ରାଉରକେଲା: ଝାରସୁଗୁଡ଼ା ଉପନିର୍ବାଚନ ତାରିଖ ଯେତେ ପାଖଉଛି, ରାଜନୀତିକ ପାଣିପାଗ ସେତେ ସରଗରମ ହେଉଛି । ଝାରସୁଗୁଡ଼ା ଗଡ଼ ହାତେଇବା ପାଇଁ ତିନି ପ୍ରମୁଖ ଦଳ ରଣନୀତି ପ୍ରସ୍ତୁତ କଲେଣି । ବିଭିନ୍ନ ଦଳ ଘନ ଘନ ଝାରସୁଗୁଡ଼ା ଗସ୍ତ କରି ଆଲୋଚନା ପର୍ଯ୍ୟାଲୋଚନା କରୁଛନ୍ତି । ବିଜେଡି ତାର ପ୍ରାର୍ଥୀ ଘୋଷଣା କରିସାରିଛି । ଏବେ କଂଗ୍ରେସ ଓ ବିଜେପି କାହାକୁ ପ୍ରାର୍ଥୀ ଘୋଷଣା କରୁଛନ୍ତି ତାହା ଉପରେ ସମସ୍ତଙ୍କ ନଜର । ଏହାରି ଭିତରେ ରାଉରକେଲାରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବିଜେପିର ପୁରୁଖା ନେତା ଜୁଏଲ ଓରାମ ଉପନିର୍ବାଚନ ପ୍ରସ୍ତୁତି ଆରମ୍ଭ କରିଛନ୍ତି ।
ଏହା ମଧ୍ୟ ପଢ଼ନ୍ତୁ:Jharsuguda ByPoll: ଖୁବଶୀଘ୍ର ପ୍ରାର୍ଥୀ ଘୋଷଣା କରିବ କଂଗ୍ରେସ
ଝାରସୁଗୁଡ଼ା ଉପନିର୍ବାଚନରେ କିଭଳି ହେବ ରଣନୀତି ତାହା ନେଇ ରାଉରକେଲାରେ ଜୁଏଲ ନିଜ ଅଞ୍ଚଳର କର୍ମୀଙ୍କ ସହ ଆଲୋଚନା କରିଛନ୍ତି । ଏନେଇ ସେ ପ୍ରତିକ୍ରିୟାରେ କହିଛନ୍ତି, " ଏଥର ବିପୁଳ ମାତ୍ରାରେ ଭୋଟ ଜିତି ଝାରସୁଗୁଡ଼ାରେ ପଦ୍ମ ଫୁଟାଇବ ବିଜେପି । ଏଥର ବିଜେପି ଦଳ ସଫଳ ପ୍ରଦର୍ଶନ କରିବ । ଧାମନଗର ପରି ଝାରସୁଗୁଡ଼ାରେ ମଧ୍ୟ ବିଜେପି ସଫଳତା ପାଇବ । ପୂର୍ବରୁ ହୋଇଥିବା ସୁନ୍ଦରଗଡ଼ ଉପନିର୍ବାଚନ ହେଉ ବା ବିଜୁ ବାବୁ ଥିବା ସମୟରେ ମାଲକାନଗିରି ଉପନିର୍ବାଚାନ, ସେଥିରେ ବିଜେପି ଜିତିଥିଲା । ଲୋକଙ୍କ ହାତ ଆମ ସହ ରହିଛି । ତେଣୁ ଆଶା ଅଛି ବିଜେପି ଜିତିବ । "