ରାୟଗଡା:ରାୟଗଡା ଜିଲ୍ଲା କଂସାରିଗୁଡ଼ାରେ ପ୍ରତିଷ୍ଠା ହେବ ଆଲୁମିନା ରିଫାଇନାରି ପ୍ଲାଣ୍ଟ । ୮ ହଜାର କୋଟି ଟଙ୍କା ପୁଞ୍ଜିନିବେଶରେ ବାର୍ଷିକ ଉତ୍ପାଦନ ହେବ ୨ ମିଲିୟନ ଟନ ଆଲୁମିନା । ତେବେ ଏହାକୁ ଆରଡିପିଏସ କମିଟିର ସଦସ୍ୟମାନେ ସ୍ବାଗତ କରିଥିବା ବେଳେ ସ୍ଥାନୀୟ ଅଞ୍ଚଳର ସମସ୍ୟା ନେଇ ଜିଲ୍ଲାପାଳଙ୍କୁ ଭେଟିଛନ୍ତି । ଜମିହରା ଓ ବିସ୍ଥାପିତ ପରିବାର ବର୍ଗଙ୍କ ମଧ୍ୟରୁ ୧୮ ବର୍ଷରୁ ଊର୍ଦ୍ଧ୍ବଙ୍କୁ ଚିହ୍ନଟ କରି ସମସ୍ତଙ୍କୁ ବିସ୍ଥାପିତ ମାନ୍ୟତା ପ୍ରଦାନ କରିବା ପାଇଁ ଦାବି କରିଛନ୍ତି ।
ସେହିପରି କଂସାରିଗୁଡ଼ା ଗ୍ରାମର ୯ ଜଣ ବ୍ୟକ୍ତି ଡିପି ମାନ୍ୟତା ବଞ୍ଚିତ ହୋଇଥିବା ବେଳେ ସେମାନଙ୍କୁ ଡ଼ିପି ମାନ୍ୟତା ଦିଆଯାଉ ବୋଲି ଦାବି କରିଥିଲେ । ଶିଳ୍ପାଞ୍ଚଳରେ ଆଗାମୀ ଦିନରେ ହେବାକୁ ଥିବା ରାସ୍ତାଘାଟ କାର୍ଯ୍ୟ ସରକାରଙ୍କ ଗ୍ରାମ୍ୟ ଉନ୍ନୟନ ବିଭାଗକୁ ନଦେଇ କମ୍ପାନୀ ପକ୍ଷରୁ କରାଗଲେ ଉକ୍ତ କମ୍ପାନୀ ଦ୍ବାରା ପ୍ରଭାବିତ ଅଞ୍ଚଳବାସୀ ଉପକୃତ ହୋଇପାରିଥାନ୍ତେ ବୋଲି କମିଟିର ସଭାପତି ଦଉଳ ରତ୍ନ ଚୌଧୁରୀ କହିଛନ୍ତି । କହିରଖୁଛୁ କି, ଏହି ଅଞ୍ଚଳର ପ୍ରାୟ ୧୦ଟି ଗ୍ରାମ କଂସାରିଗୁଡ଼ା, ଫୁଲଜବା, କାଡ଼ାପଦର, ପୁହୁଣ୍ଡି, ପୋଡ଼ାପାଡ଼ି, କାଣ୍ଡଶିଲ, ସୁକୁରୁ ପୁଟ, ମୁଣ୍ଡଗାଁକୁ ନେଇ ଆରଡିପିଏସ କମିଟି ଗଠନ ହୋଇଛି ।
ଅନ୍ୟପଟେ କମିଟିର ସଦସ୍ୟ ରାଜେନ୍ଦ୍ର ଦୂରିଆ କହିଛନ୍ତି ଯେ, ଯଥାଶୀଘ୍ର ଆଦିତ୍ୟ ଆଲୁମିନା ପ୍ରକଳ୍ପ କାର୍ଯ୍ୟକୁ ତ୍ୱରାନ୍ୱିତ କଲେ ଅଞ୍ଚଳବାସୀଙ୍କ ଅର୍ଥନୈତିକ ଓ ସାମାଜିକ ସ୍ଥିତି ସୁଦୃଢ ହୋଇପାରିଥାନ୍ତା । ଓଡିଶାର ମୁଖ୍ୟମନ୍ତ୍ରୀ ଏହି ପ୍ରକଳ୍ପ ଘୋଷଣା କରିଥିବାରୁ କମିଟିର ସଭାପତି କଂସାରିଗୁଡା ଅଞ୍ଚଳବାସୀଙ୍କ ପକ୍ଷରୁ ଧନ୍ୟବାଦ ଜଣାଇଥିଲେ ।