ଅନୁଗୋଳ: ଜଳିଗଲା ସୁନ୍ଦରଗଡର ପୂର୍ବତନ ବିଧାୟକ ଯୋଗେଶ ସିଂହଙ୍କ କାର । ଏକ ବଡ ଧରଣର ଦୁର୍ଘଟଣାରୁ ବଞ୍ଚିଯାଇଛନ୍ତି ଯୋଗେଶ । ତାଙ୍କ ସହ ଅନ୍ୟ 3 ଜଣ ଗୁରୁତର ଆହତ ହୋଇଛନ୍ତି । ବ୍ୟକ୍ତିଗତ ସୁରକ୍ଷାକର୍ମୀଙ୍କ ଅବସ୍ଥା ସଙ୍କଟାପନ୍ନ ରହିଛି । ଆହତଙ୍କୁ ପ୍ରଥମେ ଅନୁଗୋଳ ଓ ପରେ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି ।
ଭିଡିଓ ସୌଜନ୍ୟ: ସମ୍ବାଦଦାତା, ଅନୁଗୋଳ
ସୂଚନା ମୁତାବକ, ସୁନ୍ଦରଗଡ଼ରୁ ଭୁବନେଶ୍ବର ଯାଉଥିବାବେଳେ ଅନୁଗୋଳ ମୈଧରପୁର ପେଟ୍ରୋଲ ପମ୍ପ ନିକଟରେ ଘଟିଛି ଏହି ଦୁର୍ଘଟଣା । ସାମ୍ନାପଟୁ ଏକ ଟ୍ରକ ଦ୍ରୁତଗତିରେ ମାଡି ଆସୁଥିବା ଦେଖି କାରଟି ଭାରସାମ୍ୟ ହରାଇଥିଲା । ଏକ ଗଛରେ ପିଟି ହୋଇଥିଲା ଯୋଗେଶଙ୍କ କାର ।
କ୍ଷଣିକ ମଧ୍ୟରେ ହୁତୁହୁତୁ ହୋଇ ଏହା ଜଳିଯାଇଥିଲା । ଦୁର୍ଘଟଣାରେ ଯୋଗେଶଙ୍କ ସୁରକ୍ଷାକର୍ମୀ ଟଙ୍କଧର ବାଗ, ଡ୍ରାଇଭର ବିକ୍ରମ ପ୍ରତାପ ରାଉତ ଓ ଅନ୍ୟଜଣେ ସହଯୋଗୀ ପ୍ରଦୀପ କୁମାର ସାହୁ ଗୁରୁତର ହୋଇଛନ୍ତି ।