ସୁବର୍ଣ୍ଣପୁର: ଜିଲ୍ଲାରେ ଚଳିତ ଖରିଫ ଋତୁରେ 1 ଲକ୍ଷ 21 ହଜାର ହେକ୍ଟର ଜମିରେ ଧାନ ଚାଷ କରାଯିବାକୁ ନିଷ୍ପତ୍ତି ନିଆଯାଇଛି । ସେହିପରି 1 ହଜାର 9 ଶହ ହେକ୍ଟର ଜମିରେ ତୈଳବୀଜ , 4 ହଜାର 450 ହେକ୍ଟରରେ ପନିପରିବା ଓ 4 ହଜାର 380 ହେକ୍ଟର ଚାଷଜମିରେ ଡାଲି ଜାତୀୟ ଚାଷ କରିବାକୁ ଜିଲ୍ଲା କୃଷି ବିଭାଗ ଯୋଜନା କରିଛି ।
ଫଟୋ ସୌଜନ୍ୟ- ପ୍ରତିନିଧି, ସୁବର୍ଣ୍ଣପୁର
ବିଶେଷ କରି ଜଳସେଚନକୁ ବିଶେଷ ଗୁରୁତ୍ବ ଦେବା ସହିତ ଜିଲ୍ଲାର ଅଣ ଜଳସେଚିତ ଅଞ୍ଚଳରେ ଅଧିକରୁ ଅଧିକ ଅର୍ଥନୈତିକ ଚାଷ କରିବାକୁ ଗୁରୁତ୍ବ ଦିଆଯାଇଛି । ଆଜି ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଜିଲ୍ଲା କୃଷି ନୀତି ନିର୍ଦ୍ଧାରଣ ବୈଠକରେ ଜିଲ୍ଲା କୃଷି ବିଭାଗ ତରଫରୁ କୃଷି ଯୋଜନା ରିପୋର୍ଟ ଉପସ୍ଥାପନ କରାଯାଇଥିଲା । ଜିଲ୍ଲା ଉପ କୃଷି ନିର୍ଦ୍ଦେଶକ ସନ୍ତୋଷ କୁମାର ଜେନାଙ୍କ ପୌରହିତ୍ୟରେ ଆୟୋଜିତ ବୈଠକରେ ଜିଲ୍ଲାପାଳ ମଧୂସୂଦନ ମିଶ୍ର ଯୋଗଦେଇ ମରୁଡି ଓ ରୋଗ ପୋକ ଉପରେ ଜିଲ୍ଲା କୃଷି ବିଭାଗ ସତର୍କ ରହିବାକୁ ନିର୍ଦ୍ଦେଶ ଦେଇଥିଲେ ।