ମହିଳାଙ୍କ ମୃତଦେହ ଉଦ୍ଧାର: ଦୁଷ୍କର୍ମ-ହତ୍ୟା ଅଭିଯୋଗ

ସୁବର୍ଣ୍ଣପୁର ଲାତୁରପେଟ ଗାଁରୁ ଉଦ୍ଧାର ହୋଇଥିବା ମହିଳାଙ୍କୁ କେହି ଦୁଷ୍କର୍ମ ପରେ ହତ୍ୟା କରିଥିବା ପରିବାର ଲୋକଙ୍କ ଅଭିଯୋଗ । ଅଧିକ ପଢନ୍ତୁ...

ସୁବର୍ଣ୍ଣପୁର: ଜିଲ୍ଲାସ୍ଥିତ ବୀରମହାରାଜପୁର ଥାନା ଅନ୍ତର୍ଗତ ଲାତୁରପେଟ ଗାଁର ଶୁଭ୍ରକାନ୍ତା ଭୋଇଙ୍କ ମୃତ୍ୟୁ ଘଟଣା ଭିନ୍ନ ମୋଡ ନେଇଛି । ଶୁଭ୍ରକାନ୍ତାଙ୍କୁ କେହି ଦୁଷ୍କର୍ମ ପରେ ହତ୍ୟା କରିଥିବା ତାଙ୍କ ସ୍ବାମୀ ଅଭିଯୋଗ କରିଛନ୍ତି । ଏଥିସହ ତାଙ୍କ ବାପା ମଧ୍ୟ ସମାନ ଅଭିଯୋଗ କରିଛନ୍ତି ।

ସୂଚନା ଅନୁଯାୟୀ ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଥାନା ଅନ୍ତର୍ଗତ ଲାତୁରପେଟ ଗାଁର ଶୁଭ୍ରକାନ୍ତା ଗତ 2 ତାରିଖରେ କୌଣସି ଏକ କାମରେ ବାହାରକୁ ଯାଇ ଘରକୁ ଫେରି ନ ଥିଲେ । ପରିବାର ଲୋକେ ଅନେକ ଖୋଜାଖୋଜି କରିବା ପରେ ମଧ୍ୟ ତାଙ୍କୁ ପାଇନଥିଲେ । ଏହାର ଗୋଟିଏ ଦିନ ପରେ ଅର୍ଥାତ 3 ତାରିଖରେ ଶୁଭ୍ରକାନ୍ତାଙ୍କ ମୃତଦେହ ଗାଁର ବହୁ ଦୂରରେ ଥିବା ଏକ ଆମ୍ବଗଛ ତଳେ ପଡିଥିବାର ସ୍ଥାନୀୟ ଲୋକେ ଦେଖିବା ପରେ ପୋଲିସ ମୃତଦେହକୁ ଉଦ୍ଧାର କରିଥିଲା ।

ବର୍ତ୍ତମାନ କିନ୍ତୁ ଘଟଣା ନୂଆମୋଡ ନେଇଛି । ଶୁଭ୍ରକାନ୍ତାଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଛି ବୋଲି ତାଙ୍କ ସ୍ବାମୀ ଅଇଁଠୁ ନାଏକ ଲିଖିତ ଅଭିଯୋଗ କରିଛନ୍ତି । ଏଥିସହ ମାମଲାରେ ସମ୍ପୃକ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି ସେ । ଅନ୍ୟପଟେ ମୃତା ମହିଳାଙ୍କ ବାପା ବି ଥାନାକୁ ଆସି ଜ୍ବାଇଁଙ୍କ କଥାକୁ ସମର୍ଥନ କରି ତୁରନ୍ତ ଅଭିଯୁକ୍ତକୁ ଗିରଫ କରିବା ପାଇଁ ଦାବି କରିଛନ୍ତି ।



ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ