ବେଆଇନ ମଦ କାରବାରକୁ ମହିଳା ମହାସଂଘର ବିରୋଧ, ବ୍ୟବସାୟୀ ଅଟକ

ଜିଲ୍ଲାରେ ଚାଲିଥିବା ବେଆଇନ ମଦ ବିକ୍ରିକୁ ମହିଳା ସ୍ବୟଂ ସହାୟକ ମହାସଂଘର ବିରୋଧ । ଏମିତିରେ ସୁବର୍ଣ୍ଣପୁର ସଦର ଥାନା ଝୁପୁଡି ପଡାରେ ଜଣେ ବ୍ୟକ୍ତି ବେଆଇନ ଭାବେ ଦେଶୀ ମଦ ବିକ୍ରି କରୁଥିବା ଅଭିଯୋଗ ହୋଇଛି ।

ସୁବର୍ଣ୍ଣପୁର: ଜିଲ୍ଲାରେ ଚାଲିଥିବା ବେଆଇନ ମଦ ବିକ୍ରିକୁ ମହିଳା ସ୍ବୟଂ ସହାୟକ ମହାସଂଘର ବିରୋଧ । ଏମିତିରେ ସୁବର୍ଣ୍ଣପୁର ସଦର ଥାନା ଝୁପୁଡି ପଡାରେ ଜଣେ ବ୍ୟକ୍ତି ବେଆଇନ ଭାବେ ଦେଶୀ ମଦ ବିକ୍ରି କରୁଥିବା ଅଭିଯୋଗ ହୋଇଛି । ପଡାବାସୀ ବାରମ୍ବାର ମଦ ବିକ୍ରି କରିବାକୁ ବିରୋଧ କରୁଥିବା ବେଳେ ଗତ କିଛି ଦିନ ତଳେ ସେ ଲିଖିତ ଆକାରରେ ମହାସଂଘକୁ ମଦ ବିକ୍ରି ନ କରିବାକୁ ପ୍ରତିଶୃତି ଦେଇଥିଲେ । ଏହାସତ୍ତ୍ବେ ଦୀର୍ଘ ଦିନ ହେବ ବେଆଇନ ଭାବେ ସେ ଦେଶୀ ମଦ ବିକ୍ରି କରୁଥିବାରୁ ସୋମବାର ମହିଳା ମହାସଂଘ ଜାଣିବାକୁ ପାଇଥିଲା ।

ଏହାପରେ ମହିଳା ମହାସଂଘର କର୍ମକର୍ତ୍ତା, ନ୍ୟୁ ଷ୍ଟାର କ୍ଲବ ଓ ଆମ୍ବେଦକର କ୍ଲବର କର୍ମକର୍ତ୍ତାମାନେ ସମ୍ପୃକ୍ତ ବ୍ୟକ୍ତିଙ୍କ ଘରକୁ ଯାଇ ସେଠାରୁ ପାଖାପାଖି 5 ଲିଟର ଦେଶୀ ମଦ ଓ କିଛି ପଲିଥିନ ଜବତ କରିଥିଲେ । ଏନେଇ ସେଠାରେ ସାମାନ୍ୟ ଉତ୍ତେଜନା ପ୍ରକାଶ ପାଇଥିବା ଦେଖିବାକୁ ମିଳିଥିଲା । ପରେ ମହିଳା ମହାସଂଘ ପକ୍ଷରୁ ପୋଲିସକୁ ଖବର ଦିଆ ଯାଇଥିବା ବେଳେ ସମ୍ପୃକ୍ତ ମଦ ବ୍ୟବସାୟୀଙ୍କୁ ଥାନାକୁ ନେଇଛି ପୋଲିସ । ଏଥିସହ ଘଟଣାସ୍ଥଳରୁ ମଦ ଓ ପଲିଥିନକୁ ମଧ୍ୟ ଜବତ କରିଛି ପୋଲିସ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ