ਨਵੀਂ ਦਿੱਲੀ: ਕੁਝ ਸਾਲ ਪਹਿਲਾਂ ਅਰੁਣਾਚਲ ਪ੍ਰਦੇਸ਼ ਦੇ ਤਵਾਂਗ ਨੇੜੇ ਚੋਟਾ ਕਿਲ੍ਹੇ ਨੇੜੇ ਇੱਕ ਭਾਰਤੀ ਫ਼ੌਜ ਦਾ ਇੱਕ ਜਵਾਨ ਲੰਬੀ ਪੈਦਲ ਗਸ਼ਤ ਤੋਂ ਬਾਅਦ ਥੱਕ ਕੇ ਛਾਂ ਵਿੱਚ ਬੈਠ ਗਿਆ। ਇਸ ਖੇਤਰ ਵਿੱਚ ਭਾਰਤੀ ਅਤੇ ਚੀਨੀ ਫ਼ੌਜਾਂ ਮੌਜੂਦ ਰਹਿੰਦੀਆਂ ਹਨ। ਅਚਾਨਕ ਪੀਐਲਏ ਦੇ ਦੋ ਸਿਪਾਹੀ ਇੱਕ ਹਿੰਦੀ ਫ਼ਿਲਮ ਦਾ ਹਿੱਟ ਗਾਣਾ ‘ਪ੍ਰਦੇਸੀ ਪ੍ਰਦੇਸੀ’ ਗਾਉਂਦੇ ਆ ਗਏ। ਦੋਵਾਂ ਨੇ ਭਾਰਤੀ ਫ਼ੌਜ ਦੇ ਅਧਿਕਾਰੀ ਵੱਲ ਚੰਗੀ ਤਰ੍ਹਾਂ ਵੇਖਿਆ ਤੇ ਅੱਗੇ ਚਲੇ ਗਏ। ਅਜੇ ਵੀ ਫੌਜ ਵਿੱਚ ਕੰਮ ਕਰ ਰਹੇ ਉਕਤ ਅਧਿਕਾਰੀ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਈਟੀਵੀ ਭਾਰਤ ਨੂੰ ਦੱਸਿਆ ਕਿ ਪੀਐਲਏ ਦੇ ਸਿਪਾਹੀਆਂ ਨੂੰ ਗੀਤ ਗਾਉਂਦੇ ਵੇਖ ਕੇ ਉਸ ਨੂੰ ਭਾਰਤ ਦੀ ਨਰਮ ਤਾਕਤ ਦਾ ਅਹਿਸਾਸ ਹੋ ਗਿਆ। ਇਹ ਭਾਰਤੀ ਫ਼ਿਲਮੀ ਗਾਣਿਆਂ ਰਾਹੀਂ ਚੀਨ ਉੱਤੇ ਭਾਰਤ ਦੀ ਜਿੱਤ ਸੀ।
ਇਹ ਭਾਰਤੀ ਸੰਗੀਤ ਦੀ ਪ੍ਰਸਿੱਧੀ ਨੂੰ ਦਰਸਾਉਂਦਾ ਹੈ
ਅਧਿਕਾਰੀ ਨੇ ਕਿਹਾ ਕਿ ਪੂਰਬੀ ਲੱਦਾਖ ਵਿੱਚ ਵੱਧ ਰਹੇ ਤਣਾਅ ਦੇ ਵਿਚਕਾਰ, ਇੱਕ ਖ਼ਬਰ ਹੈ ਕਿ ਚੀਨੀ ਆਰਮੀ (ਪੀ.ਐਲ.ਏ.) ਪੈਨਗੋਂਗ ਤਸੋ ਵਿੱਚ ਧਮਾਕੇਦਾਰ ਗਾਣੇ ਵਜਾ ਰਹੀ ਹੈ। ਦੋਵੇਂ ਫ਼ੌਜਾਂ ਇਸ ਖੇਤਰ ਵਿੱਚ ਇੱਕ ਦੂਜੇ ਤੋਂ ਤਕਰੀਬਨ 200 ਮੀਟਰ ਦੀ ਦੂਰੀ 'ਤੇ ਹਨ। ਜੇਕਰ ਚੀਨੀ ਫ਼ੌਜ ਭਾਰਤੀ ਸੈਨਿਕਾਂ ਦਾ ਧਿਆਨ ਭਟਕਾਉਣ ਅਤੇ ਉਨ੍ਹਾਂ ਨੂੰ ਮਨੋਵਿਗਿਆਨਕ ਯੁੱਧ ਵਿੱਚ ਹਰਾਉਣ ਦੇ ਤਰੀਕੇ ਵਜੋਂ ਇਸ ਤਰ੍ਹਾਂ ਕਰ ਰਹੀ ਹੈ, ਤਾਂ ਇਹ ਇੱਕ ਵਿਅਰਥ ਯਤਨ ਹੈ। ਸਾਡੇ ਸੈਨਿਕ ਚੰਗੀ ਤਰ੍ਹਾਂ ਜਾਣਦੇ ਹਨ ਕਿ ਪੀਐਲਏ ਕੀ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਹਾਂ, ਇਹ ਨਿਸ਼ਚਤ ਰੂਪ ਵਿੱਚ ਭਾਰਤੀ ਸੰਗੀਤ ਦੀ ਪ੍ਰਸਿੱਧੀ ਨੂੰ ਦਰਸਾਉਂਦਾ ਹੈ। ਚੀਨੀ ਸਚਮੁੱਚ ਇਸ ਨੂੰ ਪਸੰਦ ਕਰਦੇ ਹਨ।
ਲੱਦਾਖ ਵਿੱਚ ਦੋਵੇਂ ਫ਼ੌਜਾਂ ਨੂੰ ਮੌਸਮ ਨਾਲ ਲੜਨਾ ਪਵੇਗਾ
ਇੱਕ ਸੀਨੀਅਰ ਸੈਨਿਕ ਸੂਤਰ ਨੇ ਕਿਹਾ ਕਿ ਇਹ ਬਹੁਤ ਵੱਡੀ ਮੂਰਖ਼ਤਾ ਹੋਵੇਗੀ ਜੇਕਰ ਚੀਨੀ ਸੋਚਦੇ ਕਿ ਗਾਣੇ ਸੁਣਾ ਕੇ ਸਾਡੇ ਸੈਨਿਕਾਂ ਨੂੰ ਭਟਕਾ ਦੇਣਗੇ ਜਾਂ ਉਨ੍ਹਾਂ ਦੇ ਮਨੋਬਲ ਨੂੰ ਘਟਾ ਦੇਣਗੇ। ਸਾਡੇ ਕੋਲ ਮਜ਼ਬੂਤ ਅਤੇ ਪੇਸ਼ੇਵਰ ਸੈਨਿਕ ਹਨ ਜੋ ਅੱਤਵਾਦ ਵਿਰੁੱਧ ਲਗਾਤਾਰ ਲੜਦੇ ਰਹੇ ਹਨ। ਭਾਰਤੀ ਸੈਨਿਕਾਂ ਕੋਲ ਸਿਆਚਿਨ ਦੀ ਵੱਧ ਉੱਚਾਈ 'ਤੇ ਰਹਿਣ ਦਾ ਲੰਮਾ ਤਜਰਬਾ ਵੀ ਹੈ। ਪੀਐਲਏ ਕੋਲ ਇਸ ਸਭ ਦਾ ਤਜਰਬਾ ਨਹੀਂ ਹੈ, ਪਰ ਉਨ੍ਹਾਂ ਨੂੰ ਵੀ ਸਾਡੇ ਵਾਂਗ ਲੱਦਾਖ ਦੇ ਮੌਸਮ ਨਾਲ ਲੜਣਾ ਪਵੇਗਾ।
ਸਭ ਤੋਂ ਮਹੱਤਵਪੂਰਣ ਭੋਜਨ ਅਤੇ ਸਾਧਣਾਂ ਦੀ ਸਪਲਾਈ
ਅਸੀਂ ਹਰ ਤਰ੍ਹਾਂ ਨਾਲ ਤਿਆਰ ਹਾਂ। ਪਾਣੀ ਦੇ ਭੰਡਾਰ, ਬਾਲਣ ਦੇ ਭੰਡਾਰ, ਟੈਂਕ ਅਤੇ ਬਖਤਰਬੰਦ ਵਾਹਨਾਂ ਲਈ ਵਾਧੂ ਪੁਰਜ਼ੇ, ਨਿੱਘੇ ਰਹਿਣ ਵਾਲੇ ਕੁਆਰਟਰਸ, ਕਾਫ਼ੀ ਅਸਲ੍ਹਾ ਭੰਡਾਰ, ਮੈਡੀਕਲ ਸਹੂਲਤਾਂ ਆਦਿ ਸਭ ਤਿਆਰ ਹਨ। ਸਰਦੀਆਂ ਵਿੱਚ, ਦੋਵਾਂ ਫ਼ੌਜਾਂ ਲਈ ਸਭ ਤੋਂ ਮਹੱਤਵਪੂਰਣ ਭੋਜਨ ਅਤੇ ਸਾਜ਼ੋ-ਸਾਮਾਨ ਦੀ ਸਪਲਾਈ ਅਤੇ ਦੇਖਭਾਲ ਹੋਵੇਗੀ। ਤਣਾਅ ਵਾਲੇ ਇਲਾਕਿਆਂ ਵਿੱਚ ਤਕਰੀਬਨ 40 ਫੁੱਟ ਬਰਫ਼ ਵੇਖੀ ਜਾਂਦੀ ਹੈ, ਜਦੋਂ ਕਿ ਤਾਪਮਾਨ 0 ਤੋਂ 30-40 ਡਿਗਰੀ ਘੱਟ ਹੁੰਦਾ ਹੈ।
ਲੰਬੇ ਸਮੇਂ ਤੱਕ ਨਹੀਂ ਰਹਿ ਸਕਦੀ ਚੀਨੀ ਫ਼ੌਜ
ਰਿਪੋਰਟਾਂ ਵਿੱਚ ਪੀਐਲਏ ਦੀਆਂ ਹੋਰ ਚਾਲਾਂ ਬਾਰੇ ਵੀ ਖੁਲਾਸਾ ਹੋਇਆ ਹੈ। ਪੂਰਬੀ ਲੱਦਾਖ ਦੇ ਚੁਸ਼ੂਲ ਵਿੱਚ ਆਪਣੇ ਮੋਲਡੋ ਬੇਸ ਤੋਂ ਚੀਨੀ ਫ਼ੌਜ ਲਾਊਡਸਪੀਕਰਾਂ ਦੇ ਜਰੀਏ ਭਾਰਤੀ ਰਾਜਨੀਤਿਕ ਲੀਡਰਸ਼ਿਪ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹਨ। ਇੱਥੋਂ ਤੱਕ ਕਿ ਸਰਕਾਰੀ ਮਾਲਕੀਅਤ ਵਾਲੇ ਚੀਨੀ ਟੀ ਵੀ ਚੈਨਲ ਅਤੇ ਸੋਸ਼ਲ ਮੀਡੀਆ ਭਾਰਤੀ ਰਾਜਨੀਤਿਕ ਲੀਡਰਸ਼ਿਪ ਨੂੰ ਕੋਸਦੇ ਹਨ। ਡਰੋਨ ਭਾਰਤ ਨਾਲ ਤਿੱਬਤੀ ਸਰਹੱਦ 'ਤੇ ਤਾਇਨਾਤ ਪੀਐਲਏ ਦੇ ਫ਼ੌਜੀਆਂ ਲਈ ਗਰਮ ਭੋਜਨ ਲਿਆਉਂਦਾ ਹੈ। ਸੀਨੀਅਰ ਫ਼ੌਜੀ ਅਧਿਕਾਰੀਆਂ ਨੇ ਕਿਹਾ ਕਿ ਚੀਨੀ ਫ਼ੌਜੀ ਜ਼ਿਆਦਾਤਰ ਸ਼ਹਿਰੀ ਖੇਤਰ ਤੋਂ ਹਨ ਅਤੇ ਅਜਿਹੀਆਂ ਸਥਿਤੀਆਂ ਵਿੱਚ ਲੰਬਾ ਸਮਾਂ ਨਹੀਂ ਰਹਿ ਸਕਦੇ। ਇਸ ਲਈ ਚੀਨੀ ਸੈਨਿਕਾਂ ਤੇ ਚੀਨੀ ਮੀਡੀਆ ਲਈ ਇਹ ਸਭ ਵੱਡੀਆਂ ਗੱਲਾਂ ਹਨ।
