੇ...ਉੁੱਲੂ ਬਨਾਉਣ ਦੀ ਵੀ ਹੱਦ ਹੁੰਦੀ ਹੈ।"

ਪ੍ਰਕਾਸ਼ ਰਾਜ ਤੋਂ ਇਲਾਵਾ ਹੋਰ ਕਈ ਸਿਆਸੀ ਆਗੂਆਂ ਨੇ ਟਵੀਟ ਕਰਕੇ ਮੋਦੀ ਦੇ ਇਸ ਬਿਆਨ ਦਾ ਮਜ਼ਾਕ ਉਡਾਇਆ। ਉਨ੍ਹਾਂ ਪ੍ਰਧਾਨ ਮੰਤਰੀ ਮੋਦੀ ਅੱਗੇ ਕਈ ਤਰ੍ਹਾਂ ਦੇ ਸਵਾਲ ਵੀ ਰੱਖੇ ਹਨ।

ਜ਼ਿਕਰਯੋਗ ਹੈ ਕਿ ਪ੍ਰਧਾਨ ਮੰਤਰੀ ਨੇ ਇੱਕ ਇੰਟਰਵਿਊ ਦੌਰਾਨ ਕਿਹਾ ਸੀ, "ਸ਼ਾਇਦ, ਮੈਂ ਪਹਿਲੀ ਵਾਰ ਡਿਜੀਟਲ ਕੈਮਰੇ ਦੀ ਵਰਤੋਂ 1987-1988 'ਚ ਕੀਤੀ ਸੀ ਅਤੇ ਉਸ ਸਮੇਂ ਘੱਟ ਹੀ ਲੋਕਾਂ ਕੋਲ ਈ-ਮੇਲ ਹੁੰਦੀ ਸੀ। ਉਸ ਸਮੇਂ ਵਿਰਾਮ ਗਾਮ ਤਹਿਸੀਲ ਵਿਚ ਅਡਵਾਨੀ ਜੀ ਦੀ ਰੈਲੀ ਸੀ। ਮੈਂ ਡਿਜੀਟਲ ਕੈਮਰੇ 'ਤੇ ਉਨ੍ਹਾਂ ਦੀ ਫ਼ੋਟੋ ਖਿੱਚ ਕੇ ਦਿੱਲੀ ਭੇਜੀ ਸੀ। ਆਪਣੇ ਇਸ ਬਿਆਨ ਤੋਂ ਬਾਅਦ ਉਹ ਸੋਸ਼ਲ ਮੀਡੀਆ 'ਤੇ ਮਜ਼ਾਕ ਦਾ ਪਾਤਰ ਬਣ ਗਏ ਹਨ।