ସମ୍ବଲପୁର:ଜୁନିୟର କ୍ଲର୍କରୁ ଜଜ୍ । ରାଜ୍ୟରେ 48 ତମ ସ୍ଥାନ ରଖି ସଫଳତା ହାସଲ କରିଛନ୍ତି ସମ୍ବଲପୁର ଭତରାର ଗଜରାଜ ଭୋଇ ଓ ଚନ୍ଦ୍ରକାନ୍ତି ଭୋଇଙ୍କ ସୁପୁତ୍ର ଶିଶିର କୁମାର ଭୋଇ । ତାଙ୍କର ଏହି ସଫଳତାରେ ତାଙ୍କ ପରିବାର ଲୋକ ବେଶ ଖୁସି ଥିବାବେଳେ, ଏହି ସଫଳତା ପାଇଁ ସେ ବହୁତ ପରିଶ୍ରମ କରିଥିବା ନେଇ କହିଛନ୍ତି ଶିଶିର । ସୂଚନା ଅନୁଯାୟୀ, ସମ୍ବଲପୁର ମହାନଗର ନିଗମ ଭତରା ଅଞ୍ଚଳର ଯୁବକ ଶିଶିର ।
ଜୁନିୟର କ୍ଲର୍କ ରୁ ଜଜ, ସମ୍ବଲପୁର ର ଶିଶିର ଙ୍କ ସଫଳତାର ଯାତ୍ରା
ସେ ବରଗଡ ଜିଲ୍ଲା SDJM କୋର୍ଟରେ କନିଷ୍ଠ କିରାଣୀ ଭାବେ କାର୍ଯ୍ୟରତ । କିନ୍ତୁ ସେ ବର୍ତ୍ତମାନ ଜଣେ ବିଚାରପତି ହେବାକୁ ଯାଉଛନ୍ତି । ପ୍ରକାଶିତ OJS ପରୀକ୍ଷାରେ ସେ 48ତମ ସ୍ଥାନରେ ରହିଥିବାବେଳେ, ଏହି ସଫଳତା ତୃତୀୟ ଚେଷ୍ଟାରେ ପାଇଛନ୍ତି । ପିଲାଟି ଦିନରୁ ସେ ଏହି କ୍ଷେତ୍ରରେ କାର୍ଯ୍ୟ କରିବାକୁ ଇଛୁକ ଥିଲେ । ଏଥିପାଇଁ ପରିବାର ଲୋକେ ମଧ୍ୟ ତାଙ୍କୁ ବେଶ ସହଯୋଗ କରିଥିଲେ । ଭତରା ସ୍କୁଲରେ ନିଜର ପ୍ରାଥମିକ ଶିକ୍ଷା ସମାପ୍ତ କରିବା ପରେ ସେ ସମ୍ବଲପୁର ଟାଉନ ହାଇସ୍କୁଲରେ ପଢି 10ମ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ ।