ଟେଲିଫୋନ ମରାମତି ପାଇଁ ବ୍ୟବହୃତ ଗାଡିକୁ ଧକ୍କା ଦେଲା କାର, ଜଣେ ମୃତ

ଭାରସାମ୍ୟ ହରାଇ ରାସ୍ତା କଡରେ ଛିଡା ହୋଇଥିବା ଟେଲିଫୋନ ମରାମତି ପାଇଁ ବ୍ୟବହୃତ ଗାଡିକୁ ଧକ୍କା ଦେଲା କାର । ଚିକିତ୍ସାଧୀନ ଅବସ୍ଥାରେ ଜଣେ ଯୁବକଙ୍କ ମୃତ୍ୟୁ । ଅଧିକ ପଢନ୍ତୁ...

ସୁବର୍ଣ୍ଣପୁର: ମର୍ମନ୍ତୁଦ ସଡକ ଦୁର୍ଘଟଣା । ଭାରସାମ୍ୟ ହରାଇ ରାସ୍ତା କଡରେ ଛିଡା ହୋଇଥିବା ଟେଲିଫୋନ ମରାମତି ପାଇଁ ବ୍ୟବହୃତ ଗାଡିକୁ ଧକ୍କା ଦେଲା କାର । ସୁବର୍ଣ୍ଣପୁର ଜିଲ୍ଲାର ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥର ଅର୍ଜୁନପୁର ଛକ ନିକଟରେ ବୁଧବାର ସକାଳେ ଏହି ଭୟଙ୍କର ଦୁର୍ଘଟଣା ଘଟିଛି । ଦୁର୍ଘଟଣାରେ ଗୁରୁତର ଦୁଇ ଯୁବକଙ୍କୁ ଜିଲ୍ଲା ମୁଖ୍ୟ ମେଡିକାଲକୁ ନିଆଯାଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଜଣଙ୍କ ମୃତ୍ୟୁ ହୋଇଛି । ମୃତ ଯୁବକ ବୌଦ୍ଧ ଜିଲ୍ଲା ପୁରୁଣାକଟକ ଅଞ୍ଚଳର 22 ବର୍ଷୀୟ ସୁଭ୍ରାଂଶୁ ଯୋଶୀ । ଅନ୍ୟ ଜଣେ ଗୁରୁତର ସମ୍ବଲପୁର ସହରର ବିକାଶ ରାଏ ବୋଲି ଜଣାପଡିଛି ।

ସୂଚନାଯୋଗ୍ୟ, ଆଜି (ବୁଧବାର) ଭୋରରୁ ସୁଭ୍ରାଂଶୁ ଓ ବିକାଶ ଏକ କାର ଯୋଗେ ଭୁବନେଶ୍ବରରୁ ବଲାଙ୍ଗୀରକୁ ଯାଉଥିଲେ । ବାଟରେ କାରଟି ଭାରସାମ୍ୟ ହରାଇ ଟେଲିଫୋନ ମରାମତି ପାଇଁ ବ୍ୟବହୃତ ରାସ୍ତା କଡରେ ଛିଡା ହୋଇଥିବା ଗାଡି ସହ ଜୋରରେ ଧକ୍କା ହୋଇଥିଲା । ଫଳରେ କାରରେ ବସିଥିବା ଦୁଇ ଯୁବକ ଗୁରୁତର ଆହତ ହୋଇଥିଲେ । ଉଭୟଙ୍କୁ ଉଦ୍ଧାର କରାଯାଇ ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଥିଲା । ଚିକିତ୍ସାଧୀନ ଅବସ୍ଥାରେ ସୁଭ୍ରାଂଶୁଙ୍କ ଆଖି ବୁଜିଛନ୍ତି । ଅନ୍ୟପଟେ ଆହତ ବିକାଶଙ୍କ ଅବସ୍ଥା ସଙ୍କଟାପନ୍ନ ରହିଛି । ଉଭୟଙ୍କ ପରିବାର ଲୋକଙ୍କୁ ଏ ସମ୍ପର୍କରେ ଖବର ଦିଆଯାଇଛି ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ