ନରହନ୍ତା ଭାଲୁକୁ ପିଟି ପିଟି ମାରିଦେଲେ ଲୋକେ

ନବରଙ୍ଗପୁର: ପୁଣି ଘଟିଛି ମଣିଷ ଭାଲୁ ସଂଘର୍ଷ  । ଆଉ ଚାଲିଯାଇଛି ଉଭୟ ମଣିଷ ଓ ଭାଲୁର ଜୀବନ  ।   ନବରଙ୍ଗପୁରରେ ଭାଲୁ ସହ ଲଢେ଼ଇ କରି ବ୍ରିଜେଶ ଦ୍ଵିବେଦୀ ନାମକ ବ୍ୟକ୍ତି ଜୀବନ ହରାଇଛନ୍ତି  । ତାଙ୍କ ଘର ମଧ୍ୟପ୍ରଦେଶ ରାଜ୍ୟର ରାମନଗର ଥାନା ଅନ୍ତର୍ଗତ କରହିୟା ଗ୍ରାମର ବୋଲି ଜଣାପଡିଛି । ନବରଙ୍ଗପୁର ଵ୍ଳକ ଭତରା ସିଉନି ପଞ୍ଚାୟତ ଦେଇ ଯାଇଥିବା ଭାରତ ମାଳା ପ୍ରକଳ୍ପର ରାୟପୁର - ବିଶାଖାପାଟଣମ ନିର୍ମାଣାଧୀନ ଜାତୀୟ ରାଜପଥରେ ପେଟି ଠିକାଦାର ଭାବେ ନିୟୋଜିତ ଥିଲେ ।  ରାସ୍ତା ପାର୍ଶ୍ଵରେ ଠିକା କ୍ୟାମ୍ପରେ ଶ୍ରମିକଙ୍କ ସହ ରହୁଥିଲେ । ଆଜି ଭୋରରୁ ଶୌଚ ପାଇଁ ଯିବାକୁ ବାହାରିଥିବା ବେଳେ ଭାଲୁ ହାବୁଡ଼ରେ ପଡ଼ିଥିଲେ । 

ଏହା ମଧ୍ୟ ପଢନ୍ତୁ...ରାତି ହେଲେ ଘରେ ପଶୁଛି ଭାଲୁ, ଲୋକେ ଭୟଭୀତ

ଏଭଳି କି ଭାଲୁ କବଳରୁ ମୁକୁଳିବା ପାଇଁ ଭାଲୁ ସହ ଦୀର୍ଘ ସମୟ ଧରି ଲଢେ଼ଇ କରିଥିଲେ । ଶ୍ରମିକ ଓ ଗାଁ ଲୋକ ଭାଲୁକୁ ଘଉଡେଇଵା ପାଇଁ ଉଦ୍ୟମ କରିଥିଲେ । କିନ୍ତୁ କୌଣସି ସୁଫଳ ମିଳି ନ ଥିଲା  । ଜଙ୍ଗଲୀ ଭାଲୁର ଶିକାରରେ ଠିକାଦାର ଜଣକ ଘଟଣା ସ୍ଥଳରେ ମୃତ୍ୟୁ ଘଟିଥିଲା । ଘଟଣାସ୍ଥଳରେ ବନବିଭାଗ କର୍ମଚାରୀ ଓ ପୋଲିସ ପହଞ୍ଚି ଶବ ଜବତ କରିବା ସହ ୩୩/୨୦୨୩ ଏକ ଅପମୃତ୍ୟୁ ମାମଲା କରିବା ସହ ତଦନ୍ତ ଆରମ୍ଭ କରିଛନ୍ତି । ଶବ ବ୍ୟବଚ୍ଛେଦ ନିମନ୍ତେ ଜିଲ୍ଲା ମୁଖ୍ୟ ଚିକିତ୍ସାଳୟ ପଠାଯାଇଛି । ଅନ୍ୟ ପକ୍ଷରେ ଉତ୍ୟକ୍ତ ଗ୍ରାମବାସୀ ନରହନ୍ତା ଭାଲୁକୁ ପିଟି ପିଟି ମାରିଦେବା ସହ ଭିଡ଼ିଓ ଭାଇରଲ କରିଛନ୍ତି ।

ଇଟିଭି ଭାରତ, ନବରଙ୍ଗପୁର