ସମ୍ବଲପୁର: ସମ୍ବଲପୁରରେ ଜଣେ ସରପଞ୍ଚ ଓ ତାଙ୍କ ସ୍ତ୍ରୀଙ୍କୁ ଧନୁପାଲି ଥାନା ଅଧିକାରୀ ମାଡ ମାରିଥିବା ଅଭିଯୋଗ ଆଣିଲେ ସରପଞ୍ଚ । ଏନେଇ ଶନିବାର ସରପଞ୍ଚ ଓ ତାଙ୍କ ସ୍ତ୍ରୀ ସମ୍ବଲପୁର ଏସପିଙ୍କୁ ଭେଟିଥିବାବେଳେ ଘଟଣାର ତଦନ୍ତ ହେବ ବୋଲି ଏସପି କହିଥିଛନ୍ତି । ଅନ୍ୟପଟେ ଧନୁପାଲି ଥାନା ଅଧିକାରୀ ତାଙ୍କ ବିରୋଧରେ ଆସିଥିବା ଅଭିଯୋଗକୁ ଭିତ୍ତିହୀନ ବୋଲି କହି ଖଣ୍ଡନ କରିଛନ୍ତି ।
ବିବାଦ ଘେରରେ ସମ୍ବଲପୁର ସହରର ଧନୁପାଲି ଥାନା ଅଧିକାରୀ ଅନିତା ପ୍ରଧାନ । ଏକ ମାମଲାରେ ଧନୁପାଲି ଥାନାକୁ ଅଭିଯୋଗ କରିବାକୁ ଆସିଥିବା ଜଣେ ସରପଞ୍ଚ ଏବଂ ତାଙ୍କ ସ୍ତ୍ରୀଙ୍କୁ ଥାନା ଅଧିକାରୀ ଅନିତା ପ୍ରଧାନ ମାଡ ମାରିବା ସହ ଆଶାଳୀନ ଭାଷାରେ ଗାଳି ଗୁଲଜ କରିଥିବା ଅଭିଯୋଗ ହୋଇଛି । ଏନେଇ ସମ୍ବଲପୁର ଏସପିଙ୍କୁ ଭେଟିଛନ୍ତି ସରପଞ୍ଚଙ୍କ ପତ୍ନୀ । ଅଭିଯୋଗ ଅନୁସାରେ ଗତ ଶୁକ୍ରବାର ସନ୍ଧ୍ୟାରେ ସମ୍ବଲପୁର ଜୁଯୁମୁରା ବ୍ଲକ ଅନ୍ତର୍ଗତ କବରାପାଲି ପଞ୍ଚାୟତର ସରପଞ୍ଚ ଅନ୍ତର୍ଯ୍ୟାମୀ ପ୍ରଧାନ ଏବଂ ତାଙ୍କ ପତ୍ନୀ ପ୍ରଭାସିନୀ ପ୍ରଧାନ ନିଜ ଭାଣିଜୀର ନିଖୋଜ ଘଟଣା ନେଇ ଧନୁପାଲି ଥାନାକୁ ଅଭିଯୋଗ କରିବାକୁ ପହଞ୍ଚିଥିଲେ ।