ରାୟଗଡା: ବନ୍ୟା ନାଁ ଶୁଣିଲେ ଆଜି ବି ଶିହରି ଉଠନ୍ତି ରାୟଗଡା ଜିଲ୍ଲାର କୁମ୍ଭାରୀଗୁଡା ବାସୀ । କାରଣ 2017 ମସିହାରେ ନାଗାବଳୀ ନଦୀରେ ଆସିଥିବା ବନ୍ୟା ଭାଙ୍ଗି ଦେଇଯାଇଛି ଲୋକଙ୍କ ମେରୁଦଣ୍ଡ । ଚାହୁଁ ଚାହୁଁ ନଦୀଗର୍ଭରେ ଲୀନ ହୋଇଯାଇଥିଲା ବର୍ଷ ବର୍ଷର ସାଇତା ସମ୍ପତ୍ତି । ବନ୍ୟା ଯିବାର ଇତି ମଧ୍ୟରେ 2 ବର୍ଷ ବିତି ଯାଇଛି ସତ, ହେଲେ ଆଜି ବି ଅଣ୍ଟା ସଳଖେଇ ଛିଡା ହୋଇ ପାରି ନାହାନ୍ତି କୁମ୍ଭାରୀଗୁଡା ବାସିନ୍ଦା । ସେହି ଛିଣ୍ଡା ପଲିଥିନ ମୁଣ୍ଡ ଗୁଞ୍ଚି ଜୀବନ ବଞ୍ଚୁଛନ୍ତି ସେମାନେ ।
ଇତି ମଧ୍ୟରେ ନାଗାବଳୀ ବନ୍ୟାକୁ ପୁରୁଛି 2ବର୍ଷ । ହେଲେ ସେଦିନର ସେ ଭୟଙ୍କର ଦୃଶ୍ୟ ଆଜି ବି ଆଖି ଆଗରେ ଭାସି ଉଠୁଛି । ଘରଦ୍ବାର ଆଉ ସମସ୍ତ ସମ୍ପତ୍ତିକୁ ଆଖି ପିଛୁଳା ଧୋଇନେଲା 2017 ଜୁଲାଇ 16ରେ ଆସିଥିବା ପ୍ରଳୟଙ୍କାରୀ ବନ୍ୟା । ସବୁକିଛି ଛଡାଇ ନେଇ ରାୟଗଡ଼ା ଜିଲ୍ଲା କୁମ୍ଭାରୀଗୁଡ଼ା ଗ୍ରାମବାସୀଙ୍କ ଜୀବନକୁ କରିଦେଲା ଛାରଖାର । କେବଳ ବଞ୍ଚିଗଲା ତ ଜୀବନ ଓ ପିନ୍ଧିଥିବା ଲୁଗାଖଣ୍ଡିକ । ଆଉ ସେବେ ଠାରୁ ଆଜି ଯାଏ '37 ଆଦିବାସୀ ପରିବାର' ଭାଗ୍ୟକୁ ଆଦରି ପଡ଼ିରହିଛନ୍ତି ଛିଣ୍ଡା ପଲିଥିନ ଢ଼ଙ୍କା ଭଙ୍ଗାଦଦରା ଝାଟିମାଟି କୁଡିଆରେ।