ଶୋଇଛି ପ୍ରଶାସନ, କ୍ଷତିଗ୍ରସ୍ତଙ୍କୁ ମିଳୁନି ସହାୟତା

ଭାଙ୍ଗିଯାଇଛି ଘରଦ୍ବାର। ରାତି ବିତିଛି କିଟ କିଟ ଅନ୍ଧାରରେ । ପେଟ ମୁଠାଏ ଖାଇବା ଯାଇନି। ପିଲା ଠାରୁ ବୁଢା ସେମିତି ରହିଛନ୍ତି ଉପବାସ। ରାୟଗଡା କାଶିପୁରରେ କାଳବୈଶାଖୀର ତାଣ୍ଡବ ପରେ।

ରାୟଗଡା: କାଶିପୁରରେ କାଳବୈଶାଖି ରଚିଛି ତାଣ୍ଡବ। ରାୟଗଡ଼ା ସଦର ମହକୁମା ସହିତ ଦୁର୍ଗମ ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟିଛି। କିନ୍ତୁ ମିଳିନି କିଛି ସରକାରୀ ସହାୟତା। ଇତିମଧ୍ୟରେ ୨୪ ଘଣ୍ଟାରୁ ଉର୍ଦ୍ଧ୍ବ ସମୟ ବିତିଥିଲେ ସୁଧା ଏଯାଏଁ ପ୍ରଭାବିତ ପରିବାରଙ୍କୁ ପଲିଥିନ ଖଣ୍ଡିଏ କିମ୍ବା ରାନ୍ଧିବା ପାଇଁ ଚାଉଳ ମୁଠାଏ ଯୋଗାଇ ଦିଆ ଯାଇନାହିଁ ।

ଏପରିକି ଗାଁରେ ଲୋକେ ଭୋକ ଉପାସରେ ଗତ କାଲି ଠାରୁ ରହିଥିବା ବେଳେ ପ୍ରଶାସନିକ ଅଧିକାରିଙ୍କ ଦେଖା ମିଳିନଥିବା ଅଭିଯୋଗ କରିଛନ୍ତି ଗ୍ରାମବାସୀ । କାଳବୈଶାଖିରେ କାଶିପୁର ନୁଆ ସାହିରେ ୧୦ଟି ଘର ଭାଙ୍ଗିବା ସହ ୫ଟି ଦୋକାନ ଘର , ଗୋଟିଏ ବୋଲେରୋ ଗାଡ଼ି ସମେତ ଅନେକ ବଡ଼ ବଡ଼ ଗଛ ଉପୁଡ଼ି ପଡ଼ିବା ସହିତ ୭ଟି ବିଦ୍ୟୁତ ଖୁଣ୍ଟ ଭାଙ୍ଗି ଯାଇଛି।

ସେହିଭଳି ଦୁର୍ଗମ ପିପଲପଦର ଗ୍ରାମରେ ୧୧ଟି ଘର, କେନ୍ଦୁଗୁଡ଼ାରେ ୫ଟି ଘର ଏବଂ ଚିଲିଗୁଡ଼ାରେ ୨ ଟି ଘର ଭାଙ୍ଗିଯାଇଥିବା ବେଳେ ଘରେ ସାଇତି ରଖିଥିବା ଧାନ, ମାଣ୍ଡିଆ ଏବଂ ଚାଉଳ ଭିଜି ନଷ୍ଟ ହୋଇଯାଇଛି। ବିଦ୍ୟୁତ ଖୁଣ୍ଟ ଭାଙ୍ଗିପଡ଼ିଥିବା ବେଳେ ଗତ ସନ୍ଧ୍ୟାରୁ ସମଗ୍ର ବ୍ଲକରେ ବିଦ୍ୟୁତ ସରବରାହ ବନ୍ଧ ରହିବା ଯୋଗୁଁ ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି। ତେବେ ଏନେଇ ଆମେ ସ୍ଥାନୀୟ ତହସିଲଦାରଙ୍କ ମତାମତ ଲୋଡ଼ିଥିବା ବେଳେ ତାହା ସମ୍ଭବପର ହୋଇନଥିଲା । କେବେ ପ୍ରଶାସନର ଆଖି ଖୋଲୁଛି, କେବେ କ୍ଷତିଗ୍ରସ୍ତଙ୍କୁ ସହାୟତା ମିଳୁଛି ତାହା ଦେଖିବା ବାକି ରହିଲା ।

ରାୟଗଡାରୁ ରଞ୍ଜନ ରଥ, ଇଟିଭି ଭାରତ