'ਕਾਂਗਰਸ ਦੇ 70 ਸਾਲਾਂ ਦਾ ਹਿਸਾਬ ਮੰਗਣ ਵਾਲੀ ਭਾਜਪਾ ਪੀਐਮ ਕੇਅਰਜ਼ ਫੰਡ 'ਤੇ ਚੁੱਪ'

ਕਾਂਗਰਸ ਦੇ ਬੁਲਾਰੇ ਜੈਵੀਰ ਸ਼ੇਰਗਿੱਲ ਨੇ ਪ੍ਰਧਾਨ ਮੰਤਰੀ ਕੇਅਰਜ਼ ਫੰਡ ਦਾ ਵੇਰਵਾ ਸਾਂਝਾ ਨਾ ਕਰਨ ‘ਤੇ ਸੱਤਾਧਾਰੀ ਭਾਜਪਾ ਨੂੰ ਕਰੜੇ ਹੱਥੀਂ ਲਿਆ। ਉਨ੍ਹਾਂ ਕਿਹਾ ਕਿ 70 ਸਾਲਾਂ ਦੇ ਹਿਸਾਬ ਦੀ ਮੰਗ ਕਰਨ ਵਾਲੀ ਭਾਜਪਾ ਪੀਐਮ ਕੇਅਰਜ਼ ਫੰਡ 'ਤੇ ਚੁੱਪੀ ਧਾਰ ਕੇ ਬੈਠੀ ਹੈ।

ਨਵੀਂ ਦਿੱਲੀ: ਮਹਾਂਮਾਰੀ ਦੇ ਚੱਲਦੇ ਪੀਐਮ ਕੇਅਰ ਫੰਡ ਵਿੱਚ ਦੇਸ਼ ਭਰ ਦੇ ਲੋਕਾਂ ਵੱਲੋਂ ਦਾਨ ਕੀਤਾ ਗਿਆ ਸੀ, ਜਿਸ ਦਾ ਵਿਰੋਧੀ ਧਿਰਾਂ ਵੱਲੋਂ ਹਿਸਾਬ ਮੰਗਿਆ ਜਾ ਰਿਹਾ ਹੈ। ਕਾਂਗਰਸ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 'ਤੇ ਪੀਐਮ ਕੇਅਰਜ਼ ਫੰਡ ਨੂੰ ਲੈ ਕੇ ਭਾਜਪਾ ਨੂੰ ਕਰੜੇ ਹੱਥੀ ਲੈਂਦਿਆਂ ਪਾਰਟੀ 'ਤੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਪ੍ਰਧਾਨ ਮੰਤਰੀ ਦਫ਼ਤਰ (ਪੀ.ਐੱਮ.ਓ.) ਨੇ ਸੂਚਨਾ ਅਧਿਕਾਰ ਐਕਟ (ਆਰ.ਟੀ.ਆਈ.) ਦੇ ਅਧੀਨ ਫੰਡ ਦਾ ਵੇਰਵਾ ਸਾਂਝਾ ਕਰਨ ਤੋਂ ਇਨਕਾਰ ਕਿਉਂ ਕਰ ਰਿਹਾ ਹੈ।

ਕਾਂਗਰਸ ਦੇ ਬੁਲਾਰੇ ਜੈਵੀਰ ਸ਼ੇਰਗਿੱਲ ਨੇ ਕਿਹਾ ਕਿ ਭਾਜਪਾ ਕਾਂਗਰਸ ਤੋਂ 70 ਸਾਲਾਂ ਦੇ ਹਿਸਾਬ ਦੀ ਮੰਗ ਕਰਦੀ ਹੈ ਪਰ ਜਦੋਂ ਪ੍ਰਧਾਨ ਮੰਤਰੀ ਕੇਅਰ ਫੰਡ ਦਾ ਵੇਰਵਾ ਮੰਗਿਆ ਗਿਆ ਤਾਂ ਉਹ ਬੁਰਾ ਮਹਿਸੂਸ ਕਰ ਰਹੇ ਹਨ।

ਸ਼ੇਰਗਿੱਲ ਨੇ ਕਿਹਾ, "ਸੱਚੀ ਤਸਵੀਰ ਇਹ ਹੈ ਕਿ ਪੀਐਮਓ ਨੇ ਆਰਟੀਆਈ ਤਹਿਤ ਵੇਰਵੇ ਸਾਂਝੇ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਗੁਪਤਤਾ ਦੇ ਨਾਂਅ 'ਤੇ CAG ਆਡਿਟ-ਫੰਡ ਨਾ ਕਰਵਾਉਣ ਦਾ ਮਤਲਬ ਹੈ 'ਖਾਉਂਗਾ ਅਤੇ ਡੀਟੇਲ ਨਹੀਂ ਬਤਾਉਂਗਾ'।"

ਉਨ੍ਹਾਂ ਕਿਹਾ, “ਭਾਰਤ ਅਨਲੌਕ ਮੋਡ ਵਿੱਚ ਹੈ ਅਤੇ ਇਹ ਅਨਲੌਕ ਭਾਜਪਾ 'ਤੇ ਵੀ ਲਾਗੂ ਹੋਣਾ ਚਾਹੀਦਾ ਹੈ ਤਾਂ ਜੋ ਉਹ ਪੀਐਮ ਕੇਅਰ ਫੰਡ ਨੂੰ ਵੀ ਅਨਲੌਕ ਕਰਕੇ ਉਸ ਦਾ ਵੇਰਵਾ ਦੇਣ।”

ਉਨ੍ਹਾਂ ਕਿਹਾ ਕਿ ਪੀਐਮ ਕੇਅਰ ਫੰਡ ਦੇ ਸਟਿੱਕਰ ਨਾਲ ਵੈਂਟੀਲੇਟਰ ਦੀ ਤਸਵੀਰ ਸਾਂਝੀ ਕਰਨ ਨਾਲ 10,000 ਕਰੋੜ ਰੁਪਏ ਦੇ ਚੰਦੇ ਨੂੰ ਜਾਇਜ਼ ਠਹਿਰਾਉਣਾ “ਇੱਕ ਖੁਰਲੀ 'ਚ ਸੂਈ” ਲੱਭਣ ਵਾਂਗ ਹੈ।

ਵਿੱਤ ਰਾਜ ਮੰਤਰੀ ਅਨੁਰਾਗ ਠਾਕੁਰ ਨੇ ਆਪਣੇ ਟਵਿੱਟਰ ਹੈਂਡਲ 'ਤੇ ਇੱਕ ਵੈਂਟੀਲੇਟਰ ਦੀ ਵੀਡੀਓ ਤਸਵੀਰ ਸਾਂਝੀ ਕੀਤੀ ਜਿਸ 'ਤੇ ਪ੍ਰਧਾਨ ਮੰਤਰੀ ਕੇਅਰਜ਼ ਲਿਖਿਆ ਹੋਇਆ ਹੈ।