ରାୟଗଡା: ନିୟମଗିରିରେ ଡଙ୍ଗରିଆ କନ୍ଧଙ୍କ କୋରୋନା ଆକ୍ରାନ୍ତଙ୍କ ସଂଖ୍ୟା 100 ଟପିଲା ପରେ ଜିଲ୍ଲାପ୍ରଶାସନର ଆରମ୍ଭ ହୋଇଛି ଟୀକାକାରଣ ବ୍ୟବସ୍ଥା । ଏବେ ରାୟଗଡା ଜିଲ୍ଲାରେ ଗାଁ ମୁହାଁ ମହାମାରୀ କୋରୋନା । ଧୀରେ ଧୀରେ ରାୟଗଡା ଜିଲ୍ଲା ନିୟମଗିରିରେ ବସବାସ କରୁଥିବା ବିରଳ ଆଦିମ ଜନଜାତି ଡଙ୍ଗରିଆ କନ୍ଧ ଏବେ ମହାମାରୀ କୋରୋନାର ପଞ୍ଝାରେ ।
ପାହାଡ ପର୍ବତ, ପଥର, ଝରଣାକୁ ବିଶ୍ବାସ କରି ବଞ୍ଚିଥିବା ଏହି ସରଳ ବିଶ୍ଵାସୀ ଜନଜାତି ସମ୍ପ୍ରଦାୟର ଲୋକେ ମହାମାରୀ କୋରୋନା ସଂକ୍ରମଣର ଶିକାର ହୋଇଛନ୍ତି । ଗତ ୧୮ ତାରିଖରେ ରାୟଗଡା ଜିଲ୍ଲା ବିଷମ କଟକ ବ୍ଲକ କୁର୍ଲ୍ଲୀ ପଞ୍ଚାୟତର ଗନ୍ଦିଲି ଗ୍ରାମରେ ପ୍ରଥମ ଜଣେ ଡଙ୍ଗରିଆ ଯୁବକ କୋରୋନା ପଜିଟିଭ ଠାବ ହେବା ପରେ ଜିଲ୍ଲା ପ୍ରଶାସନର ନିଦ ଉଡିଯାଇଥିଲା । ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା, ବିଷମ କଟକ, ମୁନିଗୁଡା ଏବଂ କଲ୍ୟାଣସିଂପୁର ବ୍ଲକ ପ୍ରଶାସନ ଓ ସ୍ବାସ୍ଥ୍ୟ ବିଭାଗର ଏକାଧିକ ଟିମ୍ ନିୟମଗିରିର ବିଭିନ୍ନ ଗ୍ରାମରେ ପହଞ୍ଚି ଲୋକଙ୍କୁ ବୁଝାସୁଝା ପରେ ପ୍ରଥମେ ସ୍ବାବ ନମୁନା ସଂଗ୍ରହ ଏବଂ ପରେ ଟିକା ଦେବାର ବ୍ୟବସ୍ଥା କରାଯାଇଛି ।