ସମ୍ବଲପୁର: ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଆନ୍ଦୋଳନ ବେଳେ ସମ୍ବଲପୁର ବିଚାରପତିଙ୍କ ଚାମ୍ବରରେ ଭଙ୍ଗାରୁଜା ଘଟଣାରେ ଆଉ ୩ ଜଣ ଓକିଲ ଗିରଫ ହୋଇଛନ୍ତି(3 more Sambalpur lawyers arrested for vandalism) । ସେମାନେ ହେଲେ ବିଷ୍ଣୁପ୍ରିୟା ଭୋଇ, ସେବତୀ ବଂଚୋର ଓ ମିଳନ ମହାରଣା । ଆଜି ସମ୍ବଲପୁର ପୋଲିସ ସେମାନଙ୍କୁ ଗିରଫ କରିଛି । ପୂର୍ବରୁ ଏହି ଘଟଣାରେ ୨୩ ଜଣ ଓକିଲ, ଜଣେ ସାଧାରଣ ଲୋକ ଓ ୮ ଜଣ କିନ୍ନର ଗିରଫ ହୋଇଥିଲେ । ଏହାକୁ ମିଶାଇ ଏବେ ସୁଦ୍ଧା ଗିରଫ ହୋଇଥିବା ଓକିଲଙ୍କ ସଂଖ୍ୟା ୨୬ରେ ପହଞ୍ଚିଛି । ଏହି ଗିରଫଦାରୀ ସଂଖ୍ୟା ଆଗକୁ ଆହୁରି ବଢିବ ବୋଲି କୁହାଯାଉଛି ।
ସୂଚନାଯୋଗ୍ୟ, ଗତ ୧୨ ତାରିଖରେ ସମ୍ବଲପୁରରେ ହାଇକୋର୍ଟ ବେଞ୍ଚ ଆନ୍ଦୋଳନ ସମୟରେ କେତେକ ଆନ୍ଦୋଳନକାରୀ ପୋଲିସର ସୁରକ୍ଷା ବଳୟ ଭାଙ୍ଗି ଜଜଙ୍କ ଚାମ୍ବରରେ ପଶି ହୋହଲ୍ଲା ଓ ଭଙ୍ଗାରୁଜା କରିଥିଲେ । ଏହି ଘଟଣାରେ ପୋଲିସ ସିସିଟିଭି ଓ ସଂଗ୍ରହ ହୋଇଥିବା ଭିଡିଓ ଯାଞ୍ଚ କରି ଅଭିଯୁକ୍ତଙ୍କୁ ଚିହ୍ନଟ କରିବାରେ ଲାଗିଛି । ବର୍ତ୍ତମାନ ସୁଦ୍ଧା ୨୬ ଜଣ ଓକିଲଙ୍କ ସମେତ ୩୫ ଜଣ ଗିରଫ ହୋଇଛନ୍ତି ।