ସମ୍ବଲପୁର: ସମଗ୍ର ରାଜ୍ୟରେ ଡେଙ୍ଗୁ ଓ ମ୍ୟାଲେରିଆ ଭଳି ମାରାତ୍ମକ ରୋଗ ହ୍ରାସ କରିଥିବା ଜିଲ୍ଲା ମଧ୍ୟରେ ସମ୍ବଲପୁର ଜିଲ୍ଲା ଅନ୍ୟତମ । ତେଣୁ ଆଗାମୀ ଦିନରେ ଯେଭଳି ସମ୍ବଲପୁରକୁ ମ୍ୟାଲେରିଆ ଓ ଡେଙ୍ଗୁ ଭଳି ମାରାତ୍ମକ ରୋଗ ନ ବ୍ୟାପେ, ତେଣୁ ଏନେଇ ବୁଧବାର ଜିଲ୍ଲା ପ୍ରଶାସନ ପକ୍ଷରୁ ଏକ ବୈଠକ ଅନୁଷ୍ଠିତ ହୋଇଯାଇଛି ।
ଜିଲ୍ଲାପାଳଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଏହି ବୈଠକରେ ସିଡିଏମଓ, ଏଡିଏମଓ, ମେଡିକାଲ ଅଫିସର ପ୍ରମୁଖ ଯୋଗ ଦେଇଥିଲେ । ଏହି ବୈଠକରେ ପ୍ରୋଜେକ୍ଟର ମାଧ୍ୟମରେ ଆଗାମୀ ଦିନରେ ମ୍ୟାଲେରିଆ ଓ ଡେଙ୍ଗୁକୁ କିପରି ତୃଣମୂଳ ସ୍ତରରୁ ନିୟନ୍ତ୍ରଣ କରାଯାଇପାରିବ, ସେ ନେଇ ବିସ୍ତୃତ ଆଲୋଚନା ହୋଇଥିଲା।
ତେବେ ବିଗତ 5 ବର୍ଷ ଉପରେ ନଜର ପକାଇଲେ 2014 ରେ 20482, 2015ରେ 16884, 2016ରେ 12446, 2017ରେ 5119, 2018ରେ 319 ଓ 2019ରେ ବର୍ତ୍ତମାନ ସୁଦ୍ଧା 14 ଜଣ ମ୍ୟାଲେରିଆ ରୋଗୀ ଚିହ୍ନଟ ହୋଇଛନ୍ତି । ଏଥିରେ ମୃତ୍ୟୁ ହାର ଦେଖିଲେ 2014ରେ ଜଣେ, 2015ରେ 2, 2016ରେ ଜଣେ ରୋଗୀଙ୍କ ମୃତ୍ୟୁ ହୋଇଥିବାବେଳେ 2017 ରୁ ଆଜି ପର୍ଯ୍ୟନ୍ତ ଜଣେ ବି ରୋଗୀ ମ୍ୟାଲେରିଆରେ ମୃତ୍ୟୁବରଣ କରିନାହାଁନ୍ତି ।