ହାତୀ ମୃତ୍ୟୁରେ ଲାଗୁନି ବ୍ରେକ୍‌: ଧାନ ବିଲରୁ ଦନ୍ତା ମୃତଦେହ ଠାବ, ତଦନ୍ତ ଜାରି

ଥମୁନି ହାତୀ ମୃତ୍ୟୁ ମାମଲା । ସୁନ୍ଦରଗଡ ଜିଲ୍ଲା ବଣାଇ ବନଖଣ୍ଡ କୋଇଡ଼ା ରେଞ୍ଜ ଅଞ୍ଚଳର ବିଲ ପାର୍ଶ୍ଵରୁ ଦନ୍ତାହାତୀର ମୃତଦେହ ଠାବ ହୋଇଛି । ବିଦ୍ୟୁତ ଆଘାତରୁ ହାତୀଟିର ମୃତ୍ୟୁ ହୋଇଥିବା ଅନୁମାନ । ତଦନ୍ତ ଜାରି । ଅଧିକ ପଢନ୍ତୁ

ରାଉରକେଲା:ସୁନ୍ଦରଗଡ଼ ଜିଲ୍ଲା ବଣାଇ ବନଖଣ୍ଡ କୋଇଡ଼ା ରେଞ୍ଜ ଅଞ୍ଚଳର ବିଲ ପାର୍ଶ୍ଵରୁ ଦନ୍ତାହାତୀର ମୃତଦେହ ଠାବ ହୋଇଛି । ହାତୀଟିର ବୟସ ପ୍ରାୟ ୨୦ ବର୍ଷ ହୋଇଥିବା ବୋଲି ଅନୁମାନ କରାଯାଉଛି । ତେବେ ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ଶୁଣ୍ଢରେ ଆଘାତ ଚିହ୍ନ ଓ ପାରିପାର୍ଶ୍ଵକ ସ୍ଥିତିରୁ ବିଦ୍ୟୁତ୍ ଆଘାତରେ ମୃତ୍ୟୁ ହୋଇଥିବା ଅନୁମାନ କରାଯାଉଛି । ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ବଣାଇ ଡିଏଫ୍ଓ ସୂଚନା ଦେଇଛନ୍ତି ।

ସୁନ୍ଦରଗଡ଼ ଜିଲ୍ଲାରେ ଥମୁନି ହାତୀ ମୃତ୍ୟୁ ଘଟଣା । ବଣାଇ ବନଖଣ୍ଡ କୋଇଡ଼ା ରେଞ୍ଜ୍‌ ଅନ୍ତର୍ଗତ ଅରାଘାଟ ପାରମସାହି ନିକଟସ୍ଥ ଧାନ ବିଲ ପାର୍ଶ୍ଵରୁ ଦନ୍ତାହାତୀର ମୃତଦେହ ଠାବ ହୋଇଛି । ଗତକାଲି(ରବିବାର) ରାତିରେ ହାତୀଟିର ମୃତ୍ୟୁ ହୋଇଥିବା ଜଣାପଡ଼ିଛି । ତେବେ କାହିଁକି ହାତୀର ମୃତ୍ୟୁ ହେଲା ସେନେଇ ସ୍ପଷ୍ଟ ହୋଇନଥିବା ବେଳେ ହାତୀଟିର ଶୁଣ୍ଢରେ କ୍ଷତ ଚିହ୍ନ ଓ ପାରିପାର୍ଶ୍ଵକ ସ୍ଥିତିରୁ ବିଦ୍ୟୁତ୍ ଆଘାତରେ ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ତେବେ ହାତୀଟିର ବୟସ 20 ବର୍ଷ ହୋଇଥିବା ଅନୁମାନ କରାଯାଉଛି ।

ଅନ୍ୟପଟେ ଆରସିସିଏସ୍ ଅରୁଣ ମିଶ୍ର, ବଣାଇ ଡିଏଫ୍ଓ ଲଳିତ କୁମାର ପାତ୍ର, ଏସିଏଫ୍ ସୁଶାନ୍ତ କୁମାର ଜେନା ପହଞ୍ଚି ଘଟଣାର ତଦନ୍ତ ଚଳାଇଛନ୍ତି । ଲହୁଣିପଡ଼ା ବନ୍ୟପ୍ରାଣୀ ଡାକ୍ତରୀ ଟିମ୍ ପହଞ୍ଚି ମୃତଦେହ ବ୍ୟବଚ୍ଛେଦ କରିବା ପରେ ଘଟଣାସ୍ଥଳରେ ମୃତ ହାତୀକୁ ପୋତି ଦିଆଯାଇଛି । ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ ଆଶା କରାଯାଉଛି । ଅନ୍ୟପଟେ ବଣାଇ ଡିଏଫଓଙ୍କ କହିବାନୁଯାୟୀ,"ବିଦ୍ୟୁତ ଆଘାତରେ ହାତୀଟିର ମୃତ୍ୟୁ ହୋଇଥିବା ଅନୁମାନ କରାଯାଉଛି । ତେବେ ଏହା ଅଘଟଣ ନା ଜାଣିଶୁଣି କିଏ ହାତୀଟିକୁ ବିଦ୍ୟୁତ ଆଘାତ ଦେଇ ହତ୍ୟା କରିଛି ସେ ଦିଗରେ ତଦନ୍ତ ଜାରି ରହିଛି । ଅନ୍ୟପଟେ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ସ୍ପଷ୍ଟ ହେବ ।"

ମିଳିଥିବା ସୂଚନା ମୁତାବକ, କୋଇଡ଼ା ରେଞ୍ଜ୍‌ ଗଣୁଆ ବିଟ୍ ଅରାଘାଟ ପାରମସାହି ନିକଟରେ କଳମଗ ଜଙ୍ଗଲ ରହିଛି । ପ୍ରତିଦିନ ଏହି ଜଙ୍ଗଲ ଦେଇ ହାତୀପଲ ଯାତାୟତ କରିଥାଆନ୍ତି । ଜଙ୍ଗଲ ପାଖକୁ ଲାଗିଥିବା ଧାନ ବିଲକୁ ଆସି ଧାନ ଖାଇଥାଆନ୍ତି । ଆଜି ସକାଳେ ପାରମସାହି ନିକଟସ୍ଥ ଧାନବିଲ ପାର୍ଶ୍ଵରେ ଦନ୍ତାହାତୀର ମୃତଦେହ ପଡ଼ିଥିବା ଦେଖି ଗାଁ ଲୋକ ବନ ବିଭାଗକୁ ସୂଚନା ଦେଇଥିଲେ । ଗାଁ ଲୋକଙ୍କଠାରୁ ସୂଚନା ପାଇଁ ବନ ବିଭାଗ ବରିଷ୍ଠ ଅଧିକାରୀ ଓ ବିଦ୍ୟୁତ୍ ବିଭାଗର ବରିଷ୍ଠ ଅଧିକାରି ଘଟଣା ସ୍ଥଳରେ ପହଞ୍ଚିଥିଲେ । ଶୁଣ୍ଢରେ ଗଭୀର ଆଘାତ ଲାଗିଥିବାରୁ କେଉଁ ପରିସ୍ଥିତିରେ ଦନ୍ତାହାତୀର ମୃତ୍ୟୁ ହେଲା ତାହା ନେଇ ତଦନ୍ତ ଆରମ୍ଭ କରାଯାଇଛି । ଯେଉଁଠି ଦନ୍ତାହାତୀର ମୃତଦେହ ଠାବ ହୋଇଥିଲା ତା’ପାଖକୁ ଲାଗି ଧାନ ବିଲ ରହିଛି । ଧାନ ବିଲକୁ ହାତୀ ଦାଉରୁ ରକ୍ଷା କରିବାକୁ ଚାଷୀ ତାର ଜାଲି ଘେରାବନ୍ଦୀ କରିଥିଲେ କି ନାହିଁ ସେ ଦିଗରୁ ମଧ୍ୟ ତଦନ୍ତ ଜାରି ରହିଛି ।

ତେବେ ଗତ ଦୁଇ ବର୍ଷ ପୂର୍ବରୁ ଏହି ସ୍ଥାନରେ ହିଁ ଆଉ ଗୋଟିଏ ଦନ୍ତାହାତୀର ସନ୍ଦେହଜନକ ମୃତ୍ୟୁ ହୋଇଥିଲା । ଏହା ପୂର୍ବରୁ ମେଣ୍ଢାମାରୁଣି ଜଙ୍ଗଲ ଓ କୁସୁମୁଡିହି ଜଙ୍ଗଲରେ ବିଷାକ୍ତ ଖାଦ୍ୟ ଯୋଗୁଁ ଗୋଟିଏ ଲେଖାଏଁ ହାତୀଙ୍କର ମୃତ୍ୟୁ ହୋଇଥିଲା । ସେପଟେ ବାରମ୍ବାର ହାତୀମୃତ୍ୟୁକୁ ନେଇ ବୁଦ୍ଧିଜୀବୀ ମହଲରେ ଉଦ୍‌ବେଗ ପ୍ରକାଶ ପାଇଛି । ଉଲ୍ଲେଖଯୋଗ୍ୟ, ଗତ ୬୪ ମାସ ମଧ୍ୟରେ ସୁନ୍ଦରଗଡ଼ ଜିଲ୍ଲାର ବଣାଇ, ରାଉରକେଲା ଓ ସୁନ୍ଦରଗଡ଼ ବନଖଣ୍ଡରେ ମୋଟ ୩୪ ହାତୀଙ୍କ ମୃତ୍ୟୁ ହୋଇଛି । କେବଳ ବଣାଇ ବନଖଣ୍ଡରେ ୬୪ ମାସରେ ୧୯ ହାତୀର ମୃତ୍ୟୁ ହୋଇଛି । ୨୦୨୦ ଓ ୨୦୨୨ରେ ୪ଟି ଲେଖାଏଁ ହାତୀର ମୃତ୍ୟୁ ହୋଇଛି । ଗତ ୨୦୨୧ ମାର୍ଚ୍ଚରୁ ୨୦୨୩ ମଧ୍ୟରେ କୋଇଡାରେ ୪ଟି, କର୍ତା ରେଞ୍ଜରେ ୩ଟି, ତାମଡ଼ା ରେଞ୍ଜରେ ଗୋଟିଏ ହାତୀ ମୃତ୍ୟୁ ହୋଇଛି ବୋଲି ସୂଚନା ରହିଛି ।

ଇଟିଭି ଭାରତ, ରାଉରକେଲା