Eid Mubarak: ବାଲୁକା କଳାରେ ଇଦ୍ ଶୁଭେଚ୍ଛା ଜଣାଇଲେ ସୁଦର୍ଶନ ପଟ୍ଟନାୟକ
ପୁରୀ: ଆଜି ଇସଲାମ ଧର୍ମାବଲମ୍ବୀଙ୍କ ପବିତ୍ର ଇଦ୍ ପର୍ବ ବା ଇଦ୍-ଉଲ୍-ଫିତର । ଦାନ ଓ ଧର୍ମର ପର୍ବ ଇଦ୍ ପାଳନ କରୁଛନ୍ତି ମୁସଲମାନ ସମ୍ପ୍ରଦାୟ । ଏନେଇ ସକାଳୁ ସକାଳୁ ମସଜିଦଗୁଡିକରେ ସମୁହ ନମାଜ ପାଠ ସହ ପରସ୍ପରକୁ ଇଦ୍ ମୁବାରକ ଜଣାଉଛନ୍ତି ମୁସଲମାନ ଭାଇ-ଭାଉଣୀ । ଏହି ଅବସରରେ ବାଲୁକା ଚିତ୍ରକଳା ମାଧ୍ୟମରେ ଇଦ୍ର ଶୁଭେଚ୍ଛା ଜଣାଇଛନ୍ତି ବାଲୁକା ଚିତ୍ରଶିଳ୍ପୀ ସୁଦର୍ଶନ ପଟ୍ଟନାୟକ । ସେ ପୁରୀ ନିଳାଦ୍ରୀ ବିଚରେ ଏକ ସୁନ୍ଦର ବାଲୁକା ଚିତ୍ରକଳା ତିଆରି କରିଛନ୍ତି । ଯେଉଁଥିରେ ଲେଖା ହୋଇଛି ଇଦ୍ ମୁବାରକ । ଶୁକ୍ରବାର ଚାନ୍ଦ ଦେଖାଯିବା ପରେ ଆଜି ଇଦ ଉଲ୍ ଫିତର ମନାଉଛନ୍ତି ମୁସମାନ ସମ୍ପ୍ରଦାୟ । ରମଜାନ ମାସ ଶେଷ ପରେ ଆଜି ଇଦ ପର୍ବ ପାଳନ କରାଯାଉଛି । ଇସଲାମ ଧର୍ମର ସବୁଠୁ ପବିତ୍ର ମାସ ରମଜାନ । ମୁସଲମାନ ସମ୍ପ୍ରଦାୟର ଲୋକେ ଆଲ୍ଲାଙ୍କୁ ଉପାସନା କରି ଏହି ମାସରେ ରୋଜା ରଖିଥାନ୍ତି । ରମଜାନ ମାସରେ ସମସ୍ତ ଇସଲାମ ସମ୍ପ୍ରଦାୟର ଭାଇ ଭଉଣୀମାନେ ମାସ ସାରା ରୋଜା ରଖି ଦିନକୁ 5 ଥର ନମାଜ ପାଠ କରିଥାନ୍ତି ।
ଇଟିଭି ଭାରତ, ପୁରୀ