ଜମି ଅଧିଗ୍ରହଣରେ ଜିଲ୍ଲାପାଳଙ୍କ କମ୍ପାନୀ ପ୍ରୀତି ଅଭିଯୋଗ, ବିରୋଧ କଲେ ଗ୍ରାମବାସୀ

ଓଡିଶା ସିମେଣ୍ଟ କମ୍ପାନୀକୁ ଅଧିକ ଜମି ଯୋଗାଇଦେବା ନେଇ ଜିଲ୍ଲାପାଳ ସିଧାସଳଖ ତାଙ୍କର ହସ୍ତକ୍ଷେପ ଆରମ୍ଭ କରିଛନ୍ତି ବୋଲି ଅଭିଯୋଗ କରିଛନ୍ତି ସୁନ୍ଦରଗଡ଼ ଜିଲ୍ଲାର ଲାଞ୍ଜିବେର୍ଣ୍ଣା କଟଙ୍ଗ ଗ୍ରାମବାସୀ । ଅଧିକ ପଢନ୍ତୁ...

ସୁନ୍ଦରଗଡ଼: ଜିଲ୍ଲାର ଜିଲ୍ଲାପାଳଙ୍କ କମ୍ପାନୀ ପ୍ରୀତିର ଇଏ ଆଉ ଏକ ନମୁନା । ଓଡିଶା ସିମେଣ୍ଟ କମ୍ପାନୀକୁ ଅଧିକ ଜମି ଯୋଗାଇଦେବା ନେଇ ଜିଲ୍ଲାପାଳ ସିଧାସଳଖ ତାଙ୍କର ହସ୍ତକ୍ଷେପ ଆରମ୍ଭ କରିଛନ୍ତି ବୋଲି ଆଜି ଜିଲ୍ଲାପାଳଙ୍କ ଦ୍ବାରା ଜିଲ୍ଲାପାଳଙ୍କ କାର୍ଯ୍ୟାଳୟକୁ ଡାକରା ହୋଇଥିବା ଲାଞ୍ଜିବେର୍ଣ୍ଣା କଟଙ୍ଗ ଗ୍ରାମବାସୀ କହିଛନ୍ତି । ତେବେ ଜିଲ୍ଲାପାଳଙ୍କ ଆଦେଶକୁ ସମ୍ମାନ ଦେଇ ସେମାନେ ଜିଲ୍ଲାପାଳ କାର୍ଯ୍ୟାଳୟକୁ ଯାଇ ତାଙ୍କର ଜମି କାହାରିକୁ ଦେବେ ନାହିଁ ବୋଲି ସ୍ପଷ୍ଟ କରି ଫେରିଛନ୍ତି ।

ଜିଲ୍ଲାପାଳ କଟଙ୍ଗ ଗ୍ରାମବାସୀଙ୍କୁ ତାଙ୍କ ଜମି ଅଧିଗ୍ରହଣ ନେଇ ଗତ 12 ତାରିଖ ଦିନ ନୋଟିସ ଜାରି କରିଥିଲେ । ନୋଟିସରେ ସେମାନଙ୍କୁ ଆଜି(ଶନିବାର) ତାଙ୍କ କାର୍ଯ୍ୟାଳୟରେ ଜମି ସଂକ୍ରାନ୍ତୀୟ ସମସ୍ତ ଦଲିଲ ନେଇ ହାଜର ପାଇଁ ଉଲ୍ଲେଖ କରିଥିଲେ । ତେବେ ଏ ନେଇ କଟଙ୍ଗ ଗ୍ରାମବାସୀ ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ ସମସ୍ତଙ୍କୁ ବ୍ୟକ୍ତିଗତ ଭାବେ ଇ-ମେଲ ଜରିଆରେ କିଛି ସମୟ ମାଗିଥିଲେ ।

ସେମାନଙ୍କୁ ଜିଲ୍ଲାପାଳ ସମୟ ଦେବା ପରିବର୍ତ୍ତେ ସେମାନଙ୍କ ନିକଟକୁ ଜିଲ୍ଲା ଖଣିଜ ପ୍ରତିଷ୍ଠାନର ଏକ ବସ ( OD-16G-7119 ) ଆଜି ପଠାଇ ସେମାନଙ୍କୁ ଜୋର କରି ଉଠାଇ ଆଣିଥିବା କଥା ଏହି ଜମି ମାଲିକମାନେ ଅଭିଯୋଗ କରିଛନ୍ତି । କେବଳ ସେତିକି ନୁହେଁ ତାଙ୍କ କାର୍ଯ୍ୟାଳୟକୁ ଜଣ ଜଣ କରି ଜମି ମାଲିକଙ୍କୁ ଏକୁଟିଆ ଡାକିବା ସହ ଜମି ଦେବାକୁ ବାଧ୍ୟ କରିଥିବା କଥା ଜଣାପଡିଛି । ତେବେ ଏହି ଗ୍ରାମବାସୀ ଜଣେ ହେଲେ କେହି ପ୍ରଶାସନର ଚାପକୁ ଗ୍ରହଣ କରିନାହାଁନ୍ତି । ସେମାନେ ଜମି ଆଦୌ ଦେବେ ନାହିଁ ବୋଲି ଗଣମାଧ୍ୟମ ଜରିଆରେ ପ୍ରଶାସନକୁ କହିଛନ୍ତି ।

ସୁନ୍ଦରଗଡ଼ରୁ ହରିହର ଦାସମହାପାତ୍ର, ଇଟିଭି ଭାରତ