ସମ୍ବଲପୁର: ବିଳମ୍ବରେ ପୂରିବ କି ହୀରାକୁଦ ଡ୍ୟାମ ? ଏବେ ଏଭଳି ଏକ ପ୍ରଶ୍ନ ସମ୍ବଲପୁରବାସୀଙ୍କ ମନ ଭିତରେ ଉଙ୍କି ମାରୁଛି । କାରଣ ଗତବର୍ଷର ଡାଟାକୁ ଲକ୍ଷ୍ୟ କଲେ ଏମିତି ଏକ ପ୍ରଶ୍ନ ମନରେ ଆସିବା ସ୍ବାଭାବିକ ଅଟେ । ଗତବର୍ଷ ଜୁନ 25 ତାରିଖରେ ହୀରାକୁଦ ଜଳଭଣ୍ଡାରର ଜଳସ୍ତର 618.10 ଫୁଟ ରହିଥିବାବେଳେ ଆଜି ଜଳସ୍ତର ରହିଛି 604.33 ଫୁଟ ରହିଛି । ଅର୍ଥାତ୍ ଗତବର୍ଷ ଅପେକ୍ଷା ହୀରାକୁଦ ଜଳଭଣ୍ଡାରର ଜଳସ୍ତର ପାଖାପାଖି 14 ଫୁଟ୍ କମ୍ ରହିଛି । ଏଭଳି ସ୍ଥିତିରେ ହୀରାକୁଦ ଡ୍ୟାମ ଭର୍ତ୍ତି ହେବା ସହ ପ୍ରଥମ ବନ୍ୟାଜଳ ନିଷ୍କାସନ ପାଇଁ ଗେଟ୍ ଖୋଲିବାରେ ବିଳମ୍ବ ହୋଇପାରେ ବୋଲି ଆଶଙ୍କା ସୃଷ୍ଟି ହୋଇଛି ।
ହୀରାକୁଦ ଜଳଭଣ୍ଡାରର ସର୍ବୋଚ୍ଚ ଜଳଧାରଣ କ୍ଷମତା 630 ଫୁଟ ଉଚ୍ଚ ହୋଇଥିବା ବେଳେ ବର୍ତ୍ତମାନ ଏହା 604 ଫୁଟରେ ରହିଛି । ବିଗତ 3 ବର୍ଷ ହେଲା ହୀରାକୁଦର ଜଳସ୍ତର 618 ଫୁଟ ଥିବା ସମୟରେ ଗେଟ ଖୋଲା ଯାଇଥାଏ । ତେବେ ଚଳିତ ବର୍ଷ ଏଥିରେ ବିଳମ୍ବ ହେବାର ସମ୍ଭାବନା ରହିଛି । କାରଣ ଗତବର୍ଷ ଅପେକ୍ଷା ଚଳିତ ବର୍ଷ ଜଳସ୍ତର ପ୍ରାୟ 14 ଫୁଟ ତଳେ ରହିଛି । ଏଥିପାଇଁ ଉପର ମୁଣ୍ଡରେ ଅପେକ୍ଷାକୃତ କମ୍ ବର୍ଷା ଓ ଛତିଶଗଡ଼ରେ ଥିବା କେତେକ ବ୍ୟାରେଜକୁ କିଛି ଲୋକ ଦାୟୀ କରୁଛନ୍ତି ।