ଭାଇମାନଙ୍କ ଦୀର୍ଘାୟୁ କାମନା କରି ପଶ୍ଚିମ ଓଡିଶାବାସୀ ପାଳିଲେ ‘ଭାଇ ଜିଉଁତିଆ’

ଶନିବାର ପୀଠରେ ଅଷ୍ଟମୀ ତିଥିରେ ପାଳନ ହୋଇଥିବାବେଳେ ପଶ୍ଚିମ ଓଡିଶାରେ ଭାଇ ଜିଉଁତିଆ ପର୍ବ ପାଳିତ ହୋଇଛି । ଭାଇର ଦୀର୍ଘାୟୁ ଓ ଶୁଭ ମନାସୀ ଭାଇ ଜିଉଁତିଆ ବ୍ରତ ପାଳିଛନ୍ତି ଭଉଣୀମାନେ ।

ସମ୍ବଲପୁର: ସମଗ୍ର ପଶ୍ଚିମ ଓଡିଶାରେ ପାଳିତ ହୋଇଛି ଭାଇ ଜିଉଁତିଆ ପର୍ବ । ପଶ୍ଚିମ ଓଡିଶାରେ ମୁଖ୍ୟତଃ ଦଶହରା ସମୟରେ ଭଉଣୀମାନେ ନିଜ ଭାଇ ଘରକୁ ଆସିଥାନ୍ତି । ଅଷ୍ଟମୀ ତିଥିରେ ଭାଇର ଦୀର୍ଘ ଆୟୁଷ ଓ ଶୁଭ ମନାସୀ ଜଗତଜନନୀ ମା ଦୁର୍ଗାଙ୍କ ନିକଟରେ ନିର୍ଜଳା ଉପବାସ କରନ୍ତି । ଏହି ଉପବାସ ବା ବ୍ରତ ଭାଇ ଜିଉଁତିଆ ବୋଲି କୁହାଯାଏ । ଏହି ଅବସରରେ ସମ୍ବଲପୁରରେ ଭାଇ ଜିଉଁତିଆ ଓଷା ବେଶ୍ ଶ୍ରଦ୍ଧା ଓ ଆନନ୍ଦ ସହ ପାଳନ କରିଛନ୍ତି ଭଉଣୀମାନେ ।

ଶନିବାର ସକାଳୁ ଅର୍ଥାତ ଦେବୀଙ୍କ ପୀଠରେ ଅଷ୍ଟମୀ ତିଥିରେ ଭଉଣୀମାନେ ଦିନ ସାରା ନିର୍ଜଳା ଉପବାସ ରଖି ସନ୍ଧ୍ୟାରେ ମା' ଦୁର୍ଗାଙ୍କ ନିକଟରେ 108 ଦୁବ, ଚାଉଳ ସହ ବିଭିନ୍ନ ପ୍ରକାର ଫୁଲ, ବେଲପତ୍ର ଏବଂ ଲଡୁ ଭୋଗ ପୂଜା କରିଥିଲେ । ଏହା ପରେ ମା'ଙ୍କ ପାଖରେ ଅଭିମନ୍ତ୍ରିତ ହୋଇଥିବା ସେହି 108 ଦୁବ ଓ ଅରୁଆ ଚାଉଳର ବିଡାକୁ ପରବର୍ତ୍ତୀ ଦିନ ସକାଳୁ ଉପବାସ ଭଙ୍ଗ ପରେ ନିଜ ଭାଇର ବାହୁରେ ବାନ୍ଧିବାର ପରମ୍ପରା ପାଳନ କରିଛନ୍ତି ।

ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ