ਚੀਨ ਨੇ LAC 'ਤੇ ਭੇਜੇ 20,000 ਸੈਨਿਕ

ਭਾਰਤ ਅਤੇ ਚੀਨ ਵਿਚਾਲੇ ਚੱਲ ਰਹੇ ਸਰਹੱਦ ਤਕਤਾਰ ਦੌਰਾਨ, ਪੀਪਲਜ਼ ਲਿਬਰੇਸ਼ਨ ਆਰਮੀ ਨੇ ਅਸਲ ਕੰਟਰੋਲ ਰੇਖਾ ਦੇ ਨਾਲ 20,000 ਤੋਂ ਵੱਧ ਸੈਨਿਕ ਤਾਇਨਾਤ ਕੀਤੇ ਹਨ।

ਨਵੀਂ ਦਿੱਲੀ: ਪੀਪਲਜ਼ ਲਿਬਰੇਸ਼ਨ ਆਰਮੀ (ਪੀ.ਐਲ.ਏ.) ਨੇ ਪੂਰਬੀ ਲੱਦਾਖ਼ ਸੈਕਟਰ ਦੇ ਨੇੜੇ ਅਸਲ ਕੰਟਰੋਲ ਰੇਖਾ (ਐਲ.ਏ.ਸੀ.) ਦੇ ਨਾਲ ਲਗਭਗ 20,000 ਫ਼ੌਜੀਆਂ ਨੂੰ ਤਾਇਨਾਤ ਕਰ ਦਿੱਤਾ ਹੈ। ਚੀਨੀ ਫ਼ੌਜੀਆਂ ਨੂੰ ਉੱਚ ਗਤੀਸ਼ੀਲ ਵਾਹਨ ਅਤੇ ਹਥਿਆਰਾਂ ਦੇ ਨਾਲ ਭੇਜਿਆ ਗਿਆ ਹੈ ਜਿਨ੍ਹਾਂ ਦੇ 48 ਘੰਟਿਆਂ ਵਿੱਚ ਭਾਰਤ ਫਰੰਟ 'ਤੇ ਆਉਣ ਦੀ ਸਮਰੱਥਾ ਹੈ।

ਭਾਰਤ ਸਿਨਜਿਆਂਗ ਵਿੱਚ ਤਾਇਨਾਤ 10,000 ਤੋਂ 12,000 ਚੀਨੀ ਸੈਨਿਕਾਂ ਦੀਆਂ ਗਤੀਵਿਧੀਆਂ 'ਤੇ ਨਜ਼ਰ ਰੱਖ ਰਿਹਾ ਹੈ। ਚੀਨੀ ਫ਼ੌਜ ਨੇ ਪੂਰਬੀ ਲੱਦਾਖ਼ ਸੈਕਟਰ ਵਿੱਚ ਐਲਏਸੀ ਦੇ ਨਾਲ ਲਗਭਗ 20,000 ਫੌਜੀਆਂ ਨੂੰ ਤਾਇਨਾਤ ਕਰ ਦਿੱਤਾ ਹੈ। ਇੱਕ ਹੋਰ ਡਿਵੀਜ਼ਨ (10,000 ਸੈਨਿਕ) ਹੈ ਜੋ ਉੱਤਰੀ ਸਿਨਜਿਆਂਗ ਪ੍ਰਾਂਤ ਵਿੱਚ ਲਗਭਗ 1000 ਕਿਲੋਮੀਟਰ ਦੀ ਦੂਰੀ 'ਤੇ ਲਾਈ ਗਈ ਹੈ।

ਮੁੱਖ ਸਰਕਾਰੀ ਸੂਤਰਾਂ ਨੇ ਕਿਹਾ,”ਚੀਨ ਦੀ ਤਰਫ਼ੋਂ ਸਮਤਲ ਇਲਾਕਿਆਂ ਕਾਰਨ ਉਹ 48 ਘੰਟਿਆਂ ਦੇ ਸਮੇਂ ਵਿੱਚ ਸਾਡੇ ਸਰਹੱਦਾਂ ਤੱਕ ਪਹੁੰਚਣ ਲਈ ਲਾਮਬੰਦ ਹੋ ਸਕਦੇ ਹਨ।”

ਜ਼ਿਕਰ ਕਰ ਦਈਏ ਭਾਰਤ ਵੱਲੋਂ ਵੀ ਲੱਦਾਖ਼ ਵਿੱਚ ਲਾਮ ਲਸ਼ਕਰ ਭੇਜਿਆ ਜਾ ਰਿਹਾ ਹੈ। ਇਹ ਸਭ 15-16 ਜੂਨ ਦੀ ਦਰਮਿਆਨੀ ਰਾਤ ਨੂੰ ਭਾਰਤ ਅਤੇ ਚੀਨ ਦੀ ਫ਼ੌਜ ਵਿੱਚ ਹੋਏ ਵਿਵਾਦ ਤੋਂ ਬਾਅਦ ਸ਼ੁਰੂੂ ਹੋਇਆ ਹੈ। ਇਸ ਵਿਵਾਦ ਵਿੱਚ ਭਾਰਤੀ ਫ਼ੌਜ ਦੇ 20 ਜਵਾਨ ਸ਼ਹੀਦ ਹੋ ਗਏ ਸਨ। ਭਾਰਤ ਵੱਲੋਂ ਇਹ ਕਿਹਾ ਜਾ ਰਿਹਾ ਹੈ ਕਿ ਇਸ ਵਿਵਾਦ ਵਿੱਚ ਚੀਨ ਦੇ ਕਈ ਸਿਪਾਹੀ ਮਾਰੇ ਗਏ ਹਨ ਪਰ ਚੀਨ ਵੱਲੋਂ ਹਾਲੇ ਤੱਕ ਇਸ 'ਤੇ ਕੋਈ ਬਿਆਨ ਸਾਹਮਣੇ ਨਹੀਂ ਆਇਆ ਹੈ।