ସମ୍ବଲପୁର:ଦିନକୁ ଦିନ ବଢୁଛି ସଡ଼କ ଦୁର୍ଘଟଣା । ବେପରୁଆ ଗାଡ଼ି ଚାଳନା ତଥା ଅସାବଧାନତା କାରଣରୁ ଅକାଳରେ ଚାଲିଯାଉଛି ନିରୀହ ଜୀବନ । ରାଜ୍ୟରେ କିଛି ଦିନ ଧରି ଏଭଳି ଦୁର୍ଘଟଣା ଘଟଣା ବାରମ୍ବାର ଘଟୁଥିବା ବେଳେ ଏବେ ସମ୍ବଲପୁର ଟାଉନ ଥାନା ଅନ୍ତର୍ଗତ ଫ୍ରେଜର କ୍ଳବ ନିକଟରେ ଘଟିଛି ଆଉ ଏକ ମର୍ମନ୍ତୁଦ ସଡ଼କ ଦୁର୍ଘଟଣା l ଏକ ଯାତ୍ରୀବାହୀ ବସ୍ ଧକ୍କାରେ ଜଣେ ଛାତ୍ରଙ୍କ ପ୍ରାଣବାୟୁ ଉଡ଼ିଯାଇଛି । ଛାତ୍ର ଜଣକ ଆମ୍ବେଦକରନଗରର ଦିଶାନ୍ତ ନାୟକ (14) ବୋଲି ଜଣାପଡିଛି । ସେ ସମ୍ବଲପୁର କେନ୍ଦ୍ରୀୟ ବିଦ୍ୟାଳୟର 9ମ ଶ୍ରେଣୀରେ ପଢୁଥିଲେ । ତେବେ ଦୁର୍ଘଟଣାରେ ଦିଶାନ୍ତଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ପ୍ରକାଶ ପାଇଛି ।
ସୂଚନା ଅନୁସାରେ, ଛାତ୍ର ଜଣକ ଏକ ସ୍କୁଟିରେ ଔଷଧ ଆଣିବା ପାଇଁ ଯାଉଥିଲେ । ଏହି ସମୟରେ ତାଙ୍କୁ ବସ୍ ଧକ୍କା ଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ସେପଟେ ଛାତ୍ର ଦିଶାନ୍ତଙ୍କ ମୃତ୍ୟୁକୁ ନେଇ ଘଟଣାସ୍ଥଳରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା । ସ୍ଥାନୀୟ ଲୋକେ ଉତ୍ୟକ୍ତ ହୋଇ ରାସ୍ତା ଅବରୋଧ କରିଥିଲେ । ଲୋକଙ୍କୁ ହଟେଇବା ପାଇଁ ପୋଲିସକୁ ମୃଦୁ ବଳ ପ୍ରୟୋଗ କରିବାକୁ ପଡ଼ିଥିବା ସୂଚନା ମିଳିଛି । ତେବେ ଦୁର୍ଘଟଣା ଘଟାଇଥିବା ଯାତ୍ରୀବାହୀ ବସକୁ କଚେରୀ ଛକରେ କିଛି ଲୋକ ଭଙ୍ଗାରୁଜା କରିଥିବା ଜଣାପଡ଼ିଛି । ପରେ ପୋଲିସ ସ୍ଥିତିକୁ କିଛି ମାତ୍ରାରେ ନିୟନ୍ତ୍ରଣ କରିଥିଲା । ବର୍ତ୍ତମାନ ଟାଉନ ଥାନା ଅଞ୍ଚଳରେ ଓ ଲକ୍ଷ୍ମୀ ଟକିଜ ଛକ ଅଞ୍ଚଳରେ ଉତ୍ତେଜିତ ଲୋକେ ରାସ୍ତା ଅବରୋଧ କରିଥିବା ବେଳେ ପ୍ରବଳ ଉତ୍ତେଜନା ଜାରି ରହିଛି ।