ସମ୍ବଲପୁର: ପାଖରେ ଅଛି 5 ବର୍ଷର ଅଭିଜ୍ଞତା । ଆଉ ପୁଣି ଥରେ ସେହି ଅଭିଜ୍ଞତାକୁ କାର୍ଯ୍ୟକାରୀ କରିବାକୁ ଦଳ ତାଙ୍କୁ ସୁଯୋଗ ଦେଇଛି । ଆମେ କହୁଛୁ, ରେଢ଼ାଖୋଲ ନିର୍ବାଚନ ମଣ୍ଡଳୀର ବିଜେଡି ପ୍ରାର୍ଥୀ ତଥା ବିଧାୟକ ରୋହିତ ପୂଜାରୀଙ୍କ କଥା । ପୁଣିବିଧାୟକ ହେଲେ ନିର୍ବାଚନ ମଣ୍ଡଳୀ ପାଇଁ କଣ କରିବେ ଏବଂ କେଉଁ ସବୁ ସମସ୍ୟାର ସମାଧାନ କରିବେ ସେ ନେଇ ନିଜ ମତ ରଖିଛନ୍ତି ସେ । ଇଟିଭି ଭାରତର 'ପାଞ୍ଚଟି ପ୍ରଶ୍ନ ନେତାଙ୍କୁ' କାର୍ଯ୍ୟକ୍ରମରେ ସାମିଲ ହୋଇ ଏହିସବୁ ପ୍ରଶ୍ନର ଉତ୍ତର ରଖିଥିଲେ ରୋହିତ ପୂଜାରୀ ।
ନିର୍ବାଚନରେ ବିଜୟୀ ହେଲେ ଜିଲ୍ଲାର ସର୍ବାଙ୍ଗୀନ ବିକାଶ ସହ ପ୍ରତ୍ୟେକ ଘରକୁ ସ୍ବଚ୍ଛ ପାନୀୟ ଜଳ ଯୋଗାଣ ବ୍ୟବସ୍ଥା ତାଙ୍କର ପ୍ରଥମ ପ୍ରାଥମିକତା ରହିବ । ଏଥିସହିତ ରେଢାଖୋଲ ନିର୍ବାଚନ ମଣ୍ଡଳୀକୁ ଆଦର୍ଶ ନିର୍ବାଚନ ମଣ୍ଡଳୀ ଭାବେ ପରିଗଣିତ କରିବା, ଶିଳ୍ପାଞ୍ଚଳ ପ୍ରତିଷ୍ଠା କରି ଜିଲ୍ଲାର ବେକାରୀଙ୍କୁ ନିଯୁକ୍ତି ସୁଯୋଗ ଦେବା, ଶିକ୍ଷା ଏବଂ ଏଜୁକେସନ ହବ ନିର୍ମାଣ କରିବାକୁ ସେ ଯୋଜନା ରଖିଛନ୍ତି । ଏତତବ୍ୟତୀତ ବିଶ୍ୱ ପର୍ଯ୍ୟଟନ ମାନଚିତ୍ରରେ ରେଢାଖୋଲକୁ ସ୍ବତନ୍ତ୍ର ସ୍ଥାନ ଦେବାକୁ ପ୍ରସ୍ତୁତି ଆରମ୍ଭ ହୋଇଥିବା କହିଥିଲେ । ଏହା ସହିତ କ୍ରୀଡା ପାଇଁ ଜୁଜୁମରାରେ ବିଶ୍ବସ୍ତରୀୟ ହକି ଏକାଡେମୀ ଖୋଲିବାକୁ ଯୋଜନା ରଖିଛି ବୋଲି ରୋହିତ କହିଛନ୍ତି ।