ଉତ୍ତରାଖଣ୍ଡ ଟନେଲ ଦୁର୍ଘଟଣା; ଉଦ୍ଧାର ପାଇଁ ହୀରାକୁଦରୁ ଗଲା ଅଗର ମେସିନ

ଉତ୍ତରାଖଣ୍ଡ ଟନେଲ ଦୁର୍ଘଟଣାରେ ଉଦ୍ଧାର କାର୍ଯ୍ୟ ପାଇଁ ହୀରାକୁଦରୁ ଗଲା ଅଗର ମେସିନ । ଆଜି ଉଦ୍ଧାର ହୋଇପାରନ୍ତି ୪୧ ଶ୍ରମିକ । ଅଧିକ ପଢନ୍ତୁ

ସମ୍ବଲପୁର:ଉତ୍ତରକାଶୀ ଟନେଲରେ ଫସିଥିବା ଶ୍ରମିକଙ୍କୁ ଉଦ୍ଧାର ପାଇଁ ହୀରାକୁଦରେ ଗଲା ଅଗର ମେସିନ । ଟନେଲ ଖନନ ପାଇଁ ସମ୍ବଲପୁର ହୀରକୁଦରୁ ଗୋଟିଏ ସ୍ବତନ୍ତ୍ର ଅଗର ମେସିନ ଉତ୍ତରାଖଣ୍ଡକୁ ପଠାଯାଇଛି । ମେସିନକୁ ପ୍ରଥମେ ହୀରାକୁଦରୁ ଟ୍ରେନ ଯୋଗେ ଛତିଶଗଡ ରାଜ୍ୟ ରାୟପୁରକୁ ନିଆଯାଇଥିଲା । ସେଠାରୁ ଟ୍ରଲର ସାହାଯ୍ୟରେ ମଧ୍ୟପ୍ରଦେଶ ଗ୍ବାଲିୟର ଦେଇ ଉତ୍ତରାଖଣ୍ଡ ଟନେଲ ନିକଟକୁ ପହଞ୍ଚା ଯାଇଥିବା ସୂଚନା ମିଳିଛି । ଟନେଲ ଭିତରୁ ୪୧ ଶ୍ରମିକଙ୍କୁ ଉଦ୍ଧାର ପାଇଁ ଜାରି ରହିଥିବା ଖନନ କାର୍ଯ୍ୟରେ ହୀରାକୁଦର ଏହି ମେସିନ ବ୍ୟବହାର କରାଯିବ ।

ସୂଚନା ଅନୁଯାୟୀ, ଏହି ଅଗର ମେସିନଟି ଗୋଟିଏ ଘରୋଇ ସଂସ୍ଥାର । ଯାହାକି ହୀରାକୁଦ ସ୍ଥିତ ହିଣ୍ଡଲକୋ କମ୍ପାନୀରେ କାମ କରୁଥିଲା । ଏହି ମେସିନ ହୀରାକୁଦରେ ଥିବା ଜଣାପଡିବା ପରେ ଉକ୍ତ ସଂସ୍ଥାର ମାଲିକଙ୍କୁ ଯୋଗାଯୋଗ କରି ମେସିନକୁ ଉତ୍ତରକାଶୀ ପଠାଯାଇଛି । ତେବେ ମେସିନଟି ବହୁତ ବଡ଼ ହୋଇଥିବାରୁ ଏହାକୁ ଭାଗ ଭାଗ କରି ମାଲବାହୀ ଟ୍ରେନରେ ନିଆଯାଇଛି । ମେସିନ ଉତ୍ତରାଖଣ୍ଡରେ ପହଞ୍ଚିବା ପର୍ଯ୍ୟନ୍ତ କେନ୍ଦ୍ରର ସ୍ଵରାଷ୍ଟ୍ର, ରେଳ ଓ NHAI ମନ୍ତ୍ରଣାଳୟ ଏହାର ତଦାରଖ କରିଥିଲା ।

ସୂଚନାଯୋଗ୍ୟ ଯେ, ଏକ ଘରୋଇ ସଂସ୍ଥାର ଏହି ଏହି ଅଗର ମେସିନ ହୀରାକୁଦରେ ଥିବା ଜଣାପଡିବା ପରେ କେନ୍ଦ୍ର ସ୍ଵରାଷ୍ଟ୍ର ମନ୍ତ୍ରାଳୟ ପକ୍ଷରୁ ଓଡ଼ିଶାର ମୁଖ୍ୟ ଶାସନ ସଚିବଙ୍କୁ ଚିଠି କରାଯାଇଥିଲା । ଚିଠିରେ ମେସିନକୁ ଗ୍ରୀନ କରିଡରରେ ପଠାଇବାକୁ ନିର୍ଦ୍ଦେଶ ଦିଆଯାଇଥିଲା । ଏହାପରେ ଅଗର ମେସିନକୁ ପଠାଇବାକୁ ରୋଡ୍‌ମ୍ୟାପ ପ୍ରସ୍ତୁତ କରାଯାଇ ଗତ ୨୧ ତାରିଖରେ ସମ୍ବଲପୁରରୁ ପଠାଯାଇଥିଲା ।

ପ୍ରକାଶ ଥାଉକି, ଆଜକୁ ୧୪ ଦିନ ହେଲାଣି ଉତ୍ତରକାଶୀ ଟନେଲରେ ଫସିଥିବା ୪୧ ଶ୍ରମିକଙ୍କୁ ଉଦ୍ଧାର କରିବାକୁ ଯୁଦ୍ଧକାଳୀନ ଭିତ୍ତିରେ ପ୍ରୟାସ ଜାରି ରହିଛି । ଏହି ଶ୍ରମିକମାନଙ୍କ ମଧ୍ୟରେ ଓଡ଼ିଶାରୁ ୫ ଜଣ ଅଛନ୍ତି । ଗତକାଲି ସବୁ ଶ୍ରମିକଙ୍କୁ ଉଦ୍ଧାର କରିବାକୁ ଲକ୍ଷ୍ୟ ରଖାଯାଇଥିଲା । ମାତ୍ର ଡ୍ରିଲିଂ ମେସିନରେ ଯାନ୍ତ୍ରିକ ସମସ୍ୟା ଯୋଗୁଁ ରାତିରେ ରେସ୍କ୍ୟୁ ଅପରେସନ ବନ୍ଦ କରିବାକୁ ପଡିଥିଲା । ଆଜି ସକାଳୁ ମେସିନ ମରାମତି କରାଯାଇ ପୁଣି ଖନନ କାର୍ଯ୍ୟ ଚାଲିଛି ଏବଂ ଆଜି ହିଁ ଶ୍ରମିକମାନେ ସୁରକ୍ଷିତ ଉଦ୍ଧାର ହେବେ ବୋଲି କୁହାଯାଉଛି ।

ଇଟିଭି ଭାରତ, ସମ୍ବଲପୁର